2Kor. 1 - BUKO SIPUNENAN

Salam ka paamian

¹ Sibara kai Paulus, sibailiu apostel Kristus Jesus ka teu bagat Taikamanua, samba sibara kai Timoteus sarainanta, masiailiake paamian Taikamanua ka Korintus samba sangamberi sipunenan ka sangalio Akhaya.

² Kiliu baga samba aban sibara ka Taikamanua Ukkuita samba kai Tuhan Jesus Kristus masipaalei kam.

Pusurakat Paulus ka Taikamanua kalulut aibela ka gejat baga

³ Tuumunake le Taikamanua, Ukkui Tuhanta Jesus Kristus, Ukkui sipulukatet baga samba Taikamanua bakkat sangamberi pusuibiat,

⁴ sipusuibi kai ka bagat sangamberi pugejaat bagamai, pat oinangan kupusuibi kai sia, sipasioorik sene ngamata pugejaat baga kalulut pusuibiat sisuibiakenen Taikamanua ka kai.

⁵ Aipoi kipa taimagulainia pangoringan Kristus ka tubumai, kisedda leu te taimagulainia kusilo kai pusuibiat kalulut Kristus.

⁶ Ke masiorik kai, sibailiu pusuibiat samba puaragatmui le; ke tupusuibi kai, pusuibiatmui le, sibaraake ron ka kam masiorik ka bagat om baga pangoringan kele siorikmai.

⁷ Samba maron pukakaronanmai pagalaiat kam, kuagai poi kai, kele aailina kam pugejaat bagamai, iaili leu kam ka bagat pusuibiatmai.

⁸ Aipoi koba le kai bule nuagai kam nia sasaraina, pagalaiat pugejaat baga sipuaaili ka tubumai ka Asia. Bulat makope sane, taan aiom tubumai masibairat, pat taan akurepdep kai murimanua.

⁹ Akukuangan kai ka paatuatmai, ukuman kamateiatnan le akuorik kai. Tapoi sibabara nene, bule ta kukaroni kai tubumai, tapoi Taikamanua le kukaroni kai sipasisusuruake simamatei.

¹⁰ Aibelaakean kai ka kamateiat kalotoakenen samba ka sibabara geti ibebelaake leu kai; ka tubunia le kupukaronan kai baga, nia le poi ibebelaake kai,

¹¹ kalulut kam leu masirom masitiddouake kai, bule ramaigi sirimanua sipasisusuraake panguruat pukatekat baga sinilomai lulut igit panindogatda.

Pasiliat pagalaiat puenunganan Paulus

¹² Aipoi sikau kai maangka baga nene le: bagai bagamai masimunengake, puririmanuamai ka polak nene, sara pei ka bagat pasambaatmai ka kam simasuru samba ka linat paatuat sibara ka Taikamanua le akugalaiake kai nia, ta sikut paatuat sirimanua ka ron panguruat Taikamanua le.

¹³ Aipoi siooi nubasa samba nuagai kam le akusuratnake kai ka kam. Samba kukaroni kalepakatnia agaimuian nia sipulelelek,

¹⁴ kenanen kineneiget tapei sangamberinia nuagai kam sikuamai. Bule ka gogoi kaoijanan Tuhanta Jesus kai bailiu katuumunanmui keleu kam katuumunanmai.

¹⁵ Kalulut masikatonemi nenda te akubesiake masibalou kam ka panandaatnia, bule nusilo kam panukanan rua ngaoleat.

¹⁶ Samba baraku ka kam ei ka Makedonia, samba baraku ka Makedonia oi aku minca ka kam, bule kam iromake aku ka puenungananku ka Judea.

¹⁷ Kipa, masikua aku sitaimariuriu paatuat pa akugalai isiat kele nene? Ele ka bagat masigalai isiat siobat bagaku le kugagalai, bailiu makere le “Oo” samba “Taa”?

¹⁸ Tapoi ka onin Taikamanua sipulutopit, palelenganmai ka kam ta te “Oo” samba “Taa”.

¹⁹ Aipoi Jesus Kristus, Togat Taikamanua sipaarepmai ka kam, aku samba si Silwanus samba Timoteus, ta “Oo” samba “Taa”, tapoi sarat “Oo” le ka Tubunia.

²⁰ Aipoi sangamberi palelengan Taikamanua bailiu “Oo” ka tubut Kristus. Kalulut nia leu takua kam “Amen”, katulatsanan Taikamanua.

²¹ Aipoi nia sipasiroronake kai samba kam leu ka bagat Kristus, ia te Taikamanua sipasitutulaji,

²² sipasitotoggaiji sita samba sipasiaake Ketsat Sipunenan ka paatuatta pasironta ka sangamberi sinarekngakenennia ka sita.

²³ Tapoi Taikamanua le kusogai sipasimuneng kaku – iagai poi paatuatku –, kiliu bagaku ka tubumui le tapei ipuririuriu kuoi ka Korintus.

²⁴ Ta masipaksa kam apa katonemietmui, alei sipasirorom kam ka puangkakat bagamui le; aipoi amurioan kam simaron ka bagat tonem bagamui.