2Mos. 32 - BUKO SIPUNENAN

Tularat jaui mas

¹ Kateteret tai Israel masiitco, si Mose makope burunia itugorosot sibara ka leleu, iageti purutrangan si Aron samba kuarangan katubunia, “Ta' tuagai apa sipuaaili kai Mose, sirimanua siambit sita bela sibara ka Misir: Oto galai kam addeatmai taikamanua siuteake kai.”

² Lepa kuanangan si Aron katubutda, “Golok kam sangamberi subang mas sipakeira sangamberi tainanalep samba tatogamui, samba ambit kam katubukku.”

³ Iageti golokrangan ka talinganda sangamberi subang mas sene-senenda samba masiambitnia katubut Aron.

⁴ Alanangan si Aron sangamberi subang nenda, lepa anauakenangannia samba baliuakenangannia ka tularat jaui sipaenia. Kuarangan tai Israel, “Ale Israel, nene te taikamanuata sibelaake sita ka Misir!”

⁵ Lepa rioakenangan si Aron sara kudduat pasibuluat ka ipot jaui mas nenda samba kuanangan, “Mansep ai punen masiabeuake Tuhan.”

⁶ Simanseman sangamberi tai Israel masiambit piga ngamuneng pa tarimeu buluakenen rarangen, samba piga ngamuneng pa minca buluakenen paabanan. Pukuddurangan mukom samba mulo, lepa puriorangan mugalai olop tubu.

⁷ Iageti kuanangan si Tuhan katubut Mose, “Gorosotnake ekeu simaruei, aipoi tai Israel siambitnu bela ka laggai Misir aragalaian sikatai.

⁸ Arapasabauan sangamberi surukatKu. Aragalaian tularat jaui sibara ka mas siuruakenen, lepa panindogirangannia samba panguruatnakerangan buluakenen katubunia. Kuarangan nenda te taikamanuanda siambit sia bela ka Misir.

⁹ Kuagai, tai Israel nenda bulat makela patuatda.

¹⁰ Bui' nusibo nusaila Aku. Mugolu Aku katubutda samba bulat kumamateiake sia. Tapoi ekeu samba muntogatnu Kubailiuake le geti sara bangsa sabeu.”

¹¹ Tiddounangan si Mose katubut Tuhan Taikamanuania, kuanangannia, “Tuhan angoian le nugalai kisedda katubutda? Ta' pa Ekeu le amasibelaake ka laggai Misir kabagat gege samba puroron sabeu?

¹² Ke numateiake sia, kuarangan te geti tai Misir, anuambit tai Israel bela ka laggai Misir bule numateiake sia ka leleu samba nusubukaake. Ta kisedda, oi Tuhan, silingan le pinaatum samba bui nubaraake pugejaat bagatda.

¹³ Repdep le paguguletNu Abraham, Ishak samba si Jakob. Repdem, Ekeu te amasigalai palelengan masikau sapunuteteura kele igit panyanyat ka manua, kisedda leu et sangaliot polak sipalelekNu nenda ibailiu le geti bakkat sapunuteteura teret buruburu.”

¹⁴ Iageti silinangan pinaatuNia si Tuhan samba taan airiuriuake isubuake tai Israel.

¹⁵ Gorosot si Mose barania ka leleu nenda ambitnangan rua bukku lei sibara surukat Taikamanua sitususurat ka rua bebet bukku nenda.

¹⁶ Bulat Taikamanua le amasigalai bukku lei nenda samba amasisuratnake surukatNia sedda.

¹⁷ Aipeile sia tugogorosot, arepnangan si Josua rapugerei tai Israel, lepa kuanangannia katubut Mose, “Ai maarep uraira sipaleleiga, nenda akuarep.”

¹⁸ Aleginangannia si Mose, “Tuarepnia ta kele urai kamanangan ele gerei kakakala, nenda ngangan sirimanua sipuurai.”

¹⁹ Kateteret aimalegre si Mose ka pusapougat nenda, itconangan tularat jaui mas nenda samba sangamberi sirimanua ai sia mututuru, iageti pugolunangan. Sedda leu et ka reret leleu nenda, ribbaiakenangan bukku lei nenda si Mose pat magatcanangan.

²⁰ Lepa geti alanangannia tularat jaui sigalaira tai Israel nenda anauakenangannia, tuddunangannia pat alit kele abu, lepa pagalaunangannia ka oinan. Lepa geti koiniakenangan tai Israel ralonia.

²¹ Kuanangan katubut Aron, “Aponia aragalai katubum bailiu obaakenungan sia ragalaiake jo sabeu?”

²² Aleginangannia si Aron, “Bui nupugolu katubukku, anuagaian ron patuatda sirimanua nene masigalaiake sikatai.

²³ Arakua katubukku, “Ta tuagai aponia pa sipuaili kai Mose, sirimanua siambit sita bela sibara ka Misir, oto galai taikamanuamai sioi masiuteake kai.”

²⁴ Koiniakekungan sia raake subangra mas, lepa akerangannia katubukku. Sangamberi pulaingean nenda, kaukungannia ka obengan, lepa bailiunangannia tularat jaui kele nene!”

²⁵ Againangan si Mose, si Aron aiobaake tai Israel kele kuro sibebela ka geli, bailiunangan sia gagatietda tai saggakda.

²⁶ Iageti purionangan si Mose ka matatbaliu gugurukat pusapougat samba pugereinangan, “Kasei masitutnake si Tuhan buita moinia sene!” Iageti oi muntogat Lewi masigoilik si Mose,

²⁷ samba kuanangan katubutda, “Tuhan Taikamanuan Israel masikua ka sene-senemui masioppat lanjaumui samba puenungmuian masienungi pusapougat nene, barania ka matatbaliu gugurukat nene teret ka gugurukat bagei samba masimateiake sangamberi sasaraina, sasuruak samba sangamberi pabebakenenmui lalep.”

²⁸ Lepa galaiakerangan samuntogat Lewi tiboiet nenda samba ka gogoi nenda telu ngaribu sia amatei.

²⁹ Kuanangan si Mose ka samuntogat Lewi, “Gogoi nene aikokoiakean kam si Tuhan sibailiu sipasikeli si Tuhan kalulut senesenemui anumateiake kam tatoga samba sasarainamui, ka enungan nenda te iake si Tuhan panukananNia katubumui.”

³⁰ Patonia le kuanangan si Mose ka tai Israel, “Anugalaian kam jo sabeu, tapoi kineneiget kutatra le geti leleu nenda minca masipatiboake si Tuhan, kepei kusese katuappekat jomui.”

³¹ Lepa ei si Mose masipatiboake si Tuhan samba kuanangan, “Bangsa nenda aragalaiakean jo sabeu. Aragalai taikamanua sibara ka mas.

³² Ke momoi appeakean le' jotda, ke ta posangan le oningku ka buko purimanuaiat.”

³³ Aleginangan si Tuhan, “Sarat sirimanua sigalai jo katubukKu, Kupoposa oni ka buko nenda.

³⁴ Kenan le kineneiget samba ambit sia ka kudduat sikuaKu katubumui. MalaikatKu le ipalululu ekeu, tapoi iaili teterenia Kulumunake jotda, Kuukumake sia.”

³⁵ Lepa akenangan si Tuhan pugejaat baga katubut sangamberi sirimanua nenda kalulut arabesiake si Aron igalai tularat jaui mas nenda.