2Mos. 23 - BUKO SIPUNENAN

Puroipoat samba putotopit

¹ “Bui' nupakakra katuareman boko, samba bui' nuropake sirimanua sikatai sikau katumunengan ta sibulatnia.

² Bui' te nututnake kam sirimanua simigi ke ragalaiake puselat ele masipasabau surukat ka pasikakau katumunengan ta sibulatnia.

³ Bui' nuiggat sirimanua kabagat pakaroat, kenanen pakaroakenen nenda sirimanua simageba.

⁴ Ke nuitco kam jaui ele kalidei saggakmui simapepepe, oto ambit kam minca ka sibakkatnia.

⁵ Ke bele kalidei saggakmui kalulut sanet bairanennia, ropmake kam masisuruake kalidei nenda, pasamba masigaugau bairanennia, bui nukaddiuake kam nia kisedda.

⁶ Galaiake kam katuroipoat ka simageba ke moinia isegeake pakaronia ka pakaroat.

⁷ Bui' nulelekngake kam pasuksungan sipina bara samba bui' nubailiuake sirimanua sitaimasele tuukum ukum simateiakenen, kalulut ta Kuseneseatake sirimanua sigalaiake pukakatai kele nenda.

⁸ Bui' nusilo bulagat ka enungan sitaimaroipo, aipoi nenda masigalai sirimanua simainco mata bailiu mapeset, samba masiseleake sangamberi sirimanua sineseat.

⁹ Bui' nugalaiake siobat bagamui katubut sirimanua siooiake, nuagai kam kipa besi'nia ibailiu sirimanua siooiake, kalulut siburu kam leu et sirimanua siooiake ka Misir.”

Rura sikapitu samba gogoi sikapitu

¹⁰ “Enem ngarura burunia momoi nupanguremi kam monemui samba masiala bongennia sibuakenennia.

¹¹ Tapoi ka rura sikapitunia polak nenda buita nuobaake kam. Sanganantat rura nenda tamomoi nururuake kam aponia pa sipututu'tu ka monemui. Obaake kam nenda addeat sirimanua simageba samba legeinia addeat tarimeu simalia. Galai kam kisedda leu et ka monen anggur samba sangamberi loinat zaitunmui.

¹² Enem ngagogoi kabagat sangamenggui momoi nupugalai kam, tapoi ka gogoi sikapitu, buita muari kam, bule tarimeumui, sangamberi sipaguguletmui samba sangamberi sirimanua siooiake sipugagalai addeatmui momoi rapuari leu et.

¹³ Lelekngake kam sangamberi sikuakKu nene katubumui. Bui' nupanindogi kam taikamanua bagei, sambat masikua oninia leu et ta momoi.”

Enung galaiakenen pagalaiat punen sabeu

¹⁴ “Ka senen rura buita nubaraake kam telu punen addeat masiabeuake Aku.

¹⁵ Ka laggo Abib, kateteret siteuakenen, buita nupunenake kam Punen Roti Sita'sioman kele siparentaakenenKu katubumui, kalulut ka laggo nenda kam masikaddiuake Misir. Bui' nukom kam roti sigalai sibara sioman kaburut punen pitu ngagogoi nenda. Senen nuoi kam manindou katubukKu, buita nuambit kam panguruat.

¹⁶ Punenake kam Punen Pasimoneiat kateteret nutadda kam masimonei bua siboiki sigalaimui ka monemui. Punenake kam Punen Pusasapou Buluk ka pangampulat rura kateteret nururuake kam buat monen anggur samba monen buat kaju.

¹⁷ Ka senen rura teteret tubaraake telunia punen nenda, sangamberi taimanteu buita moi manindou katubukKu, Tuhan, Taikamanuamui.

¹⁸ Bui' nupanguruatnake kam aponia pa sibara sioman kateteret nubuluake kam logau buluakenen ja'jaket katubukKu. Tabet buluakenen sipanguruatakenen katubukKu ka burut punen nenda tamomoi tulegeiake teret mansep.

¹⁹ Ka senen rura buita nuambit kam ka Uman Tuhan Taikamanuamui gandum sigetaimui siboiki. Akkulat togat biribiri ele togat kambing tamomoi tuseu pasamba suat tottot inania.”

Palelengan samba surukat

²⁰ “Kukokoiniake te malaikatKu muboiki ka kam bule ijago kam ka pusilaiat iambit kam ka kudduat sinarekngakenenKu.

²¹ Lelekngake samba kau numareddet kam katubunia. Bui' nupagoluake kamnia kalulutnia punutubukKu, samba ta iappeake geti pinasabaumui, kalulut oningKu ai katubunia.

²² Tapoi ke mareddet kam katubunia samba masigalaiake sangamberi tiboietKu, Aku le geti pasasaggak masisaggangi saggakmui.

²³ MalaikatKu muboiki geti ka kam samba masiambit kam ka laggaira tai Amori, Het, Feris, Kanaan, Hewi samba Jebus, samba Kususubuake geti sia.

²⁴ Bui' nupanindogi kam taikamanuanda samba nuului kam galai tubutda. Tapoi kau le nusubuake kam sangamberi bulungan sigalaira samba bukkatnake kam sangamberi arigi bukku kudduat panindogatda.

²⁵ Ke manindou kam katubukKu, Tuhan Taikamanuamui, sukatnakekungan kam geti ka komen samba loket, samba sangamberi besi' areuakekungannia geti katubumui.

²⁶ Ta babara geti ka laggaimui simakakatai suruket samba sitaipususule. Akekungan geti ujut puririmanuamui.

²⁷ Sangamberi laggai ailiakenenmui Kugalai le geti ramaloto katubukKu, bailiuakekungan rapusabu, sangamberi saggakmui masisoksok sipababalau.

²⁸ Sangamberi saggakmui Kupasaragai le geti, samba tai Hewi, Kanaan samba Het tuituiakekungan sia ka matamui bule ioi nubela kam.

²⁹ Ta' sangakekelat Kukekle sia geti kabagat sangarura, bule ta imatangeu laggai nenda, samba bui' ituppai igit tarimeu simasabbak bele pei igimui.

³⁰ Kutuituiake sia geti pasasangarubeiat, teret ramaigi sakalaggiatmui masikudduiji laggai nenda.

³¹ Sangamberi song laggaimui Kuteteuake geti barania ka Gukguk Akaba teret ka bagat oinan Efrat, samba barania ka Koat Katalaga teret ka simatangeu. Kuaake te geti gegemui katubutda silaggaiji laggai nenda, bailiu oinangan nukekle kam sia kateteret nubela kam masioppu laggai nenda.

³² Bui' nugalai kam palelengan pasamba sangamberi sirimanua nenda ele pasamba taikamanuanda.

³³ Bui' nuobaake kam sangamberi sirimanua nenda mukuddu ka laggaimui, bule bui' nupanindogi kam sangamberi taikamanuanda samba numajo kam katubukKu. Ke nupanidogi kam sangamberi taikamanuanda, bele kam kabagat luluplup kamateiat.”