1Taw. 5 - BUKO SIPUNENAN

Muntogat Ruben

¹ Si Ruben iate sikebbukat togat Jakob. Tapoi kalulut si Ruben aipalolitan pususru' ka sara selir ukkuinia, iageti rubeiatnia sibailiun toga sikebbukat tatataake tukau katubut Josef.

² Kenanen kisedda simakope ron sibara katalagat muntogat Jakob ta sukut Josef tapoi suku Jehuda le. Sarapei aibailiu siboiki rimata sangaliot paamian Israel iate sibara ka suku Jehuda.

³ Si Ruben sikebbukat togat Jakob, ai epat sia tatogania taimanteu iate si Henokh, Palu, Hezron samba si Karmi.

⁴ Nene te patunan muntogat Jo'el: Semaya, Gog, Simei,

⁵ Mikha, Reaya, Baal,

⁶ samba si Beera. Si Beera iate ute' suku Ruben kateteret ailabania si Tiglat-Pileser rimata Asyur, samba abbitrangannia ka kudduat katuribaiat.

⁷ Kabagat tiboi tubu atusurat leu et sangamberi saitet muntogat kele kisene ka suku Ruben: Jeiel, Zakharia,

⁸ samba si Bela togat Azas, punuteteu Sema sibara ka muntogat Jo'el. Suku Ruben mukuddu ka Aroër samba ka kupkumen laggai barania saigit ka bare pat aili ka Nebo samba Baal-Meon.

⁹ Makope igi tarimeura ka kupkumen laggai Gilead. Kalulut nenda, sia masikudduiji kupkumen laggai isit ka sikalaut pat aili ka simatangeu simalio siaili bagat oinan Efrat.

¹⁰ Kateteret rimata Saul, suku Ruben masisaggangi samba masikalaake tai Hagri ka isit sikalaut Gilead, lepa kudduijirangan laggai nenda.

¹¹ Ka saigit ka bare kupkumen laggai suku Ruben kuddu suku Gad ka polak Basan aili ka Salkha ka saigit sikalaut.

¹² Sibara ka suku Gad nenda Jo'el iate taikebbukat muntogat siabeu tiboi tubu, samba si Safam iate taikebbukat muntogat sikarua. Jaenai samba si Safat iate taikebbukat sangamberi muntogat bagei ka Basan.

¹³ Sangamberi sirimanua sabagei ka suku Gad sambat kabagat sipitu muntogat sipatutut nene: Mikhael, Mesulam, Syeba, Jorai, Jakan, Ziya samba si Eber.

¹⁴ Sia muntogat Abihail togat Huri. Patunan tiboitubutda barania ka repe iei kapata iate kele nene: Abihail, Huri, Jaroah, Gilead, Mikhael, Jesisai, Jahdo, Bus.

¹⁵ Utet sangamberi muntogat nenda iate si Ahi togat Abdiel, punuteteu Guni.

¹⁶ Sia Mukuddu ka kupkumen laggai Basan samba Gilead, samba sangamberi laggai ka kupkumen nenda samba leu sangalio su'sut simaturuturu ka Saron.

¹⁷ Tiboitubu nene tugalai kateteret si Jotam rimata Jehuda, samba Jerobeam rimata Israel.

Saladdut sangamberi suku ka saigit sikalaut bagat oinan Jordan

¹⁸ Ka bagat suku Ruben, Gad samba suku Manasye ka saigit sikalaut Jordan ai epet pulu epet ribu pitungotu enem pulu saladdu silepa tugelai samba araenungingan masipakei korabbi, lanjau samba rourou.

¹⁹ Pasaggak sia masisaggangi suku Jetur, Nafis samba Nodab, iate suku kabagat bangsa Hagri.

²⁰ Sangamberi saladdu nenda matonem bagatda ka Taikamanua samba katubuNia le masitiddou paroman, iageti Taikamanua masiarepi panindogatda samba kaunangan kamanangan katubutda ka sangamberi sia tai Hagri nenda samba paaleiakenenda.

²¹ Ambitrangan tarimeura sangamberi sirimanua nenda bailiu siraurau: untania lima pulu ribunga muneng, biribiri rua ngotu lima pulunga ribu muneng samba kalidei rua ribunga muneng, samba leu sirimanua ai sia sangotu ribu.

²² Maigi sirimanua simamatei kalulut pamamatei, kalulut pasaggangan nenda iate' sibara ka Taikamanua. Lepa kudduijirangan kudduatda sangamberi sirimanua nenda teret aili teteret katuribbaiat.

²³ Sangarubeiat suku Manasye sikukuddu ka kupkumen laggai Basan aili ka bare sege Baal-Hermon, Senir samba leleu Hermon. Memei mabuburu sia memei maiigi.

²⁴ Nene te sangamberi utet muntogatda: Hefer, Jisei, Eliel, Azriel, Jeremia, Hodawya samba Jahdiel. Sangamberitda iate saladdu simagege.

Suku-suku ka isit sikalaut bagat oinan Jordan tuambit ka kudduat katuribbaiat

²⁵ Tai Israel sitaimatopit ka Taikamanua panindogiet taikebbukatda. RakaddiuakeNia samba masibuluiji sabulunganda sangamberi bangsa sikeklet Taikamanua ka tobbou laggai Kanaan.

²⁶ Kalulut nenda tubbuinangan bagat Pul rimata Asyur, iageti ei nia masisaggangi tobbou laggai nenda. Si Pul leu et tuagai sibailiu Tiglat-Pileser. Lepa suku Ruben, Gad samba suku Manasye ka saigit sikalaut Jordan tuabbit sia sibailiu tangsiakenen samba turibbaiake ka Halah, Habor, Hara sara kudduat legret bagat oinan Gozan. Sedda kuddu sia samba mulaggai aili gogoi nene.