2Mos. 13 - BUKO SIPUNENAN

Enungan galaiakenen pagalaiat toga sikebbukat Punen sabeu Roti sitasioman

¹ Kuanangan si Tuhan katubut Mose,

² “Panguruatnake kam sangamberi toga sikebbukat katubukKu. Sangamberi sipututumata siboiki ka tai Israel, sirimanua samba leu togat tarimeu, nenda Aku sibakkatnia.”

³ Kuanangan si Mose ka tai Israel, “Parepdem kam gogoi nene, kalulut gogoi nene te nubela kam ka laggai Misir, ka lalep paoreijat; kalulut kabagat gegeNia ambitnangan kam bela ka Misir. Kalulut nenda bui nukom kam roti sibara sioman.

⁴ Ka gogoi nene laggo Abib bela kam ka laggai Misir.

⁵ Ke aiambitnan kam si Tuhan ka laggaira tai Kanaan, tai Het, tai Amori, tai Hewi samba tai Jebus, laggai sipalelekngakenenNia kataikebbukatmui iakenia katubumui, sara laggai sipususukra susu samba suat mani, oto kau nugalaiake kam punen nene ka laggo nene leu et.

⁶ Pitu ngagogoi burunia nukom kam roti sitasioman samba ka gogoi sikapitunia buita nubaraake kam punen sabeu masiabeuake si Tuhan.

⁷ Pitu ngagogoi burunia tamomoi nukom kam roti sibara sioman. Ka sangaliot laggaimui bui ibara pasisiop samba aponia pa sibara sioman.

⁸ Ka gogoi nenda buita nupaagai kam ka tatogamui taimanteu: Punen nene iate masirepdep aponia sigalai Tuhan katubukku kateteret akubela ka laggai Misir.

⁹ Nenda buita ibailiu toggaiat ka kabeimui samba ibailiu repdemen ka bukkut utemui, bule ibara surukat Tuhan ka bibomui; kalulut kabagat gegeNia si Tuhan aiambit kam bela ka Misir.

¹⁰ Kau nugalaiake kam surukat nene siripot gogoi siteuakenen, ka senen rura.”

¹¹ Kuanangan si Mose ka tai Israel, “Iambit te geti kam si Tuhan ka laggai Kanaan sipalelekngakenenNia katubumui samba ka taikebbukatmui. Ke aibailiuan geti bakkatmui polak nenda,

¹² buita nupanguruatake kam kai Tuhan sangamberi toga simanteu sikebbukat, kisedda leu et tarimeu sipututumata siboiki. Sangamberinia nenda Tuhan le sibakkatnia.

¹³ Tapoi senen togat kalidei simanteu sipututumata siboiki buita nutebui kam pasamba sangamuneng biribiri; ele, ke ta nutebui kam, buita nubakbakngake kam lolokkatnia. Tapoi pagalaiat sirimanua, senen toga sikebbukat katalagatda tatogamui taimanteu, buita nutebui kam.

¹⁴ Ke parere tatogamui katubumui ka gogoi sibabara: Aponia katukolobatnia nenda? oto buita nukua kam katubutda: Kabagat geget Tuhan aiambit sita bela ka laggai Misir, kudduat aitupaoireiji sita.

¹⁵ Kateteret aikelaake patuatnia Rimata Parao ta aiobaake tatuitui, oto si Tuhan masimateiake senen tatoga simanteu sikebbukat ka Misir, barania tatogatda sirimanua sikebbukat pat aili togat tarimeu sikebbukat. Nenda te lulunia akubuluake katubut Tuhan tarimeu simanteu sipututumata siboiki, oto katalagat tatogakku simanteu sikebbukat tutebui.

¹⁶ Nenda buita ibailiu toggaiat ka kabeimui samba ka bukkut utemui, kalulut kabagat gegeNia si Tuhan aiambit sita bela ka laggai Misir.”

Taikamanua masipalulu paamianNia

¹⁷ Lepat aiobaake Rimata Parao ratuitui tai Israel, ta aipalulu sia Taikamanua ka enungan laggaira tai Filistin, kenanen enungan nene bulat malegre; kalulut Taikamanua masikua: “Babara iolei bagatda sirimanua nene, ke pasaggak sia, bailiu toili sia minca ka Misir.”

¹⁸ Tapoi Taikamanua masipalulu sia masienungi enungan simabokko sienungi kudduat simatangeu siei ka Koat Tiberau. Kabagat tarek tubu pasaggak pusilarangan tai Israel baratda ka Misir.

¹⁹ Si Mose masiabit sangamberi tolat Josep, aipoi kateteret ipeile muririmanua si Josep aikoiniake tai Israel musuppa masigalaiake kisedda. Kisene patonekat Josep, “Kateteret ibelaake kam Taikamanua, buita nuambit kam sangamberi tolatku sibara ka kudduat nene.”

²⁰ Kisedda te aratuituti baratda ka Sukot samba arapusapou ka Etam, kabebet kudduat simatangeu.

²¹ Si Tuhan muenung ka matatda kateteret sina'go kabagat tanai rusa sipususumbulat masipalulu sia ka enungan, samba kateteret sinoibo kabagat obengan sipununuinuijat masitoroiji sia, bailiu oinangan rapuenung sinago samba sinoibo.

²² Sanganantat gogoi tanai rusa nenda mariuriu ka matatda samba sanganantat sinoibo obengan sipununuinuijat masipaalei sia.