2Mos. 16 - BUKO SIPUNENAN

Manna samba uma limendeu

¹ Lepa tuitui sangamberitda tai Israel baratda ka Elim. Samba ka gogoi sikapulu lima laggo sikarua, lepat arakaddiuake Misir barania kateteret arabela ka laggai Misir, sege sia ka matangeu Sin, sikuddu ka oggak Elim samba leleu Sinai, ka gogoi sikapulu lima laggo sikarua, barania kateteret arabela ka laggai Misir.

² Ka kudduat simatangeu nenda pungunyu'rangan sangamberitda paamian Israel katubut Mose samba kai Aron.

³ Kuarangannia, “Maeru peile imateiake kai si Tuhan ka Misir. Sedda momoi peile kupukuddu kai mukom akkula samba roti pat ektek kai. Tapoi abbitnungan kai sene bule kumatei kai sangamberimai kalulut laje.”

⁴ Kuanangan si Tuhan kai Mose, “Kineneiget Kubebeleake te komen sipususukkra kele urat ka kam sangamberimui. Senen gogoi buita nururuake kam komen nenda simemetnia addeat sangagogoi. Ka enungan nenda Kuoba masisibo paamianKu bule Kuagai mareddet leu pa sia ka sangamberi tiboietKu ele ta.

⁵ Ka gogoi sikaenem buita raruruake komen nenda rua ngaminca iginia.”

⁶ Iageti kuanangan si Mose samba si Aron ka tai Israel, “Kasoibokat nene nuagai te kam, si Tuhan te amasiammbit kam bela ka Misir.

⁷ Mansep simanseman nuitco te kam pulatsanan Tuhan, kalulut aiarepman ngunyukmui katubuNia. Aisesengan nupungunyu' kam kai Tuhan, kalulut kai nene masigalaiake siparentaakenenNia le.”

⁸ Kuanangan minca si Mose, “Iake te si Tuhan komenmui akkula kateteret kasoibokat, samba roti katetere simansep pat maektekmuian, kalulut aiarepman si Tuhan ngunyu'mui katubuNia. Kalulut ke mungunyu' kam katubumai, katubut Tuhan le anupungunyu' kam.”

⁹ Lepa geti kuanangan si Mose kai Aron, “Koiniake sia sangamberitda raei ka matat Tuhan, kalulut aiarepman ngunyu'ra.”

¹⁰ Kateteret aipeile maninibo si Aron ka tai Israel, pitcaakerangan matatda ka ipot simatangeu samba sige'ge itcorangan pulatcanan Tuhan ka tanai rusa.

¹¹ Iageti kuanangan si Tuhan katubut Mose,

¹² “Akuarepman ngunyu'ra tai Israel. Kua katubutda, kateteret kasoibokat mukokom te sita akkula, samba kateteret simansep mukokom te sia roti pat maektekrangan. Oto agairangan te geti, Aku te Tuhan, Taikamanuanda.”

¹³ Kateteret kasoibokat oi uma limendeu simakope igi bailiu tabbonangan sangaliot pusapougat nenda, samba kateteret simansep gorosot tinobut ka sangaliot bebet pusapougat.

¹⁴ Kateteret aibura tinobut, makoinongnangan ka uddut kudduat simatangeu sara simanginim, kele susru, maroime kele tinobut simakekela.

¹⁵ Kele araitconia tai Israel, ta raagai bongennia nenda. Iageti parererangan pasasambatda, “Aponia nenda?” Lepa kuanangan si Mose katubutda, “Nenda te komen siaket Tuhan katubumui.

¹⁶ Si Tuhan masikoiniake sia bule senenda raruruake simemetda, iate rua ngaliter senen sara sirimanua.”

¹⁷ Galaiakerangan kisedda tai Israel, tapoi ai sipasiruruake sisaliu rua ngaliter sara sirimanua samba ai leu sitaimaigi.

¹⁸ Kateteret arakirenia, makoinongnangan siruruake simigi, ta mulelegei, samba sipasiruruake goiso, ta leu et matata. Senenda masiruruake simemetda.

¹⁹ Kuanangan si Mose katubutda, “Taanai kasei pa masilegeiake komen nenda beri goiso pat aili simansep.”

²⁰ Tapoi ai piga pa sia ka talagatda ta aralelekngake tiboiet Mose. Arakoiri le sangarubeiat komen nenda. Mansepnia le maleitinangan samba mabutenangan komen nenda. Oto pugolunangan si Mose katubutda.

²¹ Senen simanseman ruruakerangan komen nenda siripot simemetnia, kalulut ke aitaddangan imaoloi sulu, komen sipulelegei ka polak nenda anaunangannia.

²² Ka gogoi sikaenem ruruakerangan komen nenda rua ngaminca iginia, iate epat ngaliter sara sirimanua. Sangamberi siuteake sia mei kai Mose masisegeake pagalaiat nenda.

²³ Kuanangan si Mose katubutda, “Nene te parentat Tuhan: Mansep iate gogoi puariat, gogoi Sabat, gogoi sikokoiakenen kai Tuhan. Oto roti rarangenmui, rarak kam, samba aponia noba nuseukam seumuiannia; samba sangamberi legeinia eddangan ikuddu ka kudduatnia itukoiri komen mansep.”

²⁴ Oto komen sipulelegei nenda koiriakerangannia komen mansep kele siparentaakenen Mose; komen nenda taamasiop samba ta ileleitiki.

²⁵ Kuanangan si Mose, “Nene te komenmui gogoi nene, kalulut gogoi nene iate gogoi Sabat, gogoi puariat masiabeuake si Tuhan, samba ta nusese kam geti komen nenda beri goiso ka kudduat simatangeu.

²⁶ Enem ngagogoi burunia buita nururuake kam komen, tapoi ka gogoi sikapitu iate gogoi puariat, samba taanai komen sibebele ka gogoi nenda.”

²⁷ Ka gogoi sikapitu ai piga pa tai Israel roba masiruruake komen, tapoi ta arasese apapa.

²⁸ Lepa kuanangan si Tuhan katubut Mose, “Pigamoian le ta nuoba kam masireddet tiboiet samba surukatKu?

²⁹ Repdem kam, Aku masiake katubumui sangagogoi puariat. Nenda lulunia ka gogoi sikaenem Kuake komen simemetnia addeat rua ngagogoi. Ka gogoi sikapitu senen sirimanua buita mukuddu ka lalep, samba tamomoi bela.”

³⁰ Kalulut nenda ka gogoi sikapitu puaringan.

³¹ Komen nenda oniakerangannia tai Israel manna. Putubuatnia kele luiku sigoiso mabulau samba nanamnia kele komen sigalai sikau suat mani.

³² Kuanangan si Mose, “Si Tuhan masikoiniake sita masiala rua ngaliter manna koiriakenen addeat sapunuteteuta, bule ioi raitco komen siaket Tuhan katubutta ka simatangeu, kateteret aiambit sita bela sibara ka Misir.”

³³ Kuanangan si Mose katubut Aron, “Ala sara simuko, kau ka bagania rua ngaliter manna samba galakngakenungannia ka matat Tuhan tukoiriake addeatda sapunuteteuta.”

³⁴ Iageti si Aron masigalakngake simuko nenda ka ipot Peti Pakerekat Baga bule itukoiri kele sikuat Tuhan katubut Mose.

³⁵ Manna nenda ibailiu komenda tai Israel epat pulu ngarura burunia teret arasege ka pasongan laggai Kanaan, ka kudduatda. (

³⁶ Kirekat simatukkle rapakei kateteret nenda iate simuko ka bagania ruapulu ngaliter.)