2Kor. 2 - BUKO SIPUNENAN

¹ Akuteuakean ka paatuatku, taan momoi aku minca ka kam ka bagat pabalogat sikau kam mureureu baga.

² Aipoi ke kupureuregi kam baga, kaseian le ipuaangkaki aku baga, ke ta nia sipurereureu baga kalulut aku?

³ Ia te ne lulunia akusuratnake surat nene ka kam, bule ke moi aku, bui kupureureu baga kalulut sia simateu masipuangkaki aku baga. Matonem poi bagaku ke maangka bagaku kam sangamberimui leu maangka bagamui.

⁴ Ka bagat reureu baga samba saggot paatuat samba pagalu elu simaigi le akusuratnake surat nene ka kam, ta masikau kam mureureu baga, tapoi bule nuagai le kam kopet nuntut bagaku ka kam.

Pasiappekat simasele

⁵ Ke bara kasei pa sibaraake pureuregat baga, ta aku aipureuregi baga, kam sangamberimui le, ele – bui makope kusosotnake nia – piga pa sia ka talagamui.

⁶ Ka sirimanua kele nene, metnangan asekat sibara ka simigi,

⁷ bailoknia appeake le kam selenia samba pusuibi kam nia, bui imaloulou ka bagat reureu baga simakope.

⁸ Ia te lulunia kutubbui kam nupatoila kam bulat manuntu bagamui ka tubunia.

⁹ Aipoi lulut nenda te akugalai surat ka kam, masisibo kam, mareddet leu pa kam ka sangamberinia.

¹⁰ Kasei poi sele nuappeake kam, kuappeake leu kaku. Aipoi ke kuappeake, – ai bai appeakenenku –, kalulut kam te kugagalaiake nia ka matat Kristus,

¹¹ bui imauktuk Sanitu ka tubuta, ataagaian poi isiatnia.

Karat baga samba arau bagat Paulus ka Troas samba ka Makedonia

¹² Kele akusege ka Troas masipaarep Katuareman Simaeru pagalaiat Kristus, aibukaakean si Tuhan kaku enungan mugalai sedda.

¹³ Tapoi ta masanang paatuatku, kalulut ta akuaili sarainangku si Titus. Kalulut nene kaddiuakekungan sia eikungan leu ka Makedonia.

¹⁴ Tapoi sura le ka Taikamanua, simariuriu masimanangake kai ka bagat Kristus, samba kalulut kai ipatoila singinnia pasiaagai nia ka senen kudduat.

¹⁵ Aipoi beu simasingin sibara ka Kristus le kai ka Taikamanua ka talagada sia siarauakenen samba ka talagada sia sieei ka pulangokat.

¹⁶ Ka sia sieei ka pulangokat beu kamateiat sipasimamateiake le kai samba ka sia siarauakenen beu purimanuaiat sipasiririmanuaake le kai. Tapoi kasei siooi masigalaiake galajet nene?

¹⁷ Aipoi kai ta makere kele maigi sirimanua sabagei sigaba puuktungan ka tiboiet Taikamanua. Tapoi kalulut sikoiniakenen Taikamanua le kai, oto ka linat paatuat le kutiboake kai nia ka matat Taikamanua ka bagat Kristus.