2Mos. 19 - BUKO SIPUNENAN

Tai Israel ka leleu Sinai

¹ Ka laggo sikatelu lepat arakaddiuake Misir tai Israel, sege sia ka kudduat simatangeu ka Sinai ka gogoi nenda leu et.

² Lepat aratuitui baratda ka Rafidim, sege sia ka kudduat simatangeu ka Sinai, lepa pusapourangan ka kudduat simatangeu; ka ipot leleu nenda.

³ Iageti panatranangan ka leleu nenda si Mose paaili ka Taikamanua. Panibonangan si Tuhan katubut Mose sibara ka leleu nenda samba masikoiniakenia masipaagai ka tai Israel, sapunuteteu Jakob,

⁴ “Anuitcoan kam sigalaiakenenKu katubutda tai Misir, samba kipa Akuambit kam sene katubukKu ka kudduat nene kabagat gege sabeu, kele uma' manyang iambit togania ka uddut kapponia.

⁵ Kineneiget ke mareddet kam ka tiboietku samba mariuriu ka palelenganKu, bailiuakekungan kam geti bulat paamianKu. Sangaliot polak iate Aku sibakkatnia, tapoi kam ibailiu le geti kilibet bagakKu.

⁶ Ibailiu te kam geti sipuuku Aku sibailiu imam samba paamian sipunenan. Nene te sangamberi tiboiet segeakenennu ka tai Israel.”

⁷ Iageti gorosot si Mose samba sogainangan sikebbukat laggai Israel bule raparuru, lepa tiboinangannia katubutda sangamberi tiboiet Tuhan katubunia.

⁸ Lepa alegirangannia simakere tai Isarel, “Kuoba kai masigalaiake sangamberi tiboiet Tuhan.” Samba alegiatda nenda segeakenangannia si Mose katubut Tuhan.

⁹ Kuanangan si Tuhan katubut Mose, “Momoi te Aku katubum kabagat tanai rusa simakeppu, bule sangamberi tai Israel raarep ke manibo Aku katubum, samba leu et bule imariuriu ramatonem baga katubum. Lepa segeakenangan si Mose katubut Tuhan alegietda tai Israel.

¹⁰ Kineneiget ailiake sangamberi sirimanua nenda, samba koiniake sia ka gogoi nene samba mansep masisuru tubu. Buita rataptap bibiletda.

¹¹ Kepei iaili gogoi sikatelu buita amatarekngan sia, kalulut ka gogoi sikatelu nenda tugogorosot te Aku ka uddut leleu Sinai, kudduat sangamberi sirimanua momoi masiitco Aku.

¹² Galai kam toggaiat sibokko leleu nene sibailiu song sitaioi rasabau paamian nenda. Kera kam paamian nenda manatra leleu sambat ralegerinia. Kasei masisabau nenda tuukum le geti ukum simateiakenen.

¹³ Sirimanua nenda buita tubaijuknia bukku ele tupana pat matei, ke ibekbek song nenda. Nene tuorakngake ka sirimanua kisedda leu et ka tarimeu, sangamberi sipasisasaliu song nenda buita tuukum ukum simateiakenen. Sarat ke amunauan siata pipiau, sangamberi paamian nenda iapeite momoi rapanatra ka leleu.”

¹⁴ Lepa geti gorosot si Mose barania ka leleu samba ailiakenangan sangamberi paamian nenda. Koiniakenangan sia masisuru tubu samba tataprangan leu bibiletda.

¹⁵ Iageti kuanangan si Mose katubutda, “Patarek kam tubumui kepei iaili gogoi sikatelu. Tamomoi nupaperepake kam tainanalep.”

¹⁶ Ka gogoi sikatelu, kapatokat, bara leleggu, bila' samba tanai rusa simakeppu ka uddut leleu samba leu maarepnangan ngangan pipiau simakope ron. Sangamberi sirimanua ka pusapougat mugeret tubu kalulut loto.

¹⁷ Ambitnangan sia si Mose paaili ka Taikamanua, lepa puriorangan ka reret leleu nenda.

¹⁸ Sangaliot leleu Sinai tabbonangannia kujuk, kalulut si Tuhan tugorosot ka uddutnia kabagat obengan; kujuk nenda mukuilu kele kujuk sibara ka purusuat, samba sangaliot leleu nenda pungeungeunangan simakope.

¹⁹ Ipunau trompet memei makope ron. Panibonangan si Mose samba aleginangannia Taikamanua kabagat leleggu.

²⁰ Gorosot si Tuhan ka uddut leleu Sinai, samba sogainangan si Mose bule iei ka uddut leleu nenda. Lepa panatranangan si Mose.

²¹ Kuanangan si Tuhan katubut Mose, “Gorosotnake ekeu samba parepdepmake sangamberi paamian nenda, tamomoi masisaliu song raoi masiitco Aku. Ke rapasabau tiboietKu, maigi te geti ka talagatda simamatei.

²² Beringan sangamberi tai imam sioba masilegreake tubunia katubukKu, buita rasuru tubutda, ke ta, ukumkungan sia.”

²³ Kuanangan si Mose katubut Tuhan, “Sangamberi paamian nenda tamomoi tusakai, kalulut anuparentaakean kai masiaddeake leleu nene sibailiu kudduat sipunenan samba kulelekngake kai song sibokkonia.”

²⁴ Aleginangan si Tuhan, “Gorosotnake ekeu, lepa toili ekeu minca sene pasamba si Aron. Tapoi sangamberi tai imam samba sangamberi sapaamian tamomoi masisaliu song, raoi katubukKu. Ke rapasabaunia, ukumkungan sia.”

²⁵ Lepa gorosot si Mose masiailiake paamian nenda samba segeakenangan tiboiet Tuhan katubutda.