2Mos. 10 - BUKO SIPUNENAN

Ukuman sikabalu: Sit simigi

¹ Kuanangan si Tuhan katubut Mose, “Kenan kam masiailiake si Parao, kalulut akubailiuakeannia simakela patuat kisedda leu et siabeu tiboi tubu, bule ioi Kugalaiake sangamberi pukerengan ka talagatda,

² samba bule ioi nupumumuanake katubutda sapunuteteunu kipa Akupaguileake tai Misir samba pukerengan akugalaiake katalagatda tai Misir, bule nuagai kamnia, Aku te Tuhan.”

³ Lepa si Mose samba si Aron mei masiailiake si Parao samba masikua katubunia, “Tuhan, Taikamanuanda tai Ibrani, masikua: “Pigamoian le ta numareddet katubukKu? Obaakean paamianKu, bule raei rapanindou katubukKu.

⁴ Ke nukeraake peile ratuitui sapaamianKu, iageti mansep akekungan geti sit ka laggainu.

⁵ Sangaliot uddut polak tabbonangannia geti sit simakope igi. Sangamberi legei siureman, samba sangamberi loina sitaimakakatai ka urat bukku, sappruakenangan geti nia sit.

⁶ Uma purimataatnu, sangamberi lalep siabeu tiboi tubu samba lalepda sakalaggaiatnu sun le geti sit. Pugejaat baga nene simakope katai ron bele peile siorikda taikebbukatmui.” Iageti beliuakenangan tubunia si Mose, lepa tuituinia.

⁷ Kuarangan siabeu tiboi tubu katubut Parao, “Pigamoian le teterenina ragejaake bagatta sirimanua nene? Obaakean le sangamberi tai Israel nenda raei manindou katubut Tuhan, Taikamanuanda. Ta' pei pa nuagai, laggaita nene bulat makakatai te?”

⁸ Iageti si Mose samba si Aron ambitrangan sia minca ka matat Parao. Kuanangan katubutda, “Momoi nuei kam manindou katubut Tuhan Taikamanuamui. Tapoi kasei ka talagamui sieei?”

⁹ Aleginangan si Mose, “Sangamberimai, tatoga, sibau tubu kisedda leu et simabaja'; abbitmaian geti sangamberi tatogamai taimanteu samba tainanalep, sangamberi jaui, biribiri samba kambingmai, aipoi kubaraake le kai sara punen sabeu kuabeuake kai si Tuhan.”

¹⁰ Tapoi kuanangan si Parao katubutda, “Ta' momoi kuobaake kam sangamberi tainanalep samba sangamberi tatogamui! Sitiddoumui nenda makere le nia nubesiake kam kutiddou kai Tuhan ipanukani kam. Akuagaian aile paatuatmui sikatai.

¹¹ Ta kisedda! Momoi nuei kam, tapoi sarat taimanteu, samba panindou kam katubut Tuhan, kalulut nenda te kiddiet bagamui.” Lepa tuituiakerangan si Mose samba si Aron kamatat Parao.

¹² Lepa kuanangan si Tuhan katubut Mose, “Totoiake kabeinu ka sangaliot laggai Misir. Momoi te sangamberi sit masikom sangamberi siureman sipulelegei ka lepat urat bukku.”

¹³ Lepa totoiakenangan tuturania si Mose ka laggai Misir samba baraakenangan si Tuhan rusa sikalaut iboroiji sangaliot laggai nenda, sangata'go sangasoibo. Kepei iaili simansep rusa nenda masiambit sit simigi.

¹⁴ Sit nenda simakope igi bailiu tabbonangan sangaliot laggai Misir samba tuleunangan ka sangaliot kupkumen laggai Misir. Ta'pei anai sit kele igit kisedda samba lepa nenda taan muaaili minca kele nene.

¹⁵ Sangaliot uddut polak tabbonangannia sit bailiu laggai nenda magepgepnangan. Komnangan itata sangamberi siureman ka polak samba buat kaju ka buttetnia silegeijat urat bukku nenda. Bailiu taanai sipulelegei simaeru ka loina ele sipututu'tu ka polak ka laggai Misir.

¹⁶ Iageti si Parao masisogai simaruei si Mose samba si Aron lepa kuanangan, “Aku amajongan kai Tuhan Taikamanuamui samba katubumui.

¹⁷ Appeake kam jokku sangaminca nene, samba panindou kam katubut Tuhan Taikamanuamui, bule itata katubukku ukuman sipamamatei nene.”

¹⁸ Si Mose masikaddiuake rimata samba manindou katubut Tuhan.

¹⁹ Iageti si Tuhan masisili kabaraiat rusa bailiu rusat sikaleleu simakope ron. Sangamberi sit nenda ulupakenangannia rusa samba tuabbit ka koat Tiberau. Beri sangamuneng ta'anai sipulelegei ka sangaliot polak Misir.

²⁰ Tapoi si Tuhan masibailiuake rimata makela patuat, samba ta iobaake ratuitui tai Israel mei.

Ukuman sikasiba: Gepgep masilakkup Misir

²¹ Kuanangan si Tuhan katubut Mose, “Akkatake kabeinu kapata, bule ioi gepgep ilakkup laggai Misir.”

²² Akkatnakenangan kabeinia si Mose kapata, samba telu ngagogoi burunia sangaliot polak Misir ilakkupnia gepgep.

²³ Tai Misir tamomoi raitco apapa samba burunia tetere nenda berisara sia siei kaipa pa. Tapoi ka sangamberi lalepda tai Israel ai toro.

²⁴ Lepa si Parao masisogai si Mose samba masikua, “Momoi nuei kam manindou katubut Tuhanmui. Sangamberi tainanalep samba sangamberi tatoga momoi raoi. Tapoi jaui, biribiri, samba kambingmui tamomoi tuabbit.”

²⁵ Aleginangan si Mose, “Beringan leu tuanku, buita nuake tarimeu kakai panguruatakenen buluakenenmai katubut Tuhan, Taikamanuamai.

²⁶ Samba sangamberi tarimeumai leu buita kuabbit kai, mande sangamuneng ta kulelegeiake kai. Kalulut ka tarimeu nenda le kuala kai sibailiu panguruatnakenenmai katubut Tuhan, Taikamanuami. Sedda peite agaimaiannia tarimeu kipa kupangunguruatake kai.

²⁷ Si Tuhan masibailiuake si Parao makela patuat bailiunangan taiobaakenangan ratuitui tai Israel.

²⁸ Kuanangan si Parao katubut Mose, “Katuitui ka matakku! Bui' kuitco ekeu minca! Ke kuitco minca tumateiekele ekeu.”

²⁹ Kuanangan si Mose, “Kele sikuat Tuanku, taan kuiitco ekeu minca.”