2Mos. 24 - BUKO SIPUNENAN

Pelelengan tuappra samba tuparon

¹ Lepa geti kuanangan si Tuhan kai Mose, “Panatra kam nuailiake ka Aku, sambamui si Aron, si Nadab, si Abihu samba leu pitu pulu sikebbukat laggai Israel, samba purekkuk kam manindou katubukKu ka sareunan.

² Ekeu saram le momoi malegeri Aku. Sabagei ta momoi ramalegre, beringan siberikabaga tamomoi rapanatra ka leleu nene.”

³ Lepa ei si Mose masisegeake ka tai Israel sangamberi tiboiet samba surukat Tuhan. Alegirangannia simakere, “Kuoba kai masigalaiake sangamberi tiboiet Tuhan.”

⁴ Lepa nenda suratnangan si Mose sangamberi tiboiet Tuhan. Patonia le simanseman, rioakenangan sara kudduat pasibuluat pasamba pulu rua bukku toggaiat reret leleu nenda, siripot igit muntogat Israel.

⁵ Lepa koiniakenangan si Mose piga pa tailainge, samba panguruatnakerangan buluakenen rarangen kai Tuhan samba leu masijaja piga ngamuneng pa jaui sibailiu buluakenen paabanan.

⁶ Sangarubeiat logau jaui nenda alanangannia si Mose samba piliakenangannia kabagat sangamberi simuko. Sangarubeiat bagei subuiakenangannia ka uddut kudduat pasibuluat.

⁷ Lepa geti alanangan buko palelengan nenda, lepa basaakenangannia ka nganga sabeu ka tai Israel. Kuarangan, “Kuoba kai masiarep samba masigalaiake sangamberi surukatNia.”

⁸ Lepa alanangan si Mose logau sikuddu kabagat sangamberi simuko nenda samba so'soakenangannia katubutda sapaamian. Kuanangannia, “Logau nene masironake palelengan siapprat Tuhan pasambamui sipubobongen ka sangamberi tiboietNia.”

⁹ Lepa geti si Mose, si Aron, si Nadab, si Abihu samba leu pitu pulu sikebbukat laggai Israel nenda manatra leleu.

¹⁰ Iageti itcorangan Taikamanuan Israel murio kabagat lalep sigalai sibara ka bukku simakeppu saki oniakenen bukku safir, samba simalimun manua simatautau.

¹¹ Sia sikebbukat laggai Israel nenda araitcoan Taikamanua, kenanen kisedda ta aimateiake sia. Lepat nenda pukomrangan samba muloo'.

Si Mose ka leleu Sinai

¹² Lepa geti kuanangan si Tuhan katubut Mose, “Panatrangan ka uddut leleu nuoi katubukKu. Sedda Kuake geti katubum rua bukku sinuratKu pasamba sangamberi surukatKu. Sangamberi surukat nenda KuakeNia sibailiu gelaietda tai Israel.”

¹³ Lepa si Mose samba si Josua sipasiroropnia, patarekrangan tubutda, lepa panatranangan si Mose ka leleu kudduat Tuhan.

¹⁴ Aipatonean si Mose ka sikebbukat laggai Israel, “Ngena kam kai ka pusapougat nene teret kutoili kai. Si Aron samba si Hur ai sia katalagamui sene. Kasei pa sibara pugejaat baga momoi nuailiake kam sia masilepaake pakaroatmui.”

¹⁵ Iageti panatranangan si Mose leleu Sinai, lepa tabbonangannia tanai rusa sangatappa.

¹⁶ Pulatsanan Tuhan mukuddu ka leleu Sinai, samba tabbonangannia tanai rusa enem ngagogoi burunia; ka gogoi sikapitu pusoganangan si Tuhan katalagat tanai rusa isogai si Mose nenda.

¹⁷ Toro pulatsanan Tuhan kele obengan sipasilalabo ka uddut leleu nenda raitco tai Israel.

¹⁸ Lepa riuriuakenangan ipanatra si Mose pat guru'nia kabagat tanai rusa nenda. Epat pulu ngagogoi epat pulu ngasoibo burunia aikuddu sedda si Mose.