1Taw. 9 - BUKO SIPUNENAN

Sangamberi sirmanua sitotoili sibara ka kudduat katuribbaiat

¹ Sangamberi tai Israel tusuratake siripot tiboitubu muntogatda senenda. Surat oninda nenda atusuratakean ka bagat buko Rimatatda Israel. Sibailiu ukuman ka sangamberi jotda, sarakyat Jehuda tuabbit ka kudduat katuribbaiat.

² Sibara katalagatda sitotoli siboiki ka polakda ka sangamberi laggai iate sia simigi, tai imam, tai Lewi samba sia siupugagalai ka Uman Tuhan.

³ Sangarubeiat sibara ka suku Jehuda, Benjamin, Efraim samba Manasye toili samba mulaggai ka Jerusalem.

⁴ Utai togat Amihud togat Omri togat Imri togat Beni, sibara ka muntogat Peres togat Jehuda.

⁵ Samba sibara ka tai Syela iate si Asaya, toga sikebbukat, pasamba tatogania.

⁶ Sibara ka muntogat Zerah iate' si Jeuel pasamba saeppunia, enemngotu sibapulu sia.

⁷ Sibara ka suku Benjamin siuteake muntogat supulalalep iate Salu togat Mesulam punuteteu Hodawya, ninit Hasenua,

⁸ Jibnea togat Jeroham, Ela togat Uzi togat Mikhri samba Mesulam togat Sefaca togat Rehuel togat Jibnia

⁹ pasamba saepputda siripot muntogatda, siba ngotu lima pulu enem sia. Sangamberitda nenda iate ute ka lalep.

¹⁰ Tai imam sipulalagai ka Jerusalem: Jedaya, Joyarib, Jakhin,

¹¹ Azarya togat Hilkia togat Mesulam togat Zadok togat Merayot togat Ahitub, siabeu toboi tubu ka Uman Tuhan,

¹² Adaya togat Jeroham togat Pasyhur togat Malkia, samba si Masai togat Adiel togat Jahzera togat Mesulam togat Mesilemit togat Imer,

¹³ samba leu sapeputda, saute ka lalep, sangaribu pitungotu enem pulu sia, sangamberitda simaagai masigalaiake panindogat ka Uman Tuhan.

Tai Lewi sipulalaggai ka Jerusalem

¹⁴ Sibara ka tai Lewi iate si Semaya topgat Hasub togat Azrikam togat Hasabaya, sibara ka muntogat Merari,

¹⁵ si Bakbakar, Heresh, Galal samba Matanya togat Mikha togat Zkhri togat Asaf,

¹⁶ samba leu si Obaja togat Semaya togat Galal togat Jedutun samba Berekhya togat Asa togat Elkana sikukuddu ka desatda tai Netofa.

¹⁷ Sangamberi sipasijajago Uman Tuhan sipulalaggai ka Jerusalem simakere ka sangalalepda iate: Akub, Talmon, Ahiman samba Salum utera sipujajago.

¹⁸ Aili gogoi nene sangamberi sia sibara ka muntogatda tukau mugalai masijago Matatbaliu Gugugurukat Rimata ka saigit kabelaiat sulu. Siburu sangamberi sibara ka muntogatda tukau mugalai masijago sangamberi matatbaliu gugurukat simaipo ka pusapougatda tai Lewi.

¹⁹ Sikau mugalai masijago matatbaliu gugurukat ka sapou iate si Salum simakere sangamberi sia sisangamuntogat pasambania, iate muntogat Korah. (Si Salum iate togat Kore punuteteu Ebyasaf.) Siburu taikebbukatda leu et masigalaiake galajet nenda kateteret sia masipasikeli ka pusapougat Tuhan.

²⁰ Si Pinehas togat Eleazar masiuteake sia siboiki.

²¹ Si Zakharia togat Meselemya leu et iate sipasijago matatbaliu gugurukat Sapou Tuhan.

²² Sangamberi sipili addeat masijago sangamberi matatbaliu gugurukat ai ruangotu pulu rua sia. Sia tusuratake siripot sangamberi desa kudduatda mulaggai. Taikebbukatda tukau sangamberi pupasikelanan nenda si Rimata David samba nabi Samuel.

²³ Baranangan sedda sia samba paninikatda riuriu ibailiu sipasijajago mattatbaliu gugurukat Uman Tuhan.

²⁴ Ai epat matatbaliu: sara ai ka isit bare, sara ka isit kaiaman, sara ka isit kabelaiat sulu samba sara ka isit kabelekat sulu. Ka senen matatbaliu nenda tukudduake sara tai Lewi sibailiu utera sipasijajago.

²⁵ Sasaraina saepputda sipulalaggai ka sangamberi laggai masiropmake sia ka enungan sipasasaili sangaminca sangamenggui burunia ka bagat sangaminca.

²⁶ Tapoi si epat utera sipujajago nenda mugalai simariuriu. Sia sibakkat pupasikelanan sangamberi kudduat ka Uman Tuhan samba sangamberi bibilet pugalai koiriket sedda.

²⁷ Sia mukuddu ka belet Uman Tuhan, lulut sia buita masijago lalep nenda samba masibuka sangamberi matatbaliu gugurukat senen simancep.

²⁸ Sangarubeiat tai Lewi sabagei mupasikelat masipasikeli sangamberi pugalai pekeiet ka parurukat. Sia te sipasiaddenia kateteret itubelake samba kateteret tutoiliake.

²⁹ Sangarubeiat minca mupasikelat masipasikeli perabot parurukat samba sangamberi tapung, anggur, tulat zaitun, kumanyang samba leu pasingin-singin.

³⁰ Tapoi sibakkat pupasikelanan masipasikeli masipagalu pusinginan nenda iate tai imam.

³¹ Sibakkat pupasikelanan masipasikeli masigalai panguruat sirarak iate sara tai Lewi sipuoni Matica, togat Salum sikebbukat sibara ka muntogat Korah.

³² Sangamberi sia sibara ka muntogat Kehat mupasikelat masipasikeli addeat masipatarek roti tattatakenen addeat Tuhan senen gogoi Sabat.

³³ Sangarubeiat tai Lewi sabagei mugalai ibailiu sipuurai ka Uman Tuhan. Sangamberi ute mungkuat siplalalep mukuddu ka piga bili pa' ka Uman Tuhan. Ta' tukau galaietda bagei, kalulut sia mugalai sinago samba sinoibo.

³⁴ Sangamberi sia sikua ka pata iate sangamberi ute mungkuat sipulalalep tai Lewi siripot tiboitubut muntogatda. Sia iate saute sipulalaggai ka Jerusalem.

Taikebbukat samba muntogat Rimata Saul

³⁵ Si Jeiel masirioake laggai Gibeon, lepa pulagainangan sedda. Sinanalepnia sipuoni Maakha,

³⁶ samba togania simanteu, sikebbukat sipuoni Abdon, sabagei supuoni Zur, Kish, Baal, Ner, Nadab,

³⁷ Gedor, Ahyo, Zakharia samba Miklot,

³⁸ ukkui Simea. Muntogatda mulaggai ka Jerusalem sambatda sipulalalep sabagei sikere muntogat pasamba sia.

³⁹ Ukkui Rimata Saul sipuoni Kish samba sibubuania sipuoni Ner. Si Saul ai epat togania simanteu iate: Jonatan, Malkisua, Abinadab samba Esybaal.

⁴⁰ Si Jonatan ai togania simanteu sipuoni Meribaal ukkui Mikha.

⁴¹ Si Mikha ai epat togania taimanteu iate: Piton, Melekh, Tahrea samba Ahas.

⁴² Togat Ahas sipuoni Joada si ai telu toga taimanteu iate: Alemet, Azmawet samba Zimri. Tiboitubut paniikat Zimri iate Moza,

⁴³ Bina, Rafa, Elasa samba Azael.

⁴⁴ Si Azael ai enem togania taimanteu iate: Azrikam, Bokhru, Ismael, Searya, Obaja samba Hanan.