1Tim. 2 - BUKO SIPUNENAN

Panindogat paamian

¹ Bulat siboiki kunganturuake: Bule nugalaiake masitiddou, manindou, masitiddouake samba pusurakat siaili sangamberi sirimanua;

² punu tubuda tai rimata samba sangamberi siabeu tiboi tubu, bule imarokdang samba imaeru puririmanuanta ka bagat topit samba lelek tubu.

³ Nene poi simaeru, sipasesese ka matat Taikamanua Sipaarau sita,

⁴ sibesiake bule sangamberi sirimanua tuarauake samba masisese puaagai pagalaiat pubulanan.

⁵ Sara le poi Taikamanua, sara leu sipatalaga ka Taikamanua samba sirimanua, ia te sirimanua Kristus Jesus,

⁶ sibuluake tubunia panebuira sangamberi sirimanua, ia te munengakenen ka tetere sinetereakenen.

⁷ Masimunengake nenda te aiturioake aku bailiu sipungangantoman samba apostel masigelaiake bangsa ta Jahudi ka pagalaiat tonem baga samba pubulanan. Sikuaku nene sibulatnia, ta bokoku.

⁸ Oto kalulut nene kiddiet bagaku bule kaipa kaipa ka senen kudduat taimanteu manindou masitinoake kabei simalina, si ta golu samba si ta pajoggolat.

⁹ Kisedda leu et tainanalep, bule rapalainge tubuda simateu, simasuru samba sipasesese, alai bui sinikai, bui masipakei mas ele inu ele leppei simakeppu saki.

¹⁰ Tapoi kau le ipalainge tubunia ka pasigagalai galajet simaeru, siripot simateu ka tainanalep simasuru ka Taikamanua.

¹¹ Tainanalep buita masigelai mumengmeng samba muepe paatuat.

¹² Ta kuoobaake tainanalep masigelaiake ele masipaneinei taimanteu; buita mumengmeng le sia.

¹³ Aipoi si Adam le boiki atubaraake, lepa si Eba.

¹⁴ Samba ta si Adam atupataju, sinanalep le atupataju, bailiu masipasabau parentat Taikamanua.

¹⁵ Tapoi tuaarauake leu sinanalep kalulut masitutuake matat toga, ke mariuriu nia ka bagat tonem baga, nuntut baga, pususuru ka bagat epet paatuat.