2Mos. 21 - BUKO SIPUNENAN

Enung galaiakenen pagalaiat ka pagugulet

¹ Lepa kuanangan si Tuhan katubut Mose, “Kau kam katubutda tai Israel sangamberi enung galaiakenen nene:

² Ke nusaki kam sara pagugulet tai Ibrani, buita mugalainia ka kam enem ngarura burunia. Kabagat rura sikapitu, buita tubelaakenia samba taanai tulului bongennia pa katubunia.

³ Ke silainge peilenia kateteret ibailiunia paguguletnu, oto sinanalepnia tamomoi itutnia ibela. Tapoi ke amutalimouannia kateteret ibailiunia paguguletnu, sinanalepnia momoi itutnia ibela.

⁴ Ke tuannia masitalimouakenia ka sara sinanalep, lepa bara togania, oto sinanalep samba togania nenda situannia sibakkat sia, samba tamomoi ratut pagugulet nenda kateteret tubelaakenia.

⁵ Tapoi ke pegugulet nenda ikua nuntut bagania sinanalepnia, tatogania, samba ta ioba tubelaakenia,

⁶ oto tuannia buita iambitnia ka kudduat parurukat. Sedda pagugulet nenda tukoiniake ipurio muandai ka matat baliu ele arigit matat baliu kudduat parurukat, samba tuannia buita ipunu talingan pagugulet nenda. Oto nia ibailiu geti paguguletnia burut purimanuaiatnia.

⁷ Ke sara sinanalep tai Ibrani isakiakenia ukkuinia ibailiu pagugulet, enung ibela ta makere ka pagugulet simanteu.

⁸ Ke sinanalep nenda ta iangkaake bagat tuannia, sibara patuat siboiki italimouakenia, oto buita isakiakenia minca katubut ukkuinia. Sinanalep nenda tamomoi tusakiake katubut siooiake, kalulut ta aigalaiake palelengannia katubut sinanalep nenda.

⁹ Ke ai sara sirimanua masisaki pagugulet sinanalep bule ibailiuakenia sinanalep togania, pagugulet sinanalep nenda buita igalaiake katubunia kele bulat togania.

¹⁰ Ke mutalimou minca toga simanteu, buita mariuriu igalaiake pupasikelanannia masikau komen samba bibilet samba leu galaiakenen simaturere ka sinanalepnia siboiki.

¹¹ Ke ta igalaiake pupasikelanan nenda, buita ibelaake sinanalepnia nenda taanai isisilo bulagat pasitebui.”

Enung galaiakenen ka pagalaiat galaitubu sitaipasese

¹² “Kenanen kasei pa masibo'bo sirimanua sabagei pat matei, buita tuukum ukum simateiakenen.

¹³ Tapoi ke ipabo'bo' ta sipali samba taanai pinaatunia masimateiake, momoi ituituiake tubunia ka sara kudduat sausauketKu geti katubumui, samba sedda isese pukuneman.

¹⁴ Tapoi ke sara sirimanua igalai pugegege samba ka sipali imateiake sirimanua sabagei, lepa geti pabalaunangan iei ka kudduat pasibuluatKu bule igaba pukuneman, sirimanua nenda buita tuala ka kudduat pasibuluat samba tuukum ukum simateiakenen.

¹⁵ Kenanen kasei pa sipasibo'bo' ukkui ele inania buita tuukum ukum simateiakenen.

¹⁶ Kenanen kasei masinangkou sara sirimanua buita tuukum ukum simateiakenen, kenanen sirimanua nenda aisakiakeannia ele ai peilenia ka lalepnia.

¹⁷ Kasei sitelei ukkui ele inania buita tuukum ukum simateiakenen.

¹⁸ Ke kabagat sara palabakat sara sirimanua masibo'bo' sirimanua bagei iboboake bukku katubunia, ele siteimutnia, tapoi ta amatei, ta tuukumakenia. Ke sirimanua sibo'bo' nenda pat rapponia kalulut sibo'bo'kat nenda,

¹⁹ tapoi lepa geti momoi itusuru samba muenung minca pasamba tutura, sirimanua sibo'bonia buita ipasikelinia teret imale samba masikau sakit laggeknia.

²⁰ Kenanen kasei pa masibo'bo paguguletnia simanteu ele sinanalep pat matei pagugulet nenda, buita tuukum sipabo'bobo nenda.

²¹ Tapoi ke pagugulet nenda aipeilenia muririmanua kabagat sara ele rua ngagogoi, si tuan nenda ta tuukum. Kalulut nia le sibakkat pagugulet nenda.

²² Ke ai piga pa taimanteu sipalalaba samba ai sara ka talagatda sibaraake mauju ka sara sinanalep sipususuruket bailiu makatainangan suruketnia, tapoi ta amatei sinanalep nenda, oto sirimanua nenda buita tuutakakenia siripot igit sitiddou simanteunia samba buita ilului siripot sitakkiakenenda sipasiukum.

²³ Tapoi ke sinanalep nenda makope siorangan katubunia bailiu mateinia, oto ukuman siloket simanteu nenda iate enga silit enga,

²⁴ mata silit mata, sot silit sot, kabei silit kabei, rere silit rere,

²⁵ mauju silit mauju, mauju silabokat silit mauju silabokat, gook silit gook.

²⁶ Kenanen kasei pa sibo'bo matat paguguletnia pat mapesetnangan, buita ibelaake pagugulet nenda sibailiu panebui matania.

²⁷ “Ke ai sara sirimanua masibo'bo paguguletnia pat takki sotnia, buita ibelaake pagugulet nenda sibailiu panebui sotnia.”

Pupasikelanan sipubabakkat ka tarimeu

²⁸ Ke sangamuneng jaui simanteu isukkaiake sara sirimanua pat matei, jaui nenda buita tubaijuknia bukku pat matei. Akkulania tamomoi tukom, tapoi sibakkatnia ta tuukumake.

²⁹ Ke jaui simanteu nenda amareireian ipasisukkai, samba sibakkatnia amareireian atuparedepannia, tapoi ta aijago tarimeu nenda, oto ke jaui simanteu nenda masisukkai sara sirimanua pat matei, tarimeu nenda buita tubaijuknia bukku pat matei samba sibakkatnia leu et buita tuukum ukum simateiakenen.

³⁰ Tapoi ke tuobaake sibakkat jaui nenda ilului utak, buita ilului kele igit tiddoget addeat silit utak engania.

³¹ Ke sisukkaiakenennia nenda sara tatoga simanteu ele sinanalep tuorakngake enung galaiakenen kele nene leu et.

³² Ke simamatei nenda sara pagugulet simanteu ele sinanalep, sibakkat jaui nenda buita ilului telu ngapulu bulagat perak katubut sibakkat pagugulet nenda, samba jaui simanteu nenda buita tubaijuk bukku pat matei.

³³ Kenanen kasei pa sipasigaigai uggungan samba ta aitabbo uggungan nenda, samba bele sangamuneng jaui simanteu ele kalidei ka bagania,

³⁴ sibakkat uggungan nenda buita ilului utak katubut sibakkat tarimeu nenda, tapoi momoi iala tarimeu simamatei nenda addeatnia.

³⁵ Ke jaui simanteu bakkat sara sirimanua masisukkai jaui simanteu jauira sabagei, ka ruadda sibakkatnia nenda buita rasakiake tarimeu sipuririmanua peile nenda samba rubeirangan bulagatnia. Rubeirangan leu et akkulat tarimeu simamatei nenda.

³⁶ Tapoi ke aiagaian jaui simanteu nenda ai katukelatnia masisukkai, samba sibakkatnia ta aijago, buita isaili pasamba jaui simanteu sipuririmanua peile, samba momoi iala tarimeu simamatei nenda bakkatnia.”