1Taw. 27 - BUKO SIPUNENAN

Sautet saladdu samba siabeu tiboi tubu bagei

¹ Pasipasisikeli puparentaat purimataat Israel ipagabania sautet sikauma, sangamberi siuteake muntogat samba sangamberi tai utet saladdu. Senen rura ka burut ta'pei anai mungkuat sipugagalai ka enungan sipasasaili iuteakenia sara ute. Senen mungkuat ai rua pulu epat ribu sia. Nene te sia saute mungkuat sipugagalai addeat senen laggo:

² Laggo siboiki: Josabam togat Zabdiel,

³ Nia sibara ka muntogat Peres suku Jehuda.

⁴ Laggo sikarua siuteake mungkuat iate Dodai, Ahohi. Siuteake mungkuatnia rua pulu epet ribu sia iate si Miklot.

⁵ Laggo sikatelu: Benanya togat imam Joyada,

⁶ ia siuteake mungkuat telu pulu saladdu, Amazabad togania iate punutubunia.

⁷ Laggo sikaepat: Asael sarainan Joab, sisailinia iate Zebaja, togania.

⁸ Laggo sikalima Samhut, paninikat Jizrah.

⁹ Laggo sikaenem: Ira togat Ikes, sibara ka laggai Tekoa.

¹⁰ Laggo sikapitu: Heles, paninikat Efraim sibara ka laggai Peloni.

¹¹ Laggo sikabalu: Sibkhai sibara ka laggai Husa, ia laddou muntogat Zerah, suku Jehuda.

¹² Laggo sikasiba: Abiezer sibara ka laggai Anatot ka kupkumen laggai suku Benjamin.

¹³ Laggo sikapulu: Maharai, paninikat Zerah sibara ka laggai Netofa.

¹⁴ Laggo sikapulusara: Benaya sibara ka laggai Piraton ka kupkumen laggai suku Efraim.

¹⁵ Laggo sikapulurua: Heldai, paninikat Otniel sibara ka laggai Netofa.

Sautet suku ka bangsa Israel

¹⁶ Nene te surat oni utet suku ka bangsa Israel: suku Ruben iate Eliezer togat Zikhri sibailiu ute, ka tai Simeon siuteake sia iate Sefaca togat Maakha,

¹⁷ suku Lewi utera iate Hasabaya togat Kemuel, ka muntogat Aron iate si Zadok.

¹⁸ Suku Jehuda utera iate si Elihu, sara katalagatda sasarainan David, ka suku Isakhar iate si Omri togat Mikhael,

¹⁹ suku Zebulon utera iate Jismaya togat Obaja, ka suku Naftali iate Jerimot togat Azriel.

²⁰ Suku Efraim utera iate Hosea togat Azazya, ka sitenga suku Manasye iate Jo'el togat Pedaya,

²¹ ka sitenga suku Manasye ka Gilead iate Jido togat Zakharia, ka suku Benjamin iate Jaasiel togat Abner.

²² Suku Dan utera iate Azareel togat Jeroham. Sia te saute suku-suku Israel.

²³ Rimata David ta aibaraake pangandeat igi ka talagat sangamberi sirimanua sipurura ka tei 20 ngarura, aipoi apalelekngan si Tuhan bulat masigalai tai Israel kele igit panyanyat ka manua.

²⁴ Si Joab togat Zeruya aitaddangan masibaraake pangandeat igi, tapoi ta aikappluake, aipoi Taikamanua masiukum tai Israel, kalulut pangandeat igi nenda. Nenda te lulunia taddera ta atusuratake ka bagat bukot Rimata David.

Sipasisikeli bibilet bakkat rimata

²⁵ Sangamberi kudduat pangoirikat ka uma purimataat samba ka Jerusalem: Asmawet togat Adiel, sangamberi kudduat pangoirikat ka lagai bagei: Jonatan togat Uzia.

²⁶ Sangamberi sipugagalai mone: Ezri togat Kelub.

²⁷ Sangamberi monen anggur: Simei sibara ka laggai Rama. Sangamberi kudduat pangoirikat anggur: Zabdi sibara ka laggai Syifmi.

²⁸ Loinat zaitun samba loinat sileu ka su'sut leleu isit kabelekat sulu Baal-Hanan sibara ka laggai Gederi. Sangamberi kudduat pangoirikat tulat zaitun: Joas.

²⁹ Tarimeu ka su'sut Saron: Sitrai sibara ka laggai Saron. Tarimeu ka sangamberi su'su: Safat togat Adlai.

³⁰ Unta: Abil paninikat Ismael, kalidei: Jehdaya sibara ka laggai Meramot.

³¹ Biribiri samba kambing: Jazis, tai Hagri.

Sia sipangantoman si David

³² Bajat Rimata David sipuoni Jonatan, iate sara sirimanua sipangantoman simaagai samba sipusisikolah. Ia samba si Jehiel togat Hakhmoni masipasikeli sangamberi sikolah tatogat rimata.

³³ Si Ahitofel iate sipungantoman rimata, samba si Husai tai Arki, iate sipangantoman samba bulat alei rimata.

³⁴ Lepat aitata' si Ahitofel, sailinangannia si Abyatar samba si Joyada togat Benaya. Utet saladdu purimataat iate si Joab.