2Kor. 10 - BUKO SIPUNENAN

Ikolouake si Paulus galajet pasikelatnia

¹ Aku Paulus, kuanenda ai geti patutuggut mata ta maeme, tapoi ai geti paareu maeme kunganturu kam ka leppet baga samba erut bagat Kristus.

² Kutiddou ka kam; bui nukiddi kam kupakoinong emengku ke moi aku, kele pinaatuku kugalai simakela ka tubuda siaddeake kai murimanua siobat akkula.

³ Kirenangan ai pei le kai muririmanua ka polak, tapoi ta siripot polak kupasaggak kai,

⁴ aipoi pamatei pakeietmai ka pasaggangan ta pamateira taikapolak, tapoi pamatei sialei geget Taikamanua le, sibukkatnake benteng simaron.

⁵ Kuragatnake kai senen isiat paatuat sikatai samba kubukkatnake kai pubuangan paatuat sisaggangi pasiagaiat Taikamanua; samba kuappara kai sangamberi paatuat sirimanua masikau nia mureddet ka Kristus.

⁶ Samba ke amasutnan purereddetmui, amatarekngan kai masiukum sangamberi sitaimareddet.

⁷ Itco kam simatotoila ka matamui! Ke ai kasei pa bulat amaroan bagania bakkat Kristus nia, kau ipaatu leu ka paatuatnia, kai leu bakkat Kristus leu kele nia.

⁸ Aipoi ke kukopeake bai masiumunake pagalaiat gege, sipanguruatnakenen Tuhan ka kai ia te masipaeru kam, ta masipakatai, ta leu maila kai.

⁹ Tapoi ta koba ibailiu kele masiloto kam le nenda suratku.

¹⁰ Arakua poi sirimanua, “Suratnia geti si Paulus makolou samba maron, tapoi ai geti tubunia sene, saggo le samba tiboietnia ta anai baga.”

¹¹ Kau le raagai nia sipasikukua nenda, kipa tiboietmai ka surat ai kai ka sareunan, kisedda leu te kugagalai kai ke patuggut mata.

¹² Aipoi ta koba kai kuaddeake ele kupakereake kai tubumai ka tubuda siumunake tubuna. Rakireki tubuda ka kirekatda sarada samba rapakereake tubuda ka tubuda. Apate taiagaira paatuat!

¹³ Ka kai geti ta koba kai masiumunake tubumai saliu ka sinetereakenen; teret ka kudduat pugalajat sikotnakenen Taikamanua ka kai le, pat aili leu ka kam.

¹⁴ Ta akupasabau kai tetere pugalajatmai ke moi kai ka kam masipaarep Katuareman Simaeru pagalaiat Kristus, aipoi kam ai le kam ka bagat kudduat pugalajatmai.

¹⁵ Ta kuumunake kai tubumai ka galajetda sabagei ka kudduat ta ka sikotnakenen ka kai. Tapoi kukaroni kai, ke amuurauan tonem bagamui, memei malilio pugalajatmai ka talagamui siripot sikotnakenen Taikamanua ka kai.

¹⁶ Bule ioi leu kungantomanake kai Katuareman Simaeru ka laggai bagei simareunan, samba ta leu kuumunake kai buat sigalaira sabagei ka kudduat sikotnakenen ka sia.

¹⁷ “Tapoi kasei masiumunake tubu, kau le iumunake tubunia ka bagat Tuhan.”

¹⁸ Aipoi ta siumunake tubuna umunen, siumunakenen Tuhan le.