2Mos. 28 - BUKO SIPUNENAN

Pagalaiat leppeira tai imam

¹ “Sogai kebbunu si Aron pasamba tatogania si Nadab, Abihu, Eleazar samba Itamar, samba bailiuake sia imam sia bule ragalaiake galajet imam.

² Galai kam leppei imam Aron, sibailiu pulaingean puaabeunia.

³ Sogai kam sangamberi siagai manuilak sikauKu puagaiat. Koiniake kam sia ragalai leppei Aron bule ioi iukkaake galajet puiimam.

⁴ Koiniake kam sia leu et ragalai tabbot rurukat, efod, jubah, leppei sibara pulaingean sisuilak, sorot ute samba akkik tenga. Leppei imam nenda buita ragalai ka kebbunu kai Aron samba ka tatogania bule ioi raukkake galajet puiimam.

⁵ Oto buita raala mas, komak simasurou samba simasuat laiket, simabonan samba komak simaalit baga.

⁶ Leppei nenda buita tugalai sibara ka mas, komak simasurou, simasuat laiket samba simabonan samba simaalit baga banangnia siputre: sigalai sara sirimanua siagai kabei.

⁷ Buita bara ka leppei nenda rua takket ta'ta situppaiakenen ka rua taiming siappra efod nenda.

⁸ Sara akkik tenga sitikai simaalit baga sibara ka galajet simakere tusubbaiake ka efod nenda bule ibailiu sangarubeiat.

⁹ Buita nuala rua bukku simakeppu saki onin bukku nenda delima samba suratnungan sipae oninda tatogat Israel ka bukku nenda.

¹⁰ Enem katalagat oninda nenda ka bukku simakeppu saki siboiki samba enem oni minca ka bukku simakeppu saki sikarua, siripot patunan pututukat matatda.

¹¹ Oninda tatogat Israel nenda tusuratnake sipae ka rua bukku simakeppu saki kele sigalai sara sirimanua siagai masigalai bukku simakeppu saki samba bukku nenda, tubolit pasamba mas.

¹² Iageti buita nugalakngake karua bukku nenda ka rua takket ta'tat leppei efod bailiu bukku nenda repdemen masirepdep tai Israel. Oto si Aron buita iambit oninda ka matat Tuhan ka uddut rua takket ta'tania nenda sibailiu repdemen.

¹³ Buita nugalai kam appra mas

¹⁴ samba rua ngasolabbit mas siputre kele appra, samba appraakenungannia ka akkik mas nenda.”

¹⁵ Galai kam ka Imam Sabeu sara tabbot ru'rukat pakeietnia kateteret ioba iagai siobat bagat Taikamanua. Galajet samba sisuilak tabbot ru'rukat nenda buita makere kele galajet samba tusuilak leppei.

¹⁶ Putubuatnia si epat taiming samba tuleuleu rua, nanta samba lionia senenia sangaremang.

¹⁷ Ottotnake kam epat ngatunan bukku simakeppu saki ka tabbot ru'rukat nenda. Ka patunan siboiki bukku sipuoni delima, topas samba baiduri sepah.

¹⁸ Ka patunan sikarua bukku sipuoni zamrud, bukku nilam samba bukku intan simakirisau.

¹⁹ Ka patunan sikatelu bukku lazuardi, bukku akik samba bukku kecubung.

²⁰ Ka patunan si kaepat bukku sipuoni pirus, yakut samba ratna cempaka. Ka pulu ruania bukku simakeppu saki nenda buita tuappra pasamba mas.

²¹ Ka senen bukku simakeppu saki buita tupae sara oni katalagat pulurua togat Jakob sibailiu toggaijat pasirepdeman tai Israel.

²² Galai kam tabbot ru'rukat nenda rua ngalou sibara ka mas simaeru siputre kele appra.

²³ Galai kam leu et rua letcu mas samba ottotnake kam ka rua tu'tut kapatat tabbot ru'rukat nenda.

²⁴ Lepa bulukngake kam ka ruania ngalou mas nenda kabagat letcu nenda.

²⁵ Ka rua tu'tut bagei ka ngalou nenda buita tuappraake ka rua laplapnia, bule tabbot ru'rukat nenda momoi tatabbraake ka rubeiat ka mata apprat ta'tat efod.

²⁶ Galai kam minca rua letcu mas, lepa ottonakemuiannia ka tabbot ru'rukat nenda ka tei tu'tut rubeiat bagania siorak efod nenda.

²⁷ Lepat nenda, galai kam minca rua letcu mas samba ottotnake kam ka rubeiat ka ipot rua apprat ta'tat efod legret patabbrat susuilaknia simakarepe, ka isit ka patat akkik tenga siputre simaalit.

²⁸ Letcut tabbot ru'rukat nenda buita tutuppaiake pasamba appra simalimun ka letcut efod bule tabbot ru'rukat nenda buita ainia ka patat akkik tenga samba ta igogolok.

²⁹ Kateteret ituguru si Aron ka kudduat sipunenan, buita iabbit sangamberi oni muntogat Israel situtusurat ka tabbot ru'rukatnia, bule Aku Tuhan mariuriu Kurepdep paamianKu.

³⁰ Kau kam Urim samba Tumim kabagat tabbot ru'rukat nenda ipakeinia si Aron ke moinia kamatakKu. Kateteret kele nenda buita mariuriu ipakei tabbot ru'rukat, bule ioi iagai kiddiet bagakKu ka paamian Israel.”

³¹ “Jubah pakeiet ka uddut efod sangamberinia buita sigalai sibara ka komak simalimun.

³² Lolokkat leppei nenda buita tulaplap pasamba komak sigoiso bule ta imalabbei imabirit.

³³ Ka sangaliot bebet tei leppei nenda buita tugalai pulaingeannia iate kele buat delima sibara ka komak simalimun, simasurou, simasuat laiket, samba katalagania ai jijining mas,

³⁴ bailiu sara jijining mas samba sangambua delima aipakakadiu ka sanganantat bebet leppei nenda.

³⁵ Jubah nenda buita ipakei si Aron ke iagalai galajet puiimamnia. Kateteret ioi ka mataKu ka Bilik Sipunenan ele ikaddiuake kudduat nenda, maarep te geti nau jijining nenda, bule ta imatei.

³⁶ Galai kam sara pulaingean sigalai sibara ka mas simaeru samba pae kam tiboiet “Sipunenan le kai Tuhan.”

³⁷ Appraake kam nenda ka sorot ute pasamba appra simalimun.

³⁸ Pulaingean mas nenda buita iottotnake si Aron ka bukkut utenia, bule Aku, Tuhan, Kuoba masisilo sangamberi panguruat siabbitda tai Israel katubukKu, kenanen ka pasiaambit panguruat nenda aragalaian jo.

³⁹ Leppei Aron buita sitikai sibara ka komak simaalit baga. Galai kam leu et sara sorot ute sibara ka komak simaalit baga samba akkik tenga sisuilak.

⁴⁰ Galai kam leppei, akkik tenga samba sorot utera tatogat Aron bule imakoinong puaabeura.

⁴¹ Leppeiake kam leppei nenda katubut Aron sarainamui samba ka tatogania. Tulaiji kam sia pasamba tulat zaitun, kele nenda te tusukatnake sia samba tupusipunenanake sia masipasikeli Aku sibailiu imam.

⁴² Lepa galai kam sokkit sitete' sigalai ka komak simaalit baga, nantania barania ka pukabekat teret ka bakkapat masitabbo rubeiat tubu sitai mateu tuitco.

⁴³ Sokkit nenda buita mariuriu rapakeinia kateteret raguruki SapouKu ele ralegeri kudduat pasibuluat ragalaiake panindogat sibailiu imam ka Bilik Sipunenan, bule ta ramatei kalulut imatoila rubeiat tubutda sitai mateu tuitco. Nene te' surukat galaiakenen Aron samba sapunuteteunia. Nene te surukat galaiakenen Aron samba sapunuteteunia teret buruburu.”