2Kor. 11 - BUKO SIPUNENAN

Paulus samba tai apostel sipatataju

¹ Ke moi bai nia nuromake kam taiagaiku paatuat goiso nene. Omakean le kam.

² Matutu bagaku ka tubumui, kele tutut bagat Taikamanua. Aipoi akutunanganakean kam kele sara siokko simalina kuambit kam ka sara simanteu ia te Kristus.

³ Tapoi makarat bagaku, baleu ipakatai pumumuine samba puririuriu paatuatmui ka Kristus, kele si Eba ipataju nia ulou ka sikut paatuatnia sikatai.

⁴ Aipoi oi raoi kasei pa sipaarep Jesus bagei sitaimakere ka pinaarepmai, ele masiake ka kam ketsat bagei sitaimakere ka sinilomui ka kai ele Katuareman Simaeru bagei sitaimakere ka sinilomui ka kai, tenan le kam silo.

⁵ Tapoi siripot sipaatuku, beri goiso ta anai gulaiku ka tai apostel sabeu.

⁶ Kenanen ta maagai aku manibo, ka pagalaiat puaagai geti ta leu magulai; aipoi akupatoilaan kai ka kam ka senen tetere samba ka bagat sangamberinia.

⁷ Masele pa aku, kupaepe tubuku masibuakngake kam, lulut kupaarep Katuareman Simaeru sibara ka Taikamanua si ta saki ka kam?

⁸ Akuraurauan paamian bagei kuala upa ka sia, bule ioi kupasikeli kam.

⁹ Samba ka teteret akumageba ai aku ka talagamui, ta akugejaake bagada kasei pa, aipoi simagulai kaku, raake saalei siooi sibara ka Makedonia. Ka bagat sangamberinia kujago tubuku bui ibailiu aku bairanenmui, samba riuriu sarat kisedda kugagalai.

¹⁰ Kalulut pubulanan Kristus ai ka tubuku, katuumunku nene ta iagai tutataake ka sangalio tobbou Akhaya.

¹¹ Apa lulu? Kalulut taimanuntut bagaku pa ka tubumui? Taikamanua le siagai nia.

¹² Tapoi apa sigalaiku, kisedda leu et kugagalai, masitataake paluluat ka sia sioba masigaba paluluat ituumunake sia, bule apa apa umunakenen kere le sia kele kai.

¹³ Aipoi sia nene apostel sipatataju le, sipugagalai simapajoat, sipakau tubuna apostel Kristus.

¹⁴ Ta leu tukikiseiake, Sanitu leu aipakau tubunia kele malaikat pupatokat.

¹⁵ Oto ta leu tukikiseiake, ke sapaguguletnia leu rapakau tubuda sapagugulet puroipoat. Kalepakatnia geti silorangan siripot sigalaira.

Oringen Paulus ka puaapostelnia

¹⁶ Kuoleake minca: Bui bara kasei pa siaddeake aku sitaiagai paatuat. Tapoi nuaddeake geti kam aku sitaiagai paatuat, silo kam aku sitaiagai paatuat nene kuumunake tubuku goiso.

¹⁷ Kuanenku nene, ta siripot sibara kai Tuhan kukukua nia, kele sirimanua sitaiagai paatuat le, simaro baga masiumunake tubu.

¹⁸ Kalulut maigi sia siumunake tubu siripot polak, kaku leu kuumunake tubuku.

¹⁹ Noba kam nuomake kam sitaiagai paatuat, kalulut simaagai paatuat poi kam.

²⁰ Aipoi ke rapaguguletnake kam, ke raraurau kam, ke rapaneinei kam, ke rapabuak tubuda ka tubumui, ke ralippat kam, nuomake kam.

²¹ Ai le aku mamaila kukua nia, ka pagalaiat nene bulat magulai tubumui. Tapoi ke ai sabagei simaeme masiumunake tubu, aku leu – ka putataiagai paatuat kukua nia – maeme leu aku.

²² Tai Ibrani sia? Aku leu tai Ibrani. Tai Israel sia? Aku leu tai Israel. Punuteteu Abraham sia? Aku leu punuteteu Abraham!

²³ Sapagugulet Kristus sia? – kean le te siroro kupanibo – sara pei aku! Aku pei le makope saggot tubu; mareirei ka bagat penjara; rapaboboki simakope sabau; mareirei malegere matei.

²⁴ Lima ngaminca rapaboboki aku tai Jahudi senen ngaminca epat pulu bele sara ngabobokat.

²⁵ Telu ngaminca rabobo aku sasa tai Roma, sangaminca rabaijungi aku bukku, telu ngaminca mago ka kapal, sangasoibo sangatago mutekbuk ka laut.

²⁶ Ka bagat puenungananku mareirei kuorik kalotoakenen eba samba sipasiraraurau, palotokat sibara ka bangsaku samba sibara ka bangsa bagei; kalotoakenen ka kota, ka simatangeu, ka koat samba kalotoakenen sibara ka sasaraina sipatataju.

²⁷ Mareirei musaggo tubu samba mugalai simasane; mareirei ta merep; mulaje samba muoggou; mareirei mupuaso, mulopot samba ta muleppei.

²⁸ Samba tuppai ka sangamberi nene, ai pei le sikaratnake bagaku senen gogoi, ia te masipasikeli sapaamian.

²⁹ Ke ai simasaggo, ta pa aku leu masaggo? Ke ai sibebele ka jo, ta paatuatku leu mabubu lulut reureu baga?

³⁰ Buita masiumun bai, umunakenenku geti pusaggoatku le.

³¹ Iagai le Taikamanua, Ukkui Tuhan Jesus, umunakenen teret buruburu, ta kubobokoi.

³² Ai aku ka Damaskus, koiniakenangan gubernur paneineiet rimata Aretas rajago laggaira tai Damaskus bule ralaba aku.

³³ Tapoi aragorosotnake le aku ka bagat garaga, barania ka jandela bela ka gelit laggai, belakungan leu ka kabeinia.