2Mos. 15 - BUKO SIPUNENAN

Urai Mose samba uraira tai Israel

¹ Iageti si Mose samba sangamberi tai Israel uraiakerangan urai nene raumun si Tuhan, “Muurai le aku kai Tuhan, kalulut kamamanang Tuhan kuro samba sipasiabbitnia kabagat koat iribbaiakeNia.

² Si Tuhan le puronanku samba uraijietku, Tuhan le sipaarau aku. Kuoba masiumunNia, Nia le Taikamanuangku, kuabeiakenia Taikamanua panindogiet taikebbukatku,

³ Simagege pasaggak te si Tuhan, oninia iate si Tuhan.

⁴ Saladdut Misir samba sangamberi keretania kabagat koat iribbaiakeniaNia. Sangamberi simagege sautet saladdunia ka koat Tiberau iloulouakenia.

⁵ Gugnangan sia koat simakeru, samba kele ibele bukku ramaloulou ka simakeru.

⁶ KabeiNu sikattoet bulat maron, oi Tuhan kabeiNu sikattoet masikalaake saggak oi Tuhan.

⁷ Ka puaabeNu sabeu subuakenungan sangamberi sisaggangi Ekeu. GoluNu mujulu kele obengan, samba labonangan sia kele singitinan.

⁸ Ulupnungan koat, puaruknangan simabuak koat, purionangan kele irip koat, bailiu oinangan ituenungi saisai bagat koat.

⁹ Ngangan saggak, “Kukukru samba kulaba geti sia, kuoppat lanjauku, samba kutataake sia. Lepa rauraukungan sangamberi bibiletda, kuparubei samba kunanam teret sege baga.”

¹⁰ Tapoi sangaminca peile iulupake engaNia si Tuhan; baraakenangan gogoi sikatai ka Misir si Tuhan. Kele toana simasane ramaloulou kabagat onun koat sabeu.

¹¹ Kasei kele Ekeu katalagat taikamanua bagei masipakereake Ekeu, oi Tuhan? kasei kele Ekeu, sipululatsat samba sipunenan oi Tuhan? Kasei momoi masigalai sangamberi galaiakenen sabeu kele Ekeu oi Tuhan? samba kasei momoi masigalaiake kiseiet kele Ekeu oi Tuhan?

¹² Totoiakenungan kabei sikattoetNu, iageti masuburangan saggak iguk sia polakNu.

¹³ Kabagat katet bagam palulunungan paamian siarauakenenNu, kalulut mariuriu Ekeu kabagat palelenganNu. Ka bagat ron sabeu Nujago sia, samba ka polakNu sipunenan Nupalulu sia.

¹⁴ Sangamberi sirimanua masiarepi, samba sia leu mugeret tubu, tai Filistin samba sautera leu mugeret tubu.

¹⁵ Kateteret nenda sautet muntogat Edom mugeret tubu, sipuute ka Moab oraknangan sia pulotokat sabeu; sangamberi sipulaggai ka Kanaan mugeret tubu.

¹⁶ Bulat maloto le sia, kalulut gegem taimaatjarangan kele bukku le sia. Kateteret ratusabau sapaamianNu, taanai geget saggak masikera, paamianNu siarauakenenNu bela sia.

¹⁷ Lepa taroakenungan Israel sapaamianNu ka kudduat sikokoiakenenNu. Pukuddurangan simariuriu ka leleuNu ka Uma sipunenan bulat sigalaiNu.

¹⁸ Ekeu te Tuhan, Rimata, sipupaparenta teret buruburu.”

Urai Miryam

¹⁹ Kateteret tai Israel masitalipoki koat, puenungrangan ka saisai koat simagarak. Tapoi kateteret sangamberi kereta pasaggakda tai Misir, kuro samba leu siambitnia tuguru' kabagat koat, galainangan si Tuhan itoili minca koat kele siboiki, bailiu maloulourangan.

²⁰ Lepa nenda si Miryam, sara nabi sinanalep, kebbut Aron, masiala kateubania, samba sangamberi tainanalep masibo'bo' kateuba ai sia mututuru'.

²¹ Puurainangan si Miryam addeatda, “Puurai kam kai Tuhan, kalulut kamamanang Tuhan Sangamberi kuro pasaggak samba siabbitnia kabagat koat iribaiakeNia.”

Oinan simapongit

²² Lepa abbitnangan si Mose tai Israel baratda ka koat Tiberau masiailiake ka simatangeu Syur. Telu ngagogoi burunia rapuenung masienungi simatangeu ta arasese oinan.

²³ Lepa sege sia ka kudduat sipuoni Mara, tapoi oinan sedda makope pongit bailiunangan tamomoi tuloo'. Lulut nenda kudduat nenda tuoniake Mara, katukolobatnia mapongit.

²⁴ Iageti pungunyukrangan sangamberi tai Israel katubut Mose samba parererangan, “Aponia talolo'?”

²⁵ Panindounangan sibulatnia si Mose katubut Tuhan, lepa patoilanangan si Tuhan katubunia sangate'te' loina. Loina nenda ribbaiakenangannia si Mose kabagat oinan, lepa oinan nenda bailiu maleu, bailiunangan momoi tuloo'. Ka kudduat nenda kaunangan si Tuhan sangamberi surukat katubutda, samba sedda leu et Tuhan masisibo sia.

²⁶ Kuanangan si Tuhan, “Reddet kam tiboieku sibulatnia, samba galaiake kam apa addeakenenKu simaeru, reddet kam sangamberi parentaKu. Ke kam masigalaiake kisedda, ta Kuukum kam ka sangamberi besi siorakngakenenKu ka tai Misir. Aku te Tuhan sialeake kam.”

²⁷ Kapplu nenda sege sia ka kudduat sipuoni Elim. Sedda ai pulurua bubuakat oinan samba pitupulu ngaloina kurma. Lepa pusapourangan ka legret oinan nenda.