1Tim. 3 - BUKO SIPUNENAN

Sibailiu sipugagalai ka paamian

¹ Sibulatnia le tiboiet nene, “Sirimanua sioba ibailiu sipugagalai ka paamian, galajet simaeru te ibebesiake.”

² Oto sipugagalai ka paamian buita si ta kuat tubu, simanteu sisara sinanalep, siagai masisuru tubu, simasiku paatuat, simalelek tubu, simaletsei tairauma, simaagai masipanganturu,

³ bui simasosot mulo simapuinengen, sitaimaoddoi, simaleppe baga le, simaaban, bui simaereu bulagat,

⁴ simalelek masiuteake lalepnia, sipareddet tatogania ka bagat sangamberi lelek tubu.

⁵ Ta bai iagai masiuteake lalepnia, kipa iooi ipasikeli paamian Taikamanua?

⁶ Bui simaruei pei le aipukristen, mabubuak paatuatnia, sikau nia tuukum kele Sanitu.

⁷ Buita leu simaeru katuareman ka sia sipuarat bagei, bui rapaloloi nia, isesere nia seseret Sanitu.

Sibailiu sipasirorom ka paamian

⁸ Kisedda leu sia sipasirorom ka paamian, buita simalelek tubu, bui simaigi tiboiet, bui simaereu anggur, bui simaalau baga,

⁹ sipasikeli pakeleat tonem baga le ka bagat bagai baga simalina.

¹⁰ Sia leu buita tusibo boiki, ke amakoinongan tatat kuat tubuda, ia pei turioake sia mugalai.

¹¹ Kisedda leu et tainanalepda, buita simalelek tubu, bui sioba patiboi, siagai masisuru tubu le, samba katoneman ka bagat sangamberinia.

¹² Sipasirorom buita simanteu sisara sinanalep samba simalelek masipasikeli tatogania samba lalepnia.

¹³ Aipoi sia simalelek mugalai galajet, memei tukatonemi samba memei maeeme sia masimunengake tonem bagada ka Kristus Jesus.

Paamian Taikamanua ia te bongen samba tumandei pubulanan

¹⁴ Sangamberinia kusuratnake kekeu, kenanen aikukakaroni maruei kuoi masiailiake ekeu.

¹⁵ Oto ke maburu aku, nuagaian kipa murimanua simateu ka lalep Taikamanua, ia te paamian Taikamanua sipuririmanua, arigi samba bongen pubulanan.

¹⁶ Ta anai kasei pa siooi masisakkala beunannia keleat aratta: Nia sipatoila tubunia ka putubuat sirimanua, atupatoilaan roiponia ka bagat Ketsat, aipaitcoan tubunia ka samalaika, pinaarep ka sipuarat sabulungan, arakatonemingan nia taikapolak, situaakkat ka pulatsanan.