2Mos. 12 - BUKO SIPUNENAN

Pagalaiat Punen Kabelaiat

¹ Kuanangan si Tuhan kai Mose samba kai Aron ka laggai Misir:

² “Laggo nene ibailiu le geti laggo panandaat ka sangamberi laggo ka kam; nenda te ibailiu laggo siboiki ka kam ka senen rura.

³ Segeake kam ka sangamberi paamian Israel: ka gogoi sikapulu laggo nene, senen taimanteu buita raja'ja sangamuneng togat biribiri bule rakomnia simakere sangalalepda.

⁴ Ke ta maigi sia kabagat lalep nenda rasappruake sangamuneng togat biribiri nenda, momoi rakom togat biribiri nenda sambatda pabebeakenenda lalep. Togat biribiri nenda buita turubei siripot igit sipukokom.

⁵ Togat biribiri nenda buita simanteu, simaeru tubu, sipururura sangarura; momoi nuala kam biribiri ele kambing.

⁶ Buita nugeliake kam pat aili gogoi sikapulu epat laggo nene. Ka gogoi nenda, kasoibokatnia, sangamberi paamian Israel buita raja'ja togat biribiri nenda.

⁷ Iageti logaunia buita tuala goiso samba tulokotnake ka rua arigit samba ka taggat matatbaliu lalep kudduat pukomanda.

⁸ Akkulania buita rakom ka soibo nenda leu et; akkula sirarak buita rakom pasamba roti sitasioman samba gulei simapongit.

⁹ Bui nukom kamnia simata ele sigokgok. Togat biribiri nenda buita sirarak le ka obengan sangamberinia, utenia, rerenia samba tinanainia.

¹⁰ Bui nulegeiake kam beri goiso akkula nenda pat aili simansep; ke ai legeinia, buita tulabo pat sappru.

¹¹ Kateteret nupukom kam, kau nupuluppei kam kele simatarek masitaddaake pusilaijat, aituaakkik tengamui, sibara tarangai ka rere samba tutura ka kabeimui. Kau imaola nupukom kam, nenda te Punen Kabelaiat masiabeuake Aku, Tuhan.

¹² Kalulut ka soibo nene Kugegejengi te sangaliot laggai Misir, samba Kumamateiake senen tatoga simanteu sikebbukat, barania ka tatogat sirimanua pat aili togat tarimeu. Ukumkungan geti sangamberi bulungan ka Misir, kalulut Aku le Tuhan.

¹³ Logau ka matatbaliu lalepmui nenda ibailiu geti toggaiat lalep kudduatmui. Ke Kuitco logau nenda, sabauakekungan kam samba ta kumamateiake kam kateteret Kuukum Misir.

¹⁴ Gogoi nenda ibailiu le geti pasirepdeman ka kam. Kau imariuriu nupunenake kam gogoi nenda sibailiu punen sabeu kai Tuhan. Buita nupunenake kamnia sibailiu sara galaiakenen simariuriu teret buruburu.”

Punen roti sitasioman

¹⁵ Kuanangan si Tuhan, “Pitu ngagogoi burunia nukom kam roti sitasioman; ka gogoi siboiki leu et ribbaiakemuian senengamata pasisiop sibara ka lalepmui, aipoi senen sirimanua sikom roti sibara sioman, barania ka gogoi siboiki pat aili gogoi sikapitu, sirimanua nenda buita tumateiake.

¹⁶ Buita nubaraake kam parurukat simapunen, ka gogoi siboiki samba leu ka gogoi sikapitu nenda; tamomoi nugalai kam galajetmui; sarat sipasitatarekake komen le momoi mugalai.

¹⁷ Oto buita nupunenake kam simariuriu punen mukom roti sitasioman, kalulut ka gogoi nene leu et Kuambit le geti sangamberi saladdumui bela sibara ka laggai Misir. Oto buita nupunenake kam gogoi nene simariuriu teret buruburu; nenda te galaiakenen simariuriu teret buruburu.

¹⁸ Kom kam roti sitasioman barania gogoi sikapulu epat kasoibokat pat aili ka gogoi teret gogoi sikarua pulusara laggo siboiki nenda, kateteret kasoiboikat.

¹⁹ Pitu ngagogoi burunia nenda, bui ibara pasisiop komen ka lalepmui, kalulut senen sirimanua sikom komen sibara sioman, buita tumateiakenia kenanen siooiake ele tai Israel siturerere.

²⁰ Kenanen aponia pa sibara sioman tamomoi nukom kamnia; sarat komen sitasioman le nukom kam ka sanen kudduatmui.”

Kabelaiat siboiki

²¹ Iageti sogainangan si Mose sangamberi sikebbukat laggai Israel samba kuanangan katubutda, “Kenan kam samba ala kam sangamuneng togat biribiri addeat lalepmui samba ja'ja kam ka punen Kabelaiat.

²² Iageti alamuian sangaappra romot, sopakemuiannia ka logau togat biribiri sikuddu kabagat sara simuko nenda, samba logau nenda buita nulokotake kam ka taggat matatbaliu samba karua arigit matatbaliu; bui ibara berisara katalagamui sibebela kamatatbaliu lalepmui pat aili simansep.

²³ Kateteret igejengi si Tuhan laggai Misir imateiake sia, iitco te logau ka rua arigit matatbaliu lalepmui; oto sabauakenangan matatbaliu nenda samba ta iobaake Malaika Sipamamatei masiguruki lalepmui imateiake kam.

²⁴ Buita nugalaiake kam nene samba leu tatogamui, sibailiu surukat teret buruburu.

²⁵ Ke asegeakean bai kam ka laggai akenen Tuhan katubumui, kele siripot sikuaNia, kau imariuriu nugalaiake kam punen nene.

²⁶ Ke tatogamui rarere', ‘Apa katukolobat punen nene?’

²⁷ Buita nualegi kam, ‘Nene te buluakenen Kabelaiat addeat masisuru si Tuhan, kalulut aisabauake sangamberi lalepda tai Israel ka Misir, kateteret aimateiake sangamberi tatoga simanteu sikebbukat Misir, samba sita aiobaake murimanua!’ ” Iageti purekkukrangan sangamberi tai Israel samba manindou.

²⁸ Lepa ei sia samba galaiakerangan apa siparentaakenen Tuhan katubut Mose samba kai Aron.

Ukuman sikapulu: Sangamberi tatoga sikebbukat tumateiake

²⁹ Iageti tengamoi nenda si Tuhan masimateiake sangamberi tatoga taimanteu sikebbukat tai Misir, barania togat Rimata Parao, pat aili ka togatda sirimanua sitangsiakenen samba leu sangamberi togat tarimeu sipututumata siboiki.

³⁰ Ka soibo nenda Rimata Parao, siabeu tiboi tubu samba sangamberi tai Misir tusururangan. Ka sangaliot laggai Misir maarep geri simaron kalulut ka sangamberi lalepda tai Misir ai simamatei toga simanteu.

³¹ Iageti soibo nenda leu et, Rimata Parao masisogai si Mose samba si Aron kuanangan, “Katuitui kam sene, sangamberimui! Kaddiuake kam laggaiku! Kenan kam masipanindogi Taikamanuamui kele sinindoumui.

³² Abbit kam sangamberi jaui, biribiri samba kambingmui, kele sikuamui, tapoi tuituiake kam! Samba tiddoumuian leu et panukanan uktukku!”

³³ Tai Misir leu et masikua ka tai Israel bule raolaake masikaddiuake laggai nenda, aipoi arakua: “Babara mamatei kai sangamberimai.”

³⁴ Lepa geti tai Israel akkatakerangan simuko sibara kabaga galajet roti silepa galu sitasioman, tabutrangannia ka komak samba bairatrangannia.

³⁵ Galaiakerangan leu et tai Israel kele sikuat Mose, tiddourangan ka tai Misir mas, tembaga samba bibilet.

³⁶ Si Tuhan masibailiuake tai Misir maanggai baga katubutda tai Israel, bailiu sutakerangan sitiddoura. Kisedda te araparauraugi tai Misir.

Tai Israel masikaddiuake laggai Misir

³⁷ Iageti tuitui tai Israel musila baratda ka Raamses raei ka laggai Sukot. Taddera ele enem ngotu ribu sia taimanteu sipusisila, ta atuadde sangamberi tainanalep samba tatoga.

³⁸ Raabbit maigi jaui, biribiri samba kambing. Maigi leu et sirimanua siooiake.

³⁹ Pasirarakrangan roti sita'sioman silepa pagalu sia bitda ka Misir. Keklerangan sia ka Misir sige'ge', bailiunangan taanai oggakda masipatarek balut.

⁴⁰ Tai Israel amukuddu ka Misir epat ngotu telupulu ngarura burunia.

⁴¹ Kalepakat rura epat ngotu telupulu nenda, bela sangamberi mungkuat saladdut Tuhan ka laggai Misir.

⁴² Soibo nenda te ipujago si Tuhan, iambit tai Israel rabela ka laggai Misir. Soibo nenda leu et sangamberi tai Israel mujago, simariuriu, addeat pulatsanan Tuhan.

Surukat pagalaiat punen Kabelaiat

⁴³ Kuanangan si Tuhan katubut Mose samba kai Aron, “Nene te surukat punen Kabelaiat. Sirimanua siooiake tamomoi masikom biribiri sipanguruatakenen ka punen Kabelaiat.

⁴⁴ Tapoi pagugulet sinakimui momoi nupukom kam pasambamui, ke anusunatnan kamnia.

⁴⁵ Sirimanua siooiake ele sipugagalai tamomoi rakomnia.

⁴⁶ Sangamberi akkulat biribiri nenda buita tukom kabagat lalep, samba tamomoi tuabit ka gerat. Bui nubakbakngake kam mande sara tolatnia.

⁴⁷ Sangamberi paamian Israel buita masiabeuake punen nenda.

⁴⁸ Sirimanua sitaipususunat tamomoi mukom komen punen nenda. Ke sara sirimanua siooiake siturere katubumui ioba masipunenake Kabelaiat addeat masisuru Aku, Tuhan, sangamberi taimanteu kabagat lalepnia buita tusunat le boiki. Kapplu nenda tuaddeake le sia kele bulat tai Israel siturerere, samba momoi masitut masiabeuake punen Kabelaiat.

⁴⁹ Sara surukat galaiakenenda tai Israel siturerere samba siooiake sikuddu katalagamui.”

⁵⁰ Sangamberi tai Israel mareddet samba masigalaiake sangamberi siparentaakenen Tuhan katubut Mose samba kai Aron.

⁵¹ Ka gogoi nenda ambitnangan tai Israel si Tuhan bela ka laggai Misir.