2Mos. 17 - BUKO SIPUNENAN

Oinan sibara ka bukku Sabeu

¹ Lepa geti sangamberi paamian Israel masikadduake simatangeu Sin samba ei sia ka sara kudduat ka kudduat bagei kele siparentaakenen Tuhan. Ka sara tetere pusapourangan ka Rafidim, tapoi sedda taanai oinan lo'.

² Lepa pangunyu'rangan katubut Mose samba kuarangan, “Ake kam oinan lomai.” Aleginangannia si Mose, “Angoi mungunyu' kam katubukku? Angoi nusibo kam si Tuhan?”

³ Tapoi sangamberi sirimanua nenda bulat amaonggouat samba riuriu le rapungunyuk katubut Mose. Kuarangan, “Angoi nuabbit kai bela ka Misir? Taleu pa bule kumatei kai, tatogamai samba tarimeumai matei kalulut oggou?”

⁴ Iageti pusoganangan si Mose katubut Tuhan, kuanangannia, “Aponia bulat kugagalaiake katubut sangamberi sirimanua nene? Itcoat, rababajukngan le aku bukku.”

⁵ Kuanangan si Tuhan kai Mose, “Sogai kam piga pa sia sikebbukat laggai samba puenung kam simakere sambamui kamatatda bangsa nenda. Abbit kam leu et tutura sipakeinu addeat masibo'bo bagat oinan Nil.

⁶ Aile kupurio ka matamui ka uddut sara bukku sabeu ka leleu Sinai. Bo'bonungan bukku nenda, iageti bela oinan bailiunangan pulorangan sangamberi sirimanua nenda.” Galaiakenangan si Mose kisedda, airaitconia sikebbukat laggai tai Israel.

⁷ Kudduat nenda tuoniake Masa kalulut ka kudduat nenda tai Israel masisibo si Tuhan kateteret araparere, “Ai leu pa ipaalei sita si Tuhan ele ta?” Kudduat nenda leu et tuoniake Meriba kalulut ka kudduat nenda tai Israel mungunyuk.

Tai Israel masisaggangi tai Amalek

⁸ Lepa geti oi tai Amalek samba saggangirangan tai Israel ka Rafidim.

⁹ Kuanangan si Mose katubut Josua, “Pilingan piga pa sia rasaggangi tai Amalek. Mansep aile kupurio ka uddut leleu masiukkaake tutura kele sikoiniakenen Taikamanua.”

¹⁰ Galaiakenangan si Josua kele sikuat Mose katubunia. Ei si Josua masisaggangi tai Amalek. Oto si Mose, si Aron samba si Hur manatra ka uddut leleu.

¹¹ Kipa burut iakkatnake tuturania si Mose, mamanangrangan tai Israel. Tapoi ke igorosotake kabeinia si Mose mamanangrangan tai Amalek.

¹² Kele aimasaggo kabei Mose, si Aron samba si Hur masiala sara bukku kudduat Mose. Si Aron samba si Hur murio sia sara kai katciu samba sara kai kattoet Mose masitukke kabeinia bule sarat tuakkat kabei Mose teret ibele sulu.

¹³ Kalepakatnia tai Amalek kalaakenangan sia si Josua.

¹⁴ Kuanangan si Tuhan kai Mose, “Suratnake kam pagalaiat kamanangan nene bule mariuriu iturepdem. Kua katubut Josua, Kususubuake te tai Amalek.”

¹⁵ Lepa galainangan sara kudduat pasibuluat si Mose samba oniakenangannia “Tuhan le siake kaku kamanangan.”

¹⁶ Kuanangan si Mose, “Musuppa aku, si Tuhan isaggangi le geti tai Amalek teret buru-buru.”