2Mos. 18 - BUKO SIPUNENAN

Si Jitro masiailiake si Mose

¹ Si Jitro, talikut Mose, imam ka Midian, masiarep pagalaiat sangamberi sibabara sigalai Taikamanua kai Mose samba tai Israel, kateteret aiambit sia si Tuhan bela ka Misir.

² Iageti ei si Jitro masiailiake si Mose, ambitnangan leu si Zipora, sinanalep Mose sikukuddu peile ka Midian,

³ sambatda si Gersom samba si Eliezer, ruadda togania simanteu. Toga siboiki ioniake Gersom kalulut aikua si Mose, “Aku sara sirimanua siooiake ka tobbou laggaira sabagei.”

⁴ Toga sikarua ioniake si Eliezer kalulut aikua si Mose, “Taikamanua panindogiet taikebbukatku airopmake samba aiarauake aku bailiu ta aimateiake aku Rimata Parao.”

⁵ Si Jitro mei sambatda sinanalep Mose samba leu rua tatogania ka simatangeu, kudduat pusapougat Mose ka bebet leleu sipunenan.

⁶ Koiniakerangan sia rakuania kai Mose pagalaiat kaooira,

⁷ iageti belania masiamiake sia. Purekkuknangan kamatat Jitro samba sigguknangannia. Parererangan pasasambatda pagalaiat ron tubu senenda, lepa tugururangan kabagat Sapou.

⁸ Lepa nenda tiboinangan si Mose katubut talikunnia sangamberi sigalaiakenen Tuhan katubut Parao samba ka tai Misir aiarauake tai Israel. Tiboinangan leu katubunia pagalaiat sangamberi pangoringan sisilora tai Israel ka puenungandu, samba kipa aiarauake sia si Tuhan.

⁹ Masiarep sangamberi nenda, maangkanangan bagat si Jitro

¹⁰ samba kuanangan, “Tuumun le si Tuhan siarauake kam ka kabeira tai Misir samba kai Rimata Parao! Tuumun le si Tuhan sibelaake tai Israel ka paoreiat!

¹¹ Kineneiget akuagaian, si Tuhan peile sabeu ka sangamberi taikamanua bagei, kalulut aigalaiake sangamberi nenda, kateteret tai Misir ragalai siobat bagadda katubutda tai Israel.”

¹² Lepa nenda si Jitro masipanguruatnake piga pa buluakenen rarangen samba buluakenen ja'jaket katubut Taikamanua. Iageti si Aron samba sangamberi sikebbukat laggai Israel ei sia mukom sambatda taliku Mose ka matat Taikamanua.

Si Mose masiuddetake sipasiukum

¹³ Ka gogoinia imapato pakaroakenangan paukelat ka talagat sangamberi tai Israel. Galajet nenda sisappruake tetere barania simansep pat soibo.

¹⁴ Kateteret aiitco si Jitro sangamberi bulat galaiakenen Mose, parerenangan, “Angoi kisene nugalaiake ka bangsa nene? Angoi saram le mukukuddu, beringan sangamberitda nenda aisia muririo kamatam barania simansep pat aili soibo?”

¹⁵ Aleginangan si Mose, “Sangamberi sirimanua nenda moi katubukku bule raagai obaket Taikamanua.

¹⁶ Ke paukle sia, ailiakerangan aku bule tutakkiake pakaroatda, samba segeakekungan katubutda sangamberi tiboiet samba sangamberi surukat Taikamanua.”

¹⁷ Kuanangan si Jitro, “Ta maeru kisedda.

¹⁸ Ke kiseda enungannia masipasaggo tubum le samba leu et sangamberi sirimanua nenda. Galaiakenen nenda makopeat le sane, tamomoi nugalainia saram.

¹⁹ Arepmake nganturatku, samba Taikamanua masiropmake ekeu geti. Kirenangan maeru ibailiu ekeu punutubutda sirimanua nene ka matat Taikamanua samba masiabbit paukkelatda katubuNia.

²⁰ Buita nugelaiake katubutda sangamberi surukat Taikamanua samba masikolouake enungan puririmanua simaeru bulat galaiakenenda.

²¹ Samba leu buita nukokoiake piga pa sia taimanteu simaagai paatuat, samba masisausau' sia sibailiu siuteake sangaribu sirimanua, siuteake sangotu sirimanua, siuteake lima pulu sirimanua, samba siuteake pulu sirimanua. Sangamberitda buita simareddet katubut Taikamanua, momoi tukatonemi samba ta raoba masisilo bulagat ka enungan sitaimaroipo.

²² Koiniake sia masigalaiake galajet sibailiu sipasiukum bangsa nene, senen mungkuatda. Galajet nenda buita ragalaiake ka enungan simakolou. Sangamberi pakaroat sabeu momoi rasegeakenia katubum, tapoi sangamberi paukelat sigoiso momoi ralepaakenia saratda. Pagalaiat nenda masipanangka galaiakenennu kalulut ai sia leu et ka bagania masipasikeli.

²³ Ke nugalaiake kisedda, samba Taikamanua leu et masikoiniake ekeu nugalaiake nenda, oinangan leu nugalaiake galajetnu, samba sirimanua toili le sia geti simangka baga kalulut maruei itulepaake paukelatda.”

²⁴ Galaiakenangan si Mose nganturat Jitro,

²⁵ samba kokoiakenangan piga pa sirimanua simaagai patuat ka talagat tai Israel. Sau'saunangan sia ibailiu saute ka sisangaribu sirimanua, siuteake sangotu sirimanua, siuteake lima pulu sirimanua samba siuteake sipulu sirimanua.

²⁶ Galaiakerangan galajetda sibailiu sipasiukum ka tai Israel. Sangamberi pakaroat sabeu segeakerangannia katubut Mose, tapoi sangamberi paukelat sigoiso lepaakerangannia saratda.

²⁷ Lepa geti si Mose masiobaake si Jitro iei samba toili si Jitro ka tobbou laggainia.