1Tim. 4 - BUKO SIPUNENAN

Tai guru sipatataju

¹ Tapoi makolou le ikua nia Ketsat, ka tetere sikateitei, babara sirimanua sikaddiuake tonem bagania, masitut ketsat pasipepe samba nganturatda sanitu,

² sibara ka patajuatda sipaboboko, aipoi bagai bagada aian toggaiat sanitu.

³ Rakera sirimanua mutalimou, rakera masikom komen sibaraakenen Taikamanua bule ka bagat pusurakat rakom nia simatonem baga samba sipasiaagai pubulanan.

⁴ Sangamberi sibaraakenen Taikamanua maeru le, ta anai keikeiet, ke ka surat baga bai itusilo;

⁵ aipuneni poi nia tiboiet Taikamanua samba panindogat.

Pagugulet Kristus Jesus sipugagalai sipulelelek

⁶ Ke nenda bai nunganturuake ka sasarainanta, bailiunangan ekeu pagugulet Kristus Jesus sipulelelek, siparimanuaake tiboiet putoneman baga samba nganturat simaeru situtnakenennu.

⁷ Katsiliake pumumuan si ta galai, ta anai kauta nia. Ubui tubum musuru ka Taikamanua.

⁸ Olaraga putubuat goiso le uktuknia; tapoi olaraga puketsanan geti mauktuk ka sangamberinia, aipoi ai palelengannia, purimanuaiat kineneiget samba ka gogoi sialu.

⁹ Katoneman samba bulat mateu tusilo le tiboiet nene.

¹⁰ Ia te tamomomoake tubuta samba tapauukele, atakaroningan poi Taikamanua sipuririmanua, Sipaarau sangamberi sirimanua, sara pei simatonem baga.

¹¹ Segeake samba gelaiake sangamberinia nene.

¹² Bui rapaguileake ekeu kasei pa lulut bau tubum. Kau le ibailiu ekeu uluiet ka simatonem baga ka bagat titiboat, ka bagat paraboat, ka bagat nuntut baga, ka bagat tonem baga samba ka bagat linat puririmanua.

¹³ Pangenan teret kuoi, pasikeli masibasaake Surat Sipunenan, mungantoman samba masigelaiake.

¹⁴ Bui nuoreake masipakei panguruat sikuddu ka tubum, sinegeakenen kekeu ka tiboiet sinibalaakenen ka teteret ratonemake kabeira tai baja gareja ka utenu.

¹⁵ Pasikeli sangamberinia nenda, nia nuparimanuaake bule imatoila kamajuannu ka sangamberi sirimanua.

¹⁶ Jago tubum kekeu samba jago nganturatnu. Kau numariuriu ka bagat sangamberinia nenda, aipoi ke nugalaiake kisedda, maaraunungan samba leu sia sipasiaarepi ekeu.