1Tes. 5 - BUKO SIPUNENAN

Mumata masingena kaoijanan Tuhan Jesus

¹ Tapoi pagalaiat tetere samba jam geti, sasaraina, taan leu tususuratnake ka kam,

² aipoi bulat anuagaian kam, gogoi Tuhan kele ioi sipananangkou sinoibo le.

³ Ke rakua bai, “Aban le samba ta anai apa pa,” lepa tulut saksaknangan sia gejat baga, kele sara sinanalep sipususuruket iorik besit pususule, bulat ta te momoi rabela.

⁴ Tapoi kam sasaraina, ta anai kam ka bagat gepgep, bui itulut kam gogoi kele ke sipananangkou;

⁵ aipoi togat pato le kam sangamberimui samba togat tago. Ta sirimanuan soibo ele sirimanuan gepgep sita.

⁶ Oto buian taperep kam kele sia sabagei, tapoi kau le tapumata samba tamasikeli.

⁷ Aipoi sia sipeperep, sinoibo le rapeperep samba sia sipupupuineng, sinoibo le rapupuineng.

⁸ Tapoi sita sirimanuan tago kau tamasikeli, muleppei laba tonem baga samba nuntut baga, samba mututu laba pukakaronan puaragat.

⁹ Aipoi ta aikau sita Taikamanua bailiu pugolukiet, masipuuktungi puaragat le, kalulut Tuhanta Jesus Kristus,

¹⁰ simamatei punu tubuta, bule ele ai sita muririmanua ele amateian sita, pasamba nia le tapurimanua.

¹¹ Oto kau nupanganturu kam pasasambamui samba pasopo pasasambamui, kele sigalaiakenenmui leu.

Nganturat pasilepa samba salam

¹² Kutiddou kai kam sasaraina, bule nuagai kam sia sipusasaggo tubu ka talagamui, sipalulu kam ka bagat Tuhan samba sipanganturu kam;

¹³ samba bule nusuru kam sia simakope ka nuntut baga kalulut galajetda. Kau nupaaban kam pasasambamui.

¹⁴ Kunana leu kai kam sasaraina, bule nunganturu kam sia sitaimalelek paraboat, pusuibi kam sia simagulai paatuat, romake kam simasaggo, omake kam bagamui ka sangamberi sirimanua.

¹⁵ Jago kam, bui ibara sisiliake katai silit katai, sarat simaeru le besiake kam nugalai kam ka pasasambamui samba ka sangamberi sirimanua.

¹⁶ Kau imariuriu angkat bagamui,

¹⁷ panindou kam simariuriu.

¹⁸ Pusura kam ka bagat sangamberinia, ia poi ne obaket Taikamanua ka bagat Kristus Jesus ka kam.

¹⁹ Bui nupeake kam Ketsat,

²⁰ samba bui nupuarak kam pamoilianan.

²¹ Sibo le kam sangamberinia samba ukkaake kam simaeru.

²² Areuake kam tubumui ka sene ngamata katai.

²³ Bule Taikamanua sipaaban sita masipuneni kam simasun samba ibujai kam sangalionia, ketsat, enga samba tubumui bailiu si ta loloiet ka kaoijanan Tuhanta Jesus Kristus.

²⁴ Katoneman le nia sipasisosogai kam, ai leu igalai nia.

²⁵ Sasaraina, tiddouake leu kam kai!

²⁶ Segeake kam salammai ka sangamberi sasaraina ka pasiggungan sipunenan.

²⁷ Ka onin Tuhan kutiddou ka kam simakope, bule nubasaake kam surat nene ka sangamberi sasaraina.

²⁸ Kiliu bagat Tuhanta Jesus Kristus, masipaalei kam.