1Taw. 4 - BUKO SIPUNENAN

Muntogat Jehuda

¹ Tatogat Jehuda iate si Peres, Hezron, Karmi, Hur samba Syobal.

² Si Syobal iate ukkui Reaya, si Reaya iate ukkui Jahat. Si Jahat ai rua sia tatogania taimanteu iate si Ahumai samba si Lahad. Sia te taikebbukatda sipulaaggai ka Zora.

³ Tatogat Etam iate si Jizreel, Isma samba si Idbas, onin maniura iate si Hazelelponi,

⁴ Pnuel, ukui Gedor, samba Ezer ukkui Husa. Iate muntogat Hur, togat Efrata sikebbukat, sirioake laggai Betlehem.

⁵ Si Asyhur sipasirioake laggai Tekoa ai rua sinanalepnia, iate si Hela samba si Naara.

⁶ Kai Naara bara epat sia tatogatda taimanteu: Ahuzam. Hefer, Temeni samba si Aetori.

⁷ Kai Hela bara telu sia taogatda taimanteu: si Zeret, Jezohar samba si Etnan.

⁸ Si Anub samba si Hazobeba iate tatogat Kos taimanteu taikebbukatda muntogat Aharhel togat Harum.

⁹ Ai sara simanteu sipuoni Jebes, nia makope peile rasuru ka sangamberi sasarainania. Inania masikau oninia Jabes kalulut inania makope aipangorik kateteret aitu'tutuake matania.

¹⁰ Tapoi si Jebus manindou ka Taikamanua panindogatda tai Israel, kuanangannia, “Oi Taikamanua, panukani le aku, samba lioake le kupkumen. Pasikeli aku samba areuake gejat baga bule bui' kupangorik.” Samba Taikamanua iarepi panindogatnia.

¹¹ Si Kelub sarainan Suha ai togania simanteu sipuoni Mehir. Togat Mehir iate si Eston,

¹² samba si Eston ai telu tatogania simanteu iate si Bet-Rafa, Paseah samba si Tehina, sipasiririoake laggai Nahas. Muntogatda nene mukuddu iate ka Reka.

¹³ Si Kenas ai rua tatogania simanteu sipuoni Otniel samba Seraya. Si Otniel leu ai rua sia tatogania taimanteu, iate si Hatat samba si Meonotai.

¹⁴ Togat Meonotai iate si Ofra. Togat Seraya iate si Joab sirioake su'su Pengrajin. Sangamberi sikuddu ka su'su nenda iate siagai mugalai.

¹⁵ Si Kaleb togat Jefune ai telu sia taogania taimanteu iate si Iru, Ela samba si Naam. Si Ela iate togat Kenas.

¹⁶ Si Jehaleleel ai epat sia tatogania taimanteu iate si Zif, Zifa, Tireya samba si Asareel.

¹⁷ Tatogat Ezra iate si Jeter, Mered, Efer samba si Jalon. Nenda te tatogat Bica, togat Firaun sinanalep sitalimouake si Mered. Sinanalep nene masitu'tutuake matat Miryam, Samai samba si Jisbah, sirioake laggai Estemoa.

¹⁸ Sinanalep Mered, sibara ka Jehuda nenda, masitutuake matat Jered, sirioake laggai Gedor, samba si Heber, sirioake laggai Sokho, samba si Jekutiel, sirioake laggai Zanoah.

¹⁹ Si Hodia mutalimou ka maniu Naham. Muntogatda iate taikebbukatda muntogat Garmi samba muntogat Maakha, Muntogat Garmi mukuddu ka laggai Kehila, samba muntogat Maakha mukuddu ka laggai Estemoa.

²⁰ Simeon ai epat sia tatogania taimanteu iate si Amnon, Rina, Benhanan samba si Tilon. Si Jisei ai rua sia tatogania taimanteu iate si Zohet samba si Ben-Zohet.

²¹ Sara katalagatda togat Jehuda sipuoni Sela. Muntogatnia iate: si Er, sirioake laggai Lekha, Lada, sirioake laggai Maresa, samba muntogat sipasigagalai komak juto simaalit baga ka laggai Bet-Asybea,

²² lepa si Jokim samba sangamberi tai Kozeba, samba si Joas samba si Saraf sikupkupake laggai Moab samba lepa geti toili sia ka Betlehem.

²³ Sangamberitda nene sipasigagalai pariok sikukuddu ka Netaim samba Gedera, mukuddu sia sedda samba mugalai katubut rimata.

Muntogat Simeon

²⁴ Tatogat Simeon iate si Nemuel, Jamin, Jarib, Zerah samba si Saul.

²⁵ Muntogat Saul iate: Salum, Mibsan, Misma.

²⁶ Muntogat Misma iate Hamuel, Zakur samba si Simei.

²⁷ Si Simei ai pulu enem sia tatogania taimanteu samba enem sia tainanalep, tapoi sasarainania ta maigi tatogatda. Muntogat Simeon ta kele igit muntogat Jehuda.

²⁸ Pat aili kateteret Rimata David, muntogat Simeon mukuddu ka laggai-laggai kele nene: Bersyeba, Molada, Hazar-Sual,

²⁹ Bilha, Ezem, Tolad,

³⁰ Betuel, Horma, Ziklag,

³¹ Bet-Markabot, Hazar-Susim, Bet-Biri samba Saaraim.

³² Sia leu et mukuddu ka lima kudduat bagei iate: Etam, Ain, Rimon, Tokhen, Asan,

³³ samba ka laggai-laggai ka bebet sangamberi kudduat nenda pat aili ka Baal. Nene te sangamberi kudduatda samba ai tiboitubutda pasasaratda.

³⁴ Si Mesobab, Jamlekh, Josa togat Amazia,

³⁵ Jo'el, Jehu togat Josibya togat Seraya togat Asiel,

³⁶ Elyo'enai, Jaakoba, Jesohaya, Asaya, Adiel, Jesimiel, Benaya,

³⁷ Ziza togat Sifei togat Alon togat Jedaya togat Simri togat Semaya.

³⁸ Sangamberitda nene iate saute ka talagat muntogatda. Muntogatra ituppai le igitda.

³⁹ Kalulut nenda ei sia ka saigit Gedor pat aili ka saigit kabelaiat sulu su'su bule ragaba su'su simaturuturu addeat biribiritda.

⁴⁰ Seserangan su'su simaturuturu, laggai nenda malio, magora' samba masanang. Siburu silaggaiji laggai nenda iate tai Ham.

⁴¹ Kateteret si Hizkia rimata Jehuda muntogat Simeon nenda mamsisaggangi Gedor. Pakatairangan sangamberi sapoura sipulalaggai ka laggai nenda samba tai Meunim, lepa keklerangan sipulalaggai sedda. Iageti pukuddurangan sedda kalulut maigi su'sunia simaturuturu addeat tarimeura.

⁴² Samba sitenga sia katalagatda, sibara ka suku Simeon, igitda lima ngotu sia, mujaujau ka leleu Seir. Sibailiu ute'ra iate si Pelaca, Nearya, Refaya samba Uziel, tatogat Jisei.

⁴³ Mateiakerangan tai Amalek sipulelegei, lepa kuddu sia sedda teret kineneiget.