2Joh. 1 - BUKO SIPUNENAN

Salam

¹ Sibara kaku paneinei paamian, masiailiake Ina sipilit Taikamanua samba tatogania bulat kanuntuat bagaku. Ta sarat aku masipununtuki kam baga, tapoi samba leu sangamberi sipasiaagai pubulanan,

² kalulut pubulanan sikuddu ka bagata, samba sipaalei sita teret buruburu.

³ Kiliu baga, anggai baga samba aban sibara ka Taikamanua Ukkui samba sibara ka Jesus Kristus, Togat Ukkui, masipaalei sita ka bagat pubulanan samba nuntut baga.

Pubulanan samba nuntut baga

⁴ Bulat magora bagaku akuagai kababarada piga pa tatogam siparaboatnake pubulanan siripot surukat sinilota sibara ka Ukkui.

⁵ Kineneiget kutiddou kekeu Ina, bule panuntu sita baga; ta parenta kusuratnake nene kekeu, tapoi siripot surukat sibabara ka sita ka panandaatnia.

⁶ Samba nene le nuntut baga, ia te bule murimanua sita siripot surukat Taikamanua. Samba surukat siarepmui ka panandaatnia ia te buita murimanua kam ka bagat nuntut baga.

⁷ Aipoi amaigingan sipasipepe muottou ka polak nene, sitaimunengake kaooi Jesus Kristus ka bagat pusirimanuaat. Sirimanua nene sipasipepe le samba saggak Kristus.

⁸ Pagaba kam, bui imalimai ka kam sigalaimai, tapoi bule nusilo kam upamui simasun.

⁹ Senen sirimanua sitaikuddu ka bagat nganturat Kristus, tapoi masipasabau le, ta ibabakkati Taikamanua. Sipukukuddu ka bagat nganturat Kristus geti, ia te masibabakkati Ukkui samba Toga.

¹⁰ Ke moi kasei pa ka kam sitaiambit nganturat nene, bui nusilo kam nia ka lalepmui samba bui nusalam kam nia.

¹¹ Aipoi kasei sipasisasalam nia, aitutnakean galajet sirimanua nenda sikatai.

Pasilepa

¹² Maigi pei leu kuanenku ka kam, tapoi taan kususuratnake nia ka karate samba tinta, tapoi kukaroni bule tubuku le moi ka kam, samba patibo sipatutuggut mata, bule imasun angkat bagata.

¹³ Salam kekeu sibara ka tatogat sarainam sipilit Taikamanua.