2Kor. 12 - BUKO SIPUNENAN

Pamoilianan Tuhan kai Paulus samba pasiitconia

¹ Buita kuumunake tubuku, kenanen ta anai lulunia, tapoi koba le kupoiliat siitcot mataku samba pamoilianan Tuhan kaku.

² Kuagai sara sirimanua tai Kristen, pulu epat ngarura situsasabau – ele ka bagat tubu, ta kuagai, ele ka ulau tubu, ta kuagai, Taikamanua le iagai nia – sirimanua nenda sinulut tuakkat nia ka sorga ka lakke sikatelu.

³ Samba kuagai leu pagalaiat sirimanua nenda, – ele ka bagat tubu, ele ka ulau tubu, ta kuagai, Taikamanua le iagai nia –

⁴ sinulut tuakkat nia ka Paradaiso, sedda iarep nganga sitaiagai tukua, samba ta momoi ratiboi nia sirimanua.

⁵ Pagalaiat sirimanua nenda te kuumunake, pagalaiat tubuku geti ta kuumunake; sarat pusaggoat le umunakenenku ka pagalaiat tubuku.

⁶ Aipoi ke kuumunake bai tubuku, taan sirimanua sitaiagai paatuat aku, aipoi sibulatnia le kutitiboi. Tapoi kuomake le, bui bara kasei pa siaddeake apa pa ka tubuku saliu ka siitcora ele ka siarepda ka tubuku.

⁷ Samba bule ta kubuakngake paatuatku kalulut pamoilianan sitaimagulai nene kaku, akenangan rui ka bagat akkulaku, ia te pagugulet Sanitu masitepa aku, bui kubuakngake paatuatku.

⁸ Ka pagalaiat nene telu ngamincaan akupanindou kai Tuhan, bule ituitui pagugulet Sanitu ka tubuku.

⁹ Ia geti kuanangan ka mataku si Tuhan, “Metnangan kekeu kiliu bagaku, aipoi ka bagat pusaggoat le imasun gegeku.” Oto maeru pei le kuumunake pusaggoatku, bule isopsop ka tubuku geget Kristus.

¹⁰ Ia te imaangka bagaku ka bagat pusaggoat, ka bagat paoreat, ka bagat gejat baga, ka bagat pangukurat, samba ka bagat puokkiman kalulut Kristus; aipoi kaipa kumasaggo, sedda kumaron.

Karat bagat Paulus pagalaiat tai Korintus

¹¹ Bulat aibailiuan aku sitaiagai paatuat; tapoi kam le aipaksa aku. Siripokatnia nuumunake le kam aku. Aipoi kenanen ta anai sibabara ka tubuku, tapoi ka bagat sangamberinia ta makala aku ka tai apostel sabeu nenda.

¹² Aipoi toggaiat puaapostelku akugalaiakean ka talagamui ka bagat sangamberi om baga, kerek samba kiseiet samba gege.

¹³ Apa poi simagulai ka kam tupakereake kam ka paamian bagei? Sarat pagalaiat nene le, ia te taibabailiuna aku pugejaat bagamui. Appeake kam seleku nene.

¹⁴ Kineneiget ia te katelu ngamincania kutarekngake tubuku moi masibalou kam, samba ta kugegejaake bagamui; ta poi bibiletmui kugagaba, tubumui le. Aipoi ta tatoga masirururuake bibilet ka saeppuda, saeppu le ka tatogada.

¹⁵ Maangka le bagaku masipanguruatnake bibiletku, beringan tubuku koba kubuluake punu tubumui. Ke kise kopenia nuntut bagaku ka tubumui, mateu pa nupagulai kam masipununtuki aku baga?

¹⁶ Kauan, anuseseakean kam taigegejaakeku bagamui. Tapoi anukua kam, kalulut patajuatku le aioi akusere kam.

¹⁷ Ai pa akukau ka talagada sikoiniakenenku ka kam masiala uktukku ka tubumui?

¹⁸ Kirenangan akukoiniake si Titus ioi samba kukoiniake sara saalei masipaaleiake nia. Ai pa aiala uktuk ka tubumui si Titus? Ta pa sisara ketsat le puririmanuamai ruamai samba sikere pugagalai?

¹⁹ Amaujungan pa nupaatu kam nia, ai le kusasakkeri kai tubumai ka matamui? Ka matat Taikamanua samba ka onin Kristus kukua kai nia: sangamberinia nene, masipaeru kam le, sasaraina kilibet baga.

²⁰ Aipoi makarat bagaku, ke moi aku kusese kam ta siripot siobat bagaku, samba aku leu nusese kam ta siripot siobat bagamui. Baleu bara pajoggolat, tutut baga, golu, alau baga, patitiboi, pakasanan, pubuangan samba pulamagat.

²¹ Makarat bagaku, ke moi aku minca, ipaeepe aku Taikamanuangku ka matamui, samba mareureu bagaku kuitco igida sigalai jo ka silelepa, tapei rabauake paatuatda ka pulolinan, puumunan samba pubotbonan sigalaiakenenda.