2Mos. 1 - BUKO SIPUNENAN

Tai Israel tupaoreiji ka Misir

¹ Nene te oninda tatogat Israel siei ka Misir pasamba si Jakob samba leu sangalalepda senesenenda, oninda iate:

² Ruben, Simeon, Lewi samba Jehuda,

³ Isakhar, Zebulon, Benjamin,

⁴ Dan, Naftali, Gad samba Asyer.

⁵ Muntogat Jakob nenda sangamberitda pitu pulu sia. Tapoi si Josep aiatnia mukuddu ka Misir.

⁶ Lepa geti tata' si Josep, samba sasarainania samba leu sangamberi simakere reddenannia.

⁷ Makakrarangan tai Israel samba tamomoi tuadde igitda; tuppainangan igitda, bailiunangan tobbou laggai Misir sun sarat sia.

⁸ Lepa geti sara rimata sibau sitaiagai si Josep muparenta ka Misir.

⁹ Kuanangan rimata ka siberikabaga, “Tai Israel nenda bulat maigi sia samba sia peile maigi ka sita.

¹⁰ Kau tagalaiake katubutda kabagat patuat, bule ta ituppai igitda samba, bule bara pasaggangan ta rapatadde tubutda ka saggakta rasaggangi sita, lepa kaddiuakerangan laggai nene.”

¹¹ Iageti sangamberi tai Misir masiuddetnake sipasijajago tai Israel addeat masipaokkip purimanuaiatda ka pugagalai simasane'. Kaurangan sia masigalai laggai Pitom samba Raamses kudduat pangoirikat bibilet Rimata Parao.

¹² Tapoi iapei raorei sia tai Misir, iapei ituppai igitda tai Israel, samba iapei ramakakra ka sangaliot tobbou laggai nenda, pat malotorangan tai Misir katubutda.

¹³ Lepa geti Misir makopenangan rapaoreiji simakope tai Israel,

¹⁴ samba galairangan tai Misir rapangorik simakope tai Israel, rakau sia mugalai simasane, iate masigalai batu bata samba leu senengamata galajet simasane.

¹⁵ Lepa geti rimata Misir masikau parenta katubut Sifra samba Pua, rua simatukkle masirop sangamberi tainanalep Ibrani sipususule'.

¹⁶ “Kuanangan rimata Misir, “Kateteret nuropake kam tainanalep tai Israel sipususule', repdep kam nene,” Ke toga sipututu mata nenda simanteu, mateiake kamnia! Ke toga sipututu mata nenda sinanalep, obaake kam ipurimanua.”

¹⁷ Tapoi sirua sinanalep nenda sirimanua simaloto ka Taikamanua. Ta' raoba masigalaiake parentat rimata Misir samba masiobake sangamberi toga simaruei mututu mata taimanteu murimanua.

¹⁸ Iageti rimata Misir masisogai sirua bidan nenda samba masirere' sia, “Angoi nuobaake rapurimanua tatoga taimanteu?”

¹⁹ Alegirangannia, “Tainanalep tai Israel ta kele tainanalep tai Misir. Bulat maron tubutda. Kepei mei kai amututuan matat togatda.”

²⁰ Iageti galainangan Taikamanua simaeru katubut rua sinanalep nenda; makopenangan igitda tai Israel samba memei itutuppai igitda.

²¹ Ruatda sinanalep nenda maloto sia ka Taikamanua, iageti kaunangan sia rapulalep.

²² Lepa rimata masikau parenta nene ka sangamberi taikaumania. “Senen toga simanteu tai Ibrani simaruei mututu' mata buita turibbaiake kabagat oinan Nil, tapoi sangamberi toga sinanalep momoi tuobaake murimanua.”