2Mos. 30 - BUKO SIPUNENAN

Pagalaiat kudduat pasilabokat kumanyang

¹ Kuanangan minca si Tuhan katubut Mose, “Galai sara kudduat pasibuluat sibara ka loina akasia kudduat pasilabokat kumanyang.

² Galai putubuat kudduat pasibuluat nenda buita si epat taiming, nanta samba lionia simakere sangaeto, samba buaknia ruaeto. Ka epat taimingnia galainungan ban sisaraakenen ka kudduat pasibuluat nenda.

³ Rubeiat ka patania, samba leu ka epat bebenia samba sangamberi bannia buita tulakkeki pasamba mas simaeru samba tukau laisinia mas ka sangalionia.

⁴ Galainungan rua letcu ka tei laisi ka rua bebenia pasibulungan loina pasibairat kudduat pasibuluat nenda.

⁵ Pasibairat nenda buita nugalai sibara ka loina akasia samba tulakkeki pasamba mas.

⁶ Galakngake kudduat pasibuluat nenda ka ipot komak Peti Pakerekat Baga, ka kudduat Kupaaili geti kekeu.

⁷ Ka senen simanseman kateteret ioi si Aron masipatarek alito, buita ilabo kumanyang simasingin ka kudduat pasibuluat nenda.

⁸ Kisedda leu et kateteret itunam alito kateteret kasoibokat buita ilabo kumanyang ka kudduat pasibuluat nenda ka matat Tuhan nenda buita tugalaiake simariuriu teret buruburu.

⁹ Bui nupanguruatake kam ka uddut kudduat pasibuluat nenda kumanyang keraet, buluakenen tarimeu ele buluakenen sigalakngakenen, bui leu nuuruake buluakenen suat anggur ka uddutnia.

¹⁰ Sangaminca sangarura buita igalaiake si Aron enungan galaiakenen masipalina kudduat pasibuluat ka enungan masisosoki epatnia ban pasamba logau tarimeu sibuluakenen pasiappet jo, punen nenda buita tugalaiake ka senen rura teret buruburu. Kudduat pasibuluat nenda buita mapunen samba masipunenan Kaku.”

Pagalaiat luluiet ka Sapou Tuhan

¹¹ Kuanangan si Tuhan katubut Mose,

¹² “Kateteret tubaraake pangandeat igitda tai Israel, ka senen taimanteu buita masilului katubukKu bulagat panebui addeat tubunia bule ta ioraknia pugejaat baga kateteret tubaraake pangandeat nenda.

¹³ Ka senen sirimanua siadde ka pangandeat nenda buita masilului piga pa taddet bulagat masitut sanet bulagat siteuakenen siripot kilo ka SapouKu.

¹⁴ Senen sirimanua siadde ka pangandeat nenda, iate senen sirimanua sipurura rua pulu ngarura ele legei, buita masiake paroman sikokoi nenda.

¹⁵ Sirimanua simakayo ta leu ralulului simasaliu, samba sirimanua simageba ta leu momoi masilului simatata' kateteret rapasilului bulagat siteuakenen nenda.

¹⁶ Ruruake kam bulagat nenda ka tai Israel, samba pakei kamnia kabagat parurukat ka SapouKu. Sangamberinia nenda iate bulagat pasitebui tubutda, samba mariuriu le kurepdep samba Kujago sia.”

Pagalaiat kudduat oinan sigalai sibara ka tembaga

¹⁷ Kuanangan si Tuhan katubut Mose,

¹⁸ “Galai sara kudduat oinan sibara ka tembaga samba bongennia sibara ka tembaga leu et. Galakngake kudduat oinan nenda kapaoggangan Sapou samba kudduat pasibuluat, lepa geti kaunungan oinan kabagania.

¹⁹ Oinan nenda pakeiet Aron samba tatogania bule ioi rabui kabei samba reretda

²⁰ Ke tuguru' sia ka SapouKu, buita rabui kebei samba reretda, bule ta ramatei. Kisedda leu et ke moi sia ka kudduat pasibuluat nenda masigalaiake punen samba masilabo buluakenen rarangen kai Tuhan,

²¹ buita rabui leu et kabei samba reretda, bule ta ramatei. Nenda sibailiu surukat ka sia samba ka muntogatnia teret buruburu.”

Pagalaiat tula pasisukat simapunen

²² Kuanangan si Tuhan katubut Mose,

²³ “Ala sangamberi pusinginan simakope eru, mur simaoinan enem ngakilo, kayu manis telu ngakilo samba kole simaeru telu ngakilo,

²⁴ samba loina simoite lima ngotu bulagat perak, tukilo siripot siteuakenen kilo ka SapouKu, samba tula zaitun epat ngaliter.

²⁵ Buita tupagalu sangamberinia nenda ibailiunia tula pasisukat sipunenan, sara pusinginan sigaluakenen simakolou kele sigalai siagai masigaluake pusinginan; nenda te sibailiu tula pasisukat sipunenan.

²⁶ Pakei kam tula sigaluakenen nenda masitulaiji SapouKu Peti Pakerekat Baga,

²⁷ kudduat pasibuluat samba sangamberi pugalainia, reret alito samba pugalainia, kudduat pasibuluat pasilabokat kumanyang,

²⁸ kudduat pasibuluat buluakenen rarangen pasamba sangamberi pugalainia, samba kudduat oinan samba bongennia.

²⁹ Buita nupusinenanake sangamberinia, bailiunangannia bulat sipunenan; senen sibekbeknia bailiu masipunenanrangan.

³⁰ Tulaiji si Aron samba tatogania bule tusukatnake sia ibailiu imam rauukkake galajet puiimam.

³¹ Kua ka tai Israel: nene te sibailiu tula pasisukat sipunenan Kaku teret buruburu.

³² Tula nenda tamomoi tuuruake katubut sirimanua bagei. Bui nugalai tula kele nenda nupagalunia kele nenda leu et. Nenda te tula sipunenan, samba buita masipunenan ka kam.

³³ Sirimanua sigalai tula nenda, ele sirimanua sipakeinia ta tai imam, buita tumateiakenia.”

Pagalaiat kumanyang

³⁴ Kuanangan si Tuhan kai Mose, “Ala piga pa pusinginan sikere iginia, iate muno, kulit kopek, ekket simasingin samba ekket bagei simasingin samba bulat kumanyang.

³⁵ Pakei sangamberi nenda masigalai galut kumanyang simasingin kele sigalai siagai masigalai pusinginan. Kaunungan simakaop bule kumanyang nenda mariuriu imalina samba momoi tupakei addeatKu.

³⁶ Sangarubeiat kumanyang nenda buita tutuddu pat ailit. Ambit goiso ka SapouKu samba karapmake kam ka ipot Peti Pakerekat Baga. Kumanyang nenda buita tuaddeake bibilet simalina sikokoiakenen addeatKu.

³⁷ Pagalaiat kumanyang bulat galajetnu buita nugalai kam kumanyang sigaluakenen kele kisedda luet addeatmui, nenda te rubeiat Tuhan, sipunenan ka kam.

³⁸ Kasei sipasigagalai pusinginan kele nenda buita tumateiakenia.”