Biblia Todo Logo
Bìoball air-loidhne

- Sanasan -

2Mos. 31 - BUKO SIPUNENAN


Taikamanua masipili sirimanua masigalai Sapou samba bibilet kabagania
( 2Mos. 35:30–36:1 )

1 Kuanangan si Tuhan katubut Mose,

2 “Akupilingan si Bezaleel togat Uri, punuteteu Hur sibara ka muntogat Jehuda,

3 samba Akupanguruaningannia KetsatKu, kukau katubunia agai masigalaiake sangamberi ngamataat galajet,

4 masigalai senengamata sipinaatu galaiakenen bule itugalai sibara ka mas, perak samba tembaga,

5 masiruggui bukku simakirisau bule itupagalak; itupae loina samba masigalai senengamata galaiakenen.

6 Si Oholiab, togat Ahisamakh sibara ka muntogat Dan. Akupilingan leu et nia siropmake si Bezaleel. Kukau leu et puaagai simakope saliu katubut sangamberi siagai kabei, bule ioi ragalai aponia siparentaakenenKu katubum:

7 SapouKu, Peti Pakerekat Baga samba takkenia, sangamberi bibilet SapouKu,

8 iate nenda kudduat pasibuluat samba pugalainia, reret alito sibara ka mas simalina pugalainia, kudduat pasibuluat kudduat pasilabokat kumanyang,

9 kudduat pasibuluat kudduat buluakenen rarangen samba sangamberi pugalainia, kudduat oinan pasamba bongennia,

10 leppei imam Aron samba leppeira tatogania pakeietda kateteret masigalaiake galajet sibailiu imam,

11 tula pasisukat samba kumanyang simasingin ka Bilik Sipunenan. Sangamberi nenda buita ragalai siripot siparentaakenenKu katubum.”


Pasirepdeman masipuneni gogoi Sabat

12 Si Tuhan masiparentaake si Mose, bule isegeake tiboiet nene ka tai Israel,

13 “Kua ka tai Israel, kise: Puneni kam gogoi Sabat, gogoi siteuakenenKu sibailiu gogoi puariat. Teret buruburu gogoi nenda ibailiu repdemen ka kam samba Aku, bule nuagai kam, Aku te Tuhan, samba Akubailiuakean kam bulat paamianKu teret buruburu.

14 Buita nusuru kam gogoi Sabat, aipoi gogoi nenda te gogoi supunenan ka kam; kasei ta masisuru gogoi Sabat nenda, buita tuukum ukum, kalulut senen sirimanua sipugagalai ka gogoi nenda, sirimanua nenda buita tumateiake.

15 Enem ngagogoi burunia le nugalai galajetnu, tapoi ka gogoi sikapitu buita nupuneni kam gogoi Sabat, gogoi puariat, gogoi sipunenan kai Tuhan: Senen sirimanua sigalaiake galaietnia ka gogoi Sabat, buita tuukum ukum simateiakenen.

16 Buita mariuriu rapuneni gogoi nenda tai Israel sibailiu toggaijat ka palelengan.

17 Gogoi nenda iate sara repdemen simariuriu ka tai Israel samba Aku, kalulut Aku, Tuhan masigalai manua samba polak kabagat tetere enem ngagogoi, samba ka gogoi sikapitu puarikungan.”

18 Lepat aipanibo si Tuhan kai Mose ka uddut leleu Sinai, Taikamanua masikau katubunia rua bukku lei sibara surukat Taikamanua.

Lean sinn:



Sanasan