2Mos. 22 - BUKO SIPUNENAN

Enung galaiakenen pagalaiat pautangan

¹ “Kenanen kasei pa sipananangkou sara jaui ele biribiri samba ja'ja'nangannia ele sakiakenangannia, buita ilului silinia, iate sangamuneng jaui silinia lima ngamuneng jaui, samba epat ngamuneng biribiri sailit sangamuneng biribiri nenda.

² Ke tuaili sara sipananangkou kateteret ainia mananangkou, samba bo'borangannia sirimanua pat matei, oto sipasibo'bo' nenda ta muutaknia logau,

³ tapoi ke pamamatei nenda ipuaili kateteret sinago, oto muutak le nia logau. Sipanangkou nenda buita ilului utaknia sangamberi sinangkounia, ke simageba le nia, buita tusakiakenia silit sinangkounia nenda.

⁴ Ke ai peile katubunia sinangkounia nenda samba aipeile muririmanua, ele jaui, kalidei ele biribiri, buita ilului silit sinangkounia rua ngaminca iginia kele igit sinangkounia.

⁵ Kenanen kasei pa siobaake tarimeunia mukom parou ka monenia ele ka monen aggurnia, samba obaakenangan terimeu nenda ibela, bailiu komnangan buat monenda sabagei pat sappru, oto sibakkat tarimeu nenda buita ikau buat mone simakope eru sibara ka monen angurnia sibailiu utaknia.

⁶ Kenanen kasei pa siobekake obengan ka monenia, lepa raratnangan obengan nenda ka monenda sabagei, samba labonangan isappru gandum siputu'tu ele sangamberi gandum simaruei tugetai, oto sirimanua siobekake obengan nenda buita tuutakake samba ilului utaknia.

⁷ Kenanen kasei pa sirimanua sioba masikoiri bulagat ele bibilet simakeppu saki ka aleinia. Lepa nangkourangannia ka lalep aleinia nenda. Ke tusese sipanangkou nenda buita ilului rua ngaminca iginia kele igit sinangkounia.

⁸ Tapoi ke ta tusese sipanangkou, sirimanua sipasikokoiri nenda buita tuambit ka kudduat panindogat, samba sedda buita musuppania, aipoi ta ainangkou bibilet sikoiriniakenen aleinia katubunia.

⁹ Ka senen paukelat pagalaiat pukayoat, ele pagalaiat jaui, kalidei, biribiri, bibilet ele aponia pa simapepepe, lepa tusese minca, sangamberi sirimanua sipasikukua sibailiu bakkatnia buita tuambit ka kudduat panindogat. Sirimanua sipatoilat Taikamanua sibailiu simasele, buita ilului rua ngaminca iginia katubut sibakkatnia.

¹⁰ Kenanen kasei pa masiurau kalidei, jaui, biribiri ele siuragat bagei bakkatda sabagei, lepa geti tarimeu nenda matei, ele mabakbak rerenia ele raraurau tai saggak, tapoi taanai sipasimumuneng pagalaiat nenda,

¹¹ oto buita mei nia ka kudduat panindogat samba musuppa ka onin Tuhan, aipoi ta ainangkou tarimeu sikaura pasikelitnia nenda. Ke bulatnia ta nia amasinangkou, buita isilo suppa sibakkat tarimeu nenda samba sirimanua sipasikelinia ta leu tuutakake.

¹² Ke tarimeu nenda aranangkou sirimanua sabagei, oto sirimanua sipasiurau tarimeu nenda buita ilului silinia ka sibakkat tarimeu nenda.

¹³ Ke tarimeu nenda aisabbak le tarimeu simasabbak, oto sirimanua sipasurau nenda buita ipatoila legei tolatnia sibailiu toggaiat katubut sibakkatnia, samba ta leu ilulului sailit tarimeu nenda.

¹⁴ Kenanen kasei pa sipasibabale sangamuneng tarimeu, lepa tarimeu nenda mabakbaknangan rerenia ele matei kateteret taanai sibakkatnia ka kudduat nenda, oto sipasibabale nenda buita ilului sailit tarimeu nenda.

¹⁵ Tapoi ke ipuaili nenda kateteret ai sibakkatnia sedda, oto sipasibabale nenda ta tuutakakenia. Ke tarimeu nenda luluiet le itupakei, oto utak nenda atuaddeakean ka sakinia.”

Enung galaiakenen pagalaiat putopinan samba parurukat

¹⁶ Kenanen kasei pa sipasinana'na sara siokko sitaipututunangan bule ipaperepakenia, oto buita ilului alat toga samba italimouakenia.

¹⁷ Tapoi ke ukkui sinanalep masikera simanteu nenda mutalimou ka togania, oto simanteu nenda buita ilului katubut ukkui sinanalep nenda bulagat kele igit alat toga siokko.

¹⁸ Senen tainanalep sigalaiake kerei buita tumateiake.

¹⁹ Kenanen kasei pa sipaelet ka tarimeu buita tumateiake.

²⁰ Kenanen kasei pa sipanguruatnake buluakenen katubut taikamanua bagei ke ta katubukKu, Tuhan, buita tuukum ukum simateiakenen.

²¹ Bui' nupaoreiji kam ele nugalaiake kam sitaimaroipo katubut sirimanua siooiake, repdem kam aipoi siburu kam leu et sirimanua siooiake ka Misir.

²² Bui' nugalaiake kam siobat bagamui katubutda tai lumang ele sipululusai.

²³ Ke nugalai kam sikatai katubutda, Aku, Tuhan Kuarepi le geti ke musoga sia ratiddou paroman katubukKu.

²⁴ Mugogolu te Aku samba Kumamateiake kam kabagat pasaggangan, bailiunangan sangamberi tainanalepmui pulumangrangan samba tatogamui pulusairangan.

²⁵ Ke nubaleake kam bulagat ka sara sirimanua simageba sibara ka talagat paamianKu, bui' nugalaiake kam kele sipasititiddou utak ele sibesiake tuppai utak.

²⁶ Ke nuala kam komak sirimanua sabagei sibailiu panere utaknia, komak nenda buita nutoiliake kam kepei itusone sulu,

²⁷ kalulut sarat komak nenda le sibabara addeat masioloiake tubunia. Ke ta tutoiliake katubunia, apangan le pakeietnia sibailiu sobbe kateteret iperep? Ke musogania masitiddou paroman katubukKu, arepikungannia kalulut manuntu bagaKu.

²⁸ “Bui' nusuppaake Taikamanua samba bui' nupateleieji siuteake laggainu.

²⁹ Kateteret siteuakenen, panguruatnake kam katubukKu sangarubeiat sibara ka buat gandum samba suat anggurmui. Ake kam tatogamui simanteu sikebbukat katubukKu.

³⁰ Kisedda leu et jaui samba biribiri simanteu siboiki mutu'tu mata. Obaake kam sangamberi tarimeu nenda mukuddu ka inania pitu ngagogogi burunia, lepa akemuian katubukKu ka gogoi sikabalunia.

³¹ Kam paamianKu, kalulut nenda tarimeu bongennia pa sitarakkup tarimeu simasabbak, ta momoi nukom kam akkulania, tapoi kau kam nenda ka jo'jo.”