1Tim. 6 - BUKO SIPUNENAN

¹ Tai Kristen sibailiu pagugulet, kau raaddeake tuanda mateu tuabeuake simakope, bui rapaloloi onin Taikamanua samba nganturatta.

^2a Ke tai Kristen bai tuanda, bui rapuarak nia kalulut pasasambada Kristen; tapoi ia pei rapuuku nia sipulelelek, kalulut tuanda sipuuktungi pugagalaira saraina Kristen samba kanuntuat baga.

Nganturat simasele samba alau baga ka bulagat

^2b Gelaiake samba nganturuake sangamberinia nene.

³ Ke ai kasei pa sigelaiake nganturat bagei samba ta siripot tiboiet simaeru sibara kai Tuhanta Jesus Kristus, samba ta siripot nganturat sipasesese ka aratta,

⁴ ia te siabeuake tubu, sitaiagai apa pa. Oringenda ia te sarat masigaba paisekat samba paukele tiboiet, sibaraake sisit baga, pagolukat, pakataikat nganga, pasuksungan sikatai,

⁵ pajoggolat ka sia sitaimaeru paatuat samba si ta anai pubulanan, ka bagada poi masibaraake puuktungan le puaarat.

⁶ Kirenangan puaarat abeu uktuknia, ke ipaalei nia sanang paatuat.

⁷ Aipoi ta anai siambitta ataoi ka polak nene, kisedda leu et ta anai taaambit tatuitui.

⁸ Bara le komen samba pakeiet, iangan te tapusasanangi.

⁹ Tapoi sia sibesiake kayo bele ka pasisiboat samba sesere samba sene ngamata pubotbonan si ta galai samba sikatai, siloulouake sirimanua ka pukataikat samba pulangokat.

¹⁰ Alau baga ka bulagat poi ungat sangamberi pukataikat. Piga pa sia sialau bulagat, amapepengan sia rakaddiuake tonem bagada, oraknangan sia sene ngamata gejat baga masibesiki tubuda.

Patonekat pasilepa

¹¹ Ekeu geti sirimanuan Taikamanua, areuake tubum ka sangamberinia nenda; puroipoat le kukuruake, suru ka arat, topit, nuntut baga, om baga samba leppet baga.

¹² Patakaiake patakaiat tonem baga simaeru, lalau purimanuaiat sitaitatata; ia poi lulunia aitusogai ekeu, anumunengakean pei bagei pasimunengan simaeru ka matat maigi sipasimumuneng.

¹³ Ka matat Taikamanaua sipasikakau purimanuaiat ka sangamberinia samba ka matat Kristus Jesus simunengake pasimunengan simaeru ka matat Pontius Pilatus, kutoneake ka matam:

¹⁴ Reddet patonekat nene, sipulelelek samba si ta loloiet, teret ka teteret ipatoila tubunia Tuhanta Jesus Kristus,

¹⁵ ia te tetere sinetereakenen Taikamanua Sipulubeunan samba Sipulugege sisasara, Rimatada tai rimata samba Tuhanda tai tuan.

¹⁶ Nia sarania le sitaioi ikalaake kamateiat, sikuddu ka pato sitaioi tulegeri. Ta anai kasei pa sirimanua sipasiitco nia, ele siooi masiitco nia. Ka tubunia le katuumunan samba gege teret buruburu. Amen.

¹⁷ Nganturu sia simakayo ka polak nene, bui ramabuak paatuat, samba bui rapukaronan ka apa pa sitaimariuriu, kele pukayoat, Taikamanua le karoniet, sipasiaake ka sita sangamberinia ta anai gulai puuktungietta.

¹⁸ Kau ragalai simaeru, bule ramakayo ka galajet simaeru, bailiu simaanggai samba sioba masiparubei,

¹⁹ kisedda te raruruake pukayoat sibailiu bongen simaeru ka sia ka gogoi sibabara, rasilo purimanuaiat sipulelelek.

²⁰ Ale Timoteus, pasikeli sangamberi sinegeakenen kekeu. Katsiliake titiboat si ta galai simalolit samba pajoggolat pagalaiat kuanenda “puaagai.”

²¹ Aipoi ai piga pa sia sigelaiake nia, kalulut nene amapepengan sia ka putoneman baga. Kiliu bagat Taikamanua masipaalei kam!