2Kor. 8 - BUKO SIPUNENAN

Pasikelat nuntut baga

¹ Sasaraina, koba kusegeake kai ka kam pagalaiat kiliu bagat Taikamanua ka sapaamian ka Makedonia.

² Talagat ai sia ka bagat pasisiboat gejat baga sabeu, kalulut sun angkat bagada, kenanen bulat mageba sia, tapoi makayo sia ka puaanggai.

³ Kumunengake nia ka matamui, bulat teret sibabara ka tubuda arakau; momoi takua, saliu pei le siripot sibabara ka tubuda. Sibara ka teu bagada,

⁴ tiddourangan simanana ka kai, bule tuobaake leu sia masitut masikau paroman ka sia sipunenan.

⁵ Saliu pei le ka sikaronimai araake, tubuda le arasegeake, boiki kai Tuhan, lepa ka kai leu, kalulut teu bagat Taikamanua.

⁶ Ia te lulunia kutubbui kai si Titus bule ikappuluake ka talagamui pasikelat nuntut baga nenda, kele sitaddaakenennia siburu.

⁷ Oto kineneiget, kele kayomui ka bagat sangamberinia, – ka putotonem baga, ka titiboat, ka puaagai, ukumui ka sangamberi galajet, punununtut bagamui ka tubumai – bule kisedda leu et kayomui ka pasikelat nuntut baga nene.

⁸ Ta leu kele parenta kukua nia, tapoi masipatoila ukura sabagei masirom le, samba masisibo linania nuntut bagamui.

⁹ Aipoi anuagaian kam kiliu bagat Tuhanta Jesus Kristus, kenanen simakayo nia, ipageba le tubunia kalulut kam, bule numakayo kam kalulut gebania.

¹⁰ Siripot pinaatuku ka pagalaiat nene, mateu le nulepaake kam nia. Kirenangan kam le amasitaddaake masigalaiake barania ka rura silelepa, samba nuteuake kam masilepaake nia.

¹¹ Oto kineneiget, riuriuake kam masilepaake; bule kele tarekmui masipaatu, kisedda leu masilepaake teret siooi ka tubumui.

¹² Aipoi ke aian obamui masikau, isisilo Taikamanua siripot sibabara ka kam nukau kam, ta siripot sitaibabara.

¹³ Ta bule sabagei musanang, kam mugeja baga, bule imakere le.

¹⁴ Ka tetere kineneiget sipulelegei ka kam masisutnake simagulai ka sia, bule sipulelegei ka sia geti masisutnake simagulai ka kam, bule imakere.

¹⁵ Kele sitususurat ka Surat Sipunenan: “Siruruake simaigi, ta mulelegei, samba siruruake goiso, ta magugulai.”

Titus samba saaleinia tukoiniake

¹⁶ Sura le ka Taikamanua, sipanguruatnake ngamang kele nene ka paatuat Titus kalulut kam.

¹⁷ Kirenangan aisilo pananakatmai, tapoi bulat kopet ngamangnia le bagei sibara ka teu bagania moi masibalou kam.

¹⁸ Tapoi masipaaleiake nia kukoiniake leu kai sarainanta simaeru katuareman ka sangamberi paamian, kalulut galajetnia ka bagat masipaarep Katuareman Simaeru.

¹⁹ Samba ta sarat nenda. Rapili leu nia sapaamian masipaalei kai ka pasikelat nuntut baga nene, sigalaiakenenmai katulatsanan Tuhan samba masipatoila tarekmai masirom.

²⁰ Aipoi bulat kupasikeli le kai, bui bara kasei pa sijoake kai ka bagat pasikelatmai masisegeake paroman sabeu nene.

²¹ Simaroipo le poi koba kugalai kai, ta sarat ka matat Tuhan, tapoi samba leu ka matat sirimanua.

²² Samba masipaaleiake sia kukoiniake leu kai minca sara sarainanta; saraina nene mareireian kusibo kai nia, matoila ngamangnia masirom. Samba kineneiget memei itutuppai ngamangnia, lulut kopet tonem bagania ka tubumui.

²³ Si Titus, aleiku mugalai te nia masipasikeli kam; saalei sabagei ia te punu tubuda sapaamian samba katulatsanan Kristus.

²⁴ Oto pakoinong kam ka tubuda ka matat paamian nuntut bagamui samba uumunakeku kam.