1Taw. 29 - BUKO SIPUNENAN

Paroman masigalai Uman Tuhan

¹ Lepa kuanangan te Rimata David katubut sangamberi sirimanua siparuru sedda, “Sibara ka sangamberi tatogaku, si Salomo le sipilit Taikamanua. Tapoi bulat makope peile mabau tubunia samba ta'pei maigi aiagai, oto galajet nene bulat abeu. Aipei bagei tugagalai poi nenda geti ta uma purimataat addeat sirimanua, tapoi uma addeat Tuhan Taikamanua.

² Sangamberi galajet addeat uma nenda pasamba perabotnia akupaterkan ka sangamberi siooi katubukku. Akutareakean mas, perak, perunggu, laba loina, sangamberi bukku simakeppu saki samba sangamberi bukku simakirisau, sangamberi bukku simaigi ngamataat gurik addeat sangamberi pulaingean samba bulat maigi bukku pualam.

³ Sarapei kalulut nuntut bagaku ka Uman Taikamanuangku nenda akuakean leu et perak samba mas sibara ka bibilet bakkatku

⁴ mas simakope eru telungotu talenta legei, samba perak simalina iaili pitu ribu talenta addeat masilakkeki rupit Uman Tuhan,

⁵ samba addeat sangamberi galajet bulat galajetda sia simakope agai. Nah, kineneiget kaseian le minca ioba masiake panguruatnia kai Tuhan ka angkat baga?”

⁶ Iageti sia sautet muntogat, utet suku tai utet saladdu samba sipasisikeli bibilet bakkat rimata masipatoila aipoi raoba leu et masiropake.

⁷ Lepa sia leu masikau kele nene addeat galajet Uman Tuhan nenda: mas lima ribu talenta legei, perak pulu ribu talentan legei, perunggu malegre pulu balu ribu talenta, samba laba sangotu ribu talenta legei.

⁸ Sangamberi sia sibabara mamsibakkati sangamberi bukku simakirisau masikaunia katubut Jehiel bule tuguruake ka bagat pubukoat bulagat Uman Tuhan. (Jehiel iate saa tai Lewi sibara ka muntogat Gerson).

⁹ Sarakyat masikau ka angkat baga kai Tuhan samba mangka bagatda kalulut maigingan sipanguruatakenenda. Rimata David leu et bulat makope angkat baga.

Si David masiumun Taikamanua

¹⁰ Ka matatda simigi nenda Rimata David masiumun si Tuhan. Kuanangannia, “Oi Tuhan Taikamanua sipanindogit Jakob taikebbukatmai, tuumunake le Ekeu teret buruburu!

¹¹ Bulat abeu Ekeu, samba magege. Pulatsanan puririmanua angkat baga samba pubebeunan Ekeu sibakkatnia. Sangamberi apapa ka manua samba ka polak iate Ekeu sibakkatnia. Ekeu rimata sabeu, sikupkup sangamberinia.

¹² Sangamberi pukayoat samba erut puririmanua kabaraiatnia katubum, sangamberinia apapa Ekeu sibakkatnia ka ron samba pubabakkatNu, ai gegem masigalai kasei pa ibailiu sirimanua sabeu samba maron.

¹³ Kineneiget, oi Taikamanuamai, kukua kai sura katubum, samba kai masiumun onin siabeu.

¹⁴ Aku samba taikaumangku nene bulatnia ta momoi masiake apapa katubum, kalulut sangamberinia iate siakeNu samba apa siakemai nene iate Ekeu sibakkatNia leu et.

¹⁵ Nuagai, oi Tuhan, aipoi kele taikebbukatmai, kai leu et masienungi puririmanua nene sibailiu siooiake samba sirimanua sitoi. Puririmanuamai kele ailiggou situsasabau, samba ta momoi kubela kai ka kamateiat.

¹⁶ Oi Tuhan, Taikamanuamai, sangamberi bibilet simakeppu saki nene kai masiruruake sene addeat masirioake sara Uma AddeatNu bule ioi kusuru kai onin sipunenan. Tapoi sangamberinia nenda sinilomai sibara katubum le samba iate Ekeu sibakkatnia leu et.

¹⁷ Kuagai Ekeu masisilo paatuat senen sirimanua samba Nuoba sirimanua paatuatnia simalina. Ka lina samba angkat baga kupanguruatake sangamberinia nene katubum. Akulelekakean kipa paamianNu siparuru sene masiabbit panguruatda katubum ka angkat baga.

¹⁸ Oi Tuhan, Taikamanua, sipanindogit Abraham, Ishak samba Jakob, taikebbukatmai, buleu Ekeu masijago bule paamianNu mariuriu masipununtuki baga Ekeu kele kineneiget nene samba rom le bule matopit sia katubum teret buruburu.

¹⁹ Kau le katubut Salomo, togaku, sibulatnia puooba addeat masitut sangamberi parentam samba addeat masigalai uma parurukat nenda panarengannia akugalaiakean.”

²⁰ Lepat aipanindou kisedda, kuanangan si David katubut sirimanua simigi siparuru sedda, “Umun kam Tuhan Taikamanuamui!” Iageti sangamberi sirimanua nenda masiumun Tuhan Taikamanua sipanindogit taikebbukatda. Lepa rekkuk sia addeat masiabeuake si Tuhan samba si rimata.

²¹ Gogoi patuanannia ja'jarangan tarimeu addeat tupanguruatake sibailiu buluakenen kai Tuhan, lepa turubeiake ka sangamberi rakyat. Ta' sarat nenda ai sangaribu jaui simanteu, sangaribu biribiri simanteu samba sangribu biribiri simabau tubu sija'ja samba tulabo simuine ka uddut kudduat pasibuluat. Sia leu et masipanguruatake anggur galaiakenenda addeat sangamberi buluakenen nenda.

²² Gogoi nenda mukom mulo sia ka angkat baga ka matat Tuhan. Lepa addeat sikaruangamincania sia masipaagaiake si Salomo sibailiu rimata. Ka onin Tuhan, sia masiresmiakenia ibailiu rimatatda samba si Zadok ibailiu imam.

²³ Iageti sibailiu sailit David ukkuinia, si Salomo masikudduiji uddenan purimataat silepa iteuake si Tuhan. Nia rimata simauktuk samba magila sia sangamberi bangsa Israel.

²⁴ Sangamberi siabeu tiboi tubu ka puparentaat samba saladdu aili katubutda tatogat David sabagei leu et masisesekae pubebeunan Salomo sibailiu rimata.

²⁵ Galainangan si Tuhan sangamberi rakyat masikiseiake rimat Salomo samba masibailiuakenia rimata simakope seget agai kele ta'pei abara ka sangamberi rimata kepei sangaliot Israel.

²⁶ Si David togat Isai masiparenta sangaliot Israel

²⁷ epat pulu ngarura burunia. Ka Hebron pitu ngarura burut ipuparenta samba ka Jerusalem telu pulu telu ngarura.

²⁸ Makayonia samba kailaakenen samba tata'nia mabuakngan rurania. Si Salomo togania murimata masisailiakenia.

²⁹ Tiboi purimanuaiat Rimata David barania panandaat aili pangampulat atusuratakean ka bagat buko Nabi Samuel, Nabi Natan samba Nabi Gad.

³⁰ Ka bagat buko nenda tusuratake pagalaiat puparentaatnia kupkumennia samba sangamberi sipuaaili katubunia, sangaliot Israel samba sangamberi purimataat pabebeakenen Israel.