2Mos. 14 - BUKO SIPUNENAN

Masitalipoki Koat Tiberau

¹ Lepa geti kuanangan si Tuhan katubut Mose,

² “Koiniake kam tai Israel ratoili minca samba musapou ka matat laggai Pi ka Hahirot, oggak laggai Migdol samba koat Tiberau, legret laggai Baal ka Zefon.

³ Oto Rimata Parao masikua pagalaiat Israel: Amapepengan sia ka lagai nene ka kudduat simatangeu.

⁴ Kubailiuake te geti Rimata Parao makela patuat bailiunangan ikukru kam. Tapoi Kupatoila le geti gegeKu katubut rimata Misir samba saladdunia, samba agairangan geti aipoi Aku te Tuhan.” Lepa galaiakerangan tai Israel kele sikuat Tuhan katubutda.

⁵ Kateteret arapaagainia katubut Rimata Parao, amutuituian tai Israel, oleinangan bagania si Parao samba siabeu tiboi tubu samba kuarangan, “Aponia atagalai nene? Angoian le atuobaake sangamberi tai Israel nenda ratuitui bailiunangan tata sapaguguletta?”

⁶ Iageti Rimata Parao masipatarek kereta pasaggak samba saladdunia.

⁷ Tuituinia pasamba sangamberi kereta pasaggaknia, samba enem ngotu kereta bulat simaeru, sisakaijitda sautet saladdunia.

⁸ Kisedda te si Tuhan aibailiuake si Parao makela patuat. Bailiunangan ikukru tai Israel. Tapoi tai Israel ijago le sia si Tuhan.

⁹ Saladdutda tai Misir pasamba sangamberi kuro, kereta samba sipasiabbitnia masikukru tai Israel, samba masiailiake sia ka pusapougatda ka bebet koat legret laggai Pi ka Hahirot.

¹⁰ Kateteret tai Israel masiitco aioi Rimata Parao samba saladdunia, bulat loto le sia samba pusogarangan kai Tuhan masitiddou paroman.

¹¹ Kuarangan katubut Mose, “Ta' leu pa tata'nia le purateiat ka Misir, bailiu ambitnungan kai ka kudduat nene? Itco pei buania sigalaiakenennu nenda!

¹² Ta pa akukuangan kai siburu ka Misir, bulat muaaili te nene! Kai masitiddou bule bui nugeugeu kai, tapoi eddangannia nuobaake kai ibailiu pagugulet ka Misir. Ta koba kai matei ka simatangeu nene, maeru peile ibailiu kai pagugulet ka Misir.”

¹³ Aleginangan si Mose, “Bui numaloto kam! Ommake kam bagamui! Nuitco te kam geti aponia galaiakenen Tuhan iarauake kam. Tai Misir siitcomui kineneiget, taan nuiitco kam sia minca.

¹⁴ Si Tuhan le pasaggak geti addeat ka kam, samba taanai nugagalai kam aponia pa.”

¹⁵ Kuanangan si Tuhan katubut Mose, “Angoian le nupugegerei masitiddou paroman? Koiniake tai Israel muenung simariuriu!

¹⁶ Akkatnake tuturanu samba totoiake ka ipot koat. Iageti rubeinangan koat samba oinangan ratalipoki saisai koat tai Israel ka simagarak.

¹⁷ Kubailiuake le geti tai Misir makela patuat bailiunangan riuriu le rakukru tai Israel, samba Aku masitoilaake gegeKu katubut Rimata Parao, saladdunia sangamberi kereta samba leu sipasiabbitnia.

¹⁸ Iageti tai Misir masiagai geti, Aku te Tuhan.”

¹⁹ Lepa malaikat Taikamanua, sikuddu siboiki ka matatda saladdut Israel, einia ka teiteira; kisedda leu et tanai rusa sipusumbulat.

²⁰ Oto tanai rusa nenda murio katalagat saladdut Misir samba saladdut Israel; samba kalulut tanai rusa nenda masibaraake gepgep, bailiu ka sanganantat soiboi ka rua mungkuat saladdu nenda tamomoi rapalegre katubu.

²¹ Lepa totoiakenangan kabeinia si Mose ka ipot koat, samba si Tuhan masigalai rusa sikalaut muboroi simakope ron bailiunangan masilanangan. Sangasoibo iburaake rusa nenda, samba koat nenda bailiu polak simagarak.

²² Koat sila rua, samba kateteret tai Israel masitalipoki koat, rapueenung ka saisai simagarak, samba koat kai kattoet samba kai katciu kelean le irip.

²³ Tai Misir pasamba sangamberi kuro, kereta pasaggak samba siapasiabbitnia riuriu le rakukru samba ratut tai Israel ka talagat koat.

²⁴ Malegere imapato, si Tuhan kabagat obengan samba tanai rusa nenda kinerenangan saladdut Misir samba masipagago sia.

²⁵ Galainangan si Tuhan ta iputumeng sangamberi rodat kereta pasaggakra, bailiu mabesinangan raei ka mata. Kuarangan tai Misir, “Si Tuhan le pasaggak addeatda tai Israel masisaggangi sita. Sita kam tatuitui sene!”

²⁶ Kuanangan si Tuhan katubut Mose, “Totoiake kabeinu ka ipot koat, bule ipatabra minca koat ramaloulou tai Misir, sangamberi kereta pasaggakra samba sangamberi sipasiambitnia.”

²⁷ Lepa totoiakenangan kabeinia si Mose ka ipot koat samba kateteret aipailaunia, toili minca koat kele siboiki. Tai Misir airabebesiake rabelaake tubutda. Tapoi si Tuhan masiloulouake tai Misir kabagat koat.

²⁸ Toili koat nenda samba masipatabboki sangamberi kereta pasaggak, sipasiambitnia, samba sangamberi saladdu Misir sipasikukukru tai Israel ka talagat koat, bailiu matei sia sangamberitda.

²⁹ Tapoi kateteret aratalipoki koat tai Israel, enungirangan saisai koat simagarak, samba koat kelean le irip kai kattoet samba kaikatsiu.

³⁰ Ka gogoi nenda si Tuhan masiarauake tai Israel ka kabeira tai Misir samba tai Israel masiitco sangamberi tubutda tai Misir simamatei tusagga ka bebet koat.

³¹ Kele araitconia tai Israel sigalai Tuhan ka gegeNia simaron masikalaake tai Misir, makiseinangan kabagatda bailiu matonemnangan bagatda katubut Tuhan samba katubut Mose, paguguletNia nenda.