2Kor. 9 - BUKO SIPUNENAN

Panguruat bulagat kaunen ka Jerusalem

¹ Pagalaiat paroman ka sia sipunenan taan leu besiakenen kusuratnake nia ka kam.

² Kuagai poi obamui masirom, samba akuumunakean kam ka tai Makedonia, akukua, “Amatarekngan tai Akhaya barania ka rura silelepa pei le.” Samba ukumui nene bailiu masitubbui paatuatda simigi ka talagada.

³ Kineneiget kukoiniake sia sasaraina, bule ta siboboi uumunakeku kam ka pagalaiat nene, tapoi bule bulatnia matarek kam, kele sikuaku;

⁴ bui oi tai Makedonia kuoi kai sambamai, itcorangan tapei matarek kam, bailiu kai – bui tukua kam – maila, kalulut tonem bagamai ka tubumui.

⁵ Ia te lulunia akubesiake kutubbui sasaraina rapuboiki moi ka kam, bule rapasikeli panguruat pinalelekmui, bule imatarek, kele sibara ka anggai baga, ta kele sipaksa.

⁶ Repdep le kam nene: Sipasikakaramake goiso, goiso leu imomonei, sipasikakaramake simigi, maigi leu et imomonei.

⁷ Senen sirimanua kau le sibara ka teu bagania ipasikau, bui ka reureu baga ele sipaksa; aipoi manuntu le bagat Taikamanua ka simagora baga masikau.

⁸ Samba momoi le iuruake Taikamanua ka kam panukanan sitaimagulai, bule ka bagat sangamberinia mariuriu le ai ka kam, samba ta anai gulai ka sene ngamata galajet simaeru.

⁹ Kele sitususurat ka Surat Sipunenan, “Ipauruake, ikau ka simageba, puroipoatnia riuriu teret buruburu.”

¹⁰ Tapoi Taikamanua sitarekngake karamen ka sipangangaram samba kan komenta, nia leu masitatarekngake karamen ka kam samba masiigiake samba masitutuake buat puroipoatmui;

¹¹ bailiu makayo kam ka bagat sene ngamata anggai baga, sikau pusurakat ka Taikamanua kalulut kai.

¹² Aipoi pasikelat nuntut baga nene, ta sarat masisutnake simagulai ka sia sipunenan, tapoi samba leu masiigiake pusurakat ka Taikamanua.

¹³ Samba kalulut pakokoinongmui ukumui ka bagat pasikelat nene umunakerangan Taikamanua kalulut reddetmui masimunengake Katuareman Simaeru pagalaiat Kristus, samba anggaimui masiparubei ka sia samba ka sabagei.

¹⁴ Sia leu ratiddouake kam, samba rarepdep kam, kalulut kopet kiliu bagat Taikamanua ka kam.

¹⁵ Sura le ka Taikamanua kalulut panguruatnia sitaioi tuaddeake.