1Tes. 4 - BUKO SIPUNENAN

Nganturat murimanua sipunenan obaket Taikamanua

¹ Pasilepania sasaraina, kutiddou samba kunganturu kai kam ka bagat Tuhan Jesus, bule nupuparaboat kam kipa sigelaiakenenmai samba siobat bagat Taikamanua. Kirenangan anugalaiakean leu kam, tapoi bule memei makope pei le nugalaiake kam nia.

² Aipoi anuagaian kam aturan apa siakemai ka kam ka onin Tuhan Jesus.

³ Nene le poi obaket Taikamanua nupusipunenan kam, ia te nuareuake kam tubumui ka puumunan,

⁴ bule senemui nuagai kam masiala kalalemanmui senemui samba mulalep simapunen samba simasuru,

⁵ bui ka botbot akkula, kele sigalaiakenenda sirimanua sitaiagai Taikamanua;

⁶ samba ka bagat nene bui ibara kasei pa sipajo samba sipataju sarainania ka bagat apa pa, aipoi si Tuhan le masisisiliake sangamberinia nene, kele sikuamai samba simunengakenenmai ka kam siboiki.

⁷ Aipoi ta murimanua simalolit aisogai sita Taikamanua, murimanua sipunenan le.

⁸ Oto kasei sitataake nene, ta sirimanua aitataake, Taikamanua le aitataake, sipasiaake leu Ketsatnia sipunenan ka kam.

⁹ Pagalaiat nuntut baga pusarainaat geti taan tususuratnake ka kam, sasaraina aipoi aipanganturungan kam Taikamanua nupanuntu kam baga pasasambamui.

¹⁰ Samba pagalaiat nene anugalaiakean leu kam ka tubuda sangamberi sasaraina ka sangalio Makedonia. Tapoi kutubbui kai kam sasaraina, bule memei makope pei le nugalaiake kam nia.

¹¹ Samba besiake kam murimanua simamengmeng, masipasikeli pasikelatna, samba mugalai masipakei kabeimui, kele sitoneakenenmai ka kam;

¹² bule rasuru kam sipuarat bagei samba ta leu mukaronan ka tubuda sabagei.

Kaoijanan Tuhan Jesus

¹³ Ia geti sasaraina, ta koba kai ta nuagai kam nia pagalaiat sia simamatei, bui imareureu bagamui, kele sia sabagei sitaipukakaronan.

¹⁴ Aipoi ke matonem bagata kamamatei Jesus samba katususurunia, matonem bagata sia simamatei ka bagat Jesus isusuruake leu sia Taikamanua pasamba nia.

¹⁵ Pagalaiat nene kusegeake kai ka matamui tiboiet Tuhanta: sita sipuririmanua, sipulelegei ka teteret kaoijanan Tuhan, ta muboboiki sita ka sia simamatei.

¹⁶ Aipoi bulat tubut Tuhanta le poi tugogorosot barania ka sorga sialei gerei, sialei ngangan utera samalaika samba pipiau Taikamanua, ia geti tusururangan boiki simamatei ka bagat Kristus;

¹⁷ lepa sita sipuririmanua sipulelegei samba sia akkat iakkatnake sita tanairusa ka goa paaili kai Tuhanta; sambata Tuhantangan le sita buruburu.

¹⁸ Oto tiboiet nene pasuibiake kam pasasambamui.