1Tim. 5 - BUKO SIPUNENAN

Pasikelat ka pasasamba simatonem baga

¹ Bui nugoluki simabaja, nana le nia kele ukkui. Sibau tubu kele saraina,

² tainanalep simabaja kele ina samba tainanalep sibau tubu kele maniunu ka bagat linat paatuat.

³ Tailumang bulat sipululumang suru sia.

⁴ Tapoi ke ai togania ele punuteteunia silumang nenda, siangan te boiki tukau masigelai masipuuku saeppuda samba masisiliake simaeru sigalai eppu samba sibubuada, nene poi siobat Taikamanua.

⁵ Silumang bulat sipululumang, si ta anai sipasikeli nia, Taikamanuangan le ikakaroni samba riuriu le nia masitiddou samba manindou sinago sinoibo.

⁶ Silumang sigalai siobat tubu geti, amateian nia kenanen ai pei le nia muririmanua.

⁷ Segeake nganturat nene ka sia bule rapurimanua si ta loloiet.

⁸ Tapoi kasei pa sitaipuuku saeppunia, sara pei sikuddu ka lalepnia, aiputataan tonem bagania, saliu pei le kataira sitaimatonem baga.

⁹ Silumang suratnakenen, bui sitaiaili enem pulu ngarura bajania, sara le aipulumangake;

¹⁰ samba amaarepman gagalaina galajet simaeru, pasikatnia: masiurau tatoga, masiletsei tairauma, masibui rereda sasaraina sikere tonem baga, masirom sia sipugegeja baga samba sangamberinia galajet simaeru aigalaiakean.

¹¹ Tailumang sibau tubu geti bui nusuratnake sia. Aipoi ke aratutnakean siobat tubuda, siareuake sia ka Kristus, obarangan minca mutalimou,

¹² ia geti oraknangan sia ukum, kalulut raputata tonem bagada siboiki.

¹³ Samba minca mutairoa tubungan le ragagalai barania ka lalep sara ei ka lalep sara; samba ta sarat mutairoa tubu, tapoi samba masitiboi sabagei samba masisaila sabagei samba masitiboi sitaimateu tutiboi.

¹⁴ Ia te lulunia kuoba pei le bule tailumang sibau tubu mutalimou sia minca, bara togada, masipasikeli lalepda, bui itukau paluluat ka saggakta masipakatai oninta.

¹⁵ Aipoi aian piga pa tailumang simapepepe masitut si sanitu.

¹⁶ Tapoi ke sinanalep tai Kristen ai eppunia sipululumang, kau ipasikeli sia, buian ibailiu sia pugejaat bagat paamian, kei sarat bulat sipululumangan le iroromake paamian.

¹⁷ Sipugagalai ka paamian simalelek pugagalai, mateu tuabeuake rua ngaoleat, sara pei sia sipusasaggo tubu mungantoman samba masigelaiake.

¹⁸ Aipoi aikua Surat Sipunenan, “Bui nuratsat ngungun jaui sipamemera bera,” samba “Mateu le isilo upania sipugagalai.”

¹⁹ Bui nusilo panganduat ka tubut sipugagalai ka paamian, ke ta anai rua ele telu sipasimumuneng.

²⁰ Sia sigalai jo ase sia ka matada sapaamian bule ramaloto sabagei.

²¹ Ka matat Taikamanua samba Kristus Jesus samba samalaika sipilinia kutoneake simaron ka matam: Lelekngake nganturat nene, bui ka goat baga samba galaiake sangamberinia si ta paigganan.

²² Bui paolaola nurioake sipugagalai ka paamian, bui iaili ekeu joda sabagei. Suru tubum imalina.

²³ Bui sarat oinan nulo, tapoi lo goiso anggur kalulut balugunu samba reireinia numabesi.

²⁴ Ka sabagei, tapei atuukum amatoilaan joda; ka sabagei geti ka teiteian le imatotoila.

²⁵ Kisedda leu et sangamberi galajet simaeru matotoila le, samba kenanen ta maruei imatoila, ta leu et iagai tulipputnake.