1Taw. 26 - BUKO SIPUNENAN

Sangamberi sipasijajgo Uman Tuhan

¹ Nene te parubeiat galajetda tai Lewi sipasijajago Uman Tuhan. Sibara ka muntogat Korah tusausau si Meselemya togat Kore sibara ka sikauma Ebyasaf.

² Ai togania pitu taimanteu sitususurat oni siripot patunan rura: si Zakharia, Jediael, Zebaja, Jatniel,

³ Elam, Johanan, Elyo'enai.

⁴ Tutnia tusausau si Obed-Edom. Ipanukaninia Taikamanua balu togania taimanteu sitususurat oni siripot patunan rura: si semaya, Jozabad, Joah, Sakhar, Netaneel,

⁵ Amiel, Isakhar samba si Peuletai.

⁶ Si Semaya sikebbukat togat Obed-Edom ai enem togania taimanteu:

⁷ si Otni, Refael, Obed, Elzabad, Elihu samba Semakhya, sangamberitda sirimanua boikiakenen kabagat muntogatda aipoi magege sia, sarapei si Elihu, samba si Semakhya.

⁸ Addeat galaiakenen pasijajago nenda muntogat Obed-Edom masikau enem pulurua sia taimanteu simagege.

⁹ Muntogat Meselemya masikau pulu balu sia simagege.

¹⁰ Sibara ka muntogat Merari tusausau si Hosa. Ai epat togania taimanteu: si Simri (ta toga sikebbukatnia, tapoi ukkuinia masirioakenia ibailiu ute),

¹¹ Hilkia, Tebalya samba Zakharia. Sangamberitda ai pulu telu sikauma Kosa sibailiu sipasijajago Uman Tuhan.

¹² Sia sipasijajago Uman Tuhan tumungkuatake siripot muntogatda. Tukau leu et sangamberi galajet ka Uman Tuhan kele tai Lewi sabagei.

¹³ Senen muntogat sia muntogat sabeu kisedda leu et muntogat sigoiso, masiala pauktungan addeat masiagai ka matatbaliu gugurukat kaipa bulat rapugagalai.

¹⁴ Si Selemya aiipo matatbaliu gugurukat ka isit kabelaiat sulu. Si Zakharia togania, sarat masiake nganturat simaeru, aiipoi matatbaliu gugurukat ka isit ka bare'.

¹⁵ Si Obed-Edom aiipo matatbaliu gugurukat ka isit ka kaiaman samba tatogania aiipo galajet masijago sangamberi kudduat pangoirikat pakeiet.

¹⁶ Si Supim samba Hosa aiipo matatbaliu gugurukat ka isit kabelekat sulu samba matatbaliu gugurukat Syalekhet sibabara sikuddu ka enungan simatatra. Galajet pasijajago tupasikeli kele kisene bailiunangan sarat aile sipasijajago ka matatbaliu gugurukat.

¹⁷ Senen gogoi ka isit kabelaiat sulu ai enem sipasijajago ka isit ka bare epat samba ka isit ka kaiaman epat. Sangamberi kudduat pangoirikat pakeiet tujago epat sia leu et: rua sia addeat senen kudduat pangoirikat.

¹⁸ Ka pavilyun ka isit kabelekat sulu tugalakake epat sipasijajago ka enungan samba rua sipasijajago bulat ka pavilyun.

¹⁹ Kisedda te parubeiat galajet pasijajago ka muntogat Korah samba muntogat Merari.

Sangamberi galajet bagei ka Uman Tuhan

²⁰ Sangamberi sirimanua sabagei ka suku Lewi tukau masipuuku sangamberi bibilet Uman Tuhan samba sangamberi kudduat pangoirikat kudduat pangoirikat sangamberi siake addeat Taikamanua.

²¹ Si Ladan iate sara togat Gerson simateu, piga pa mungkuat muntogat sibara ka tatogania, muntogat Jehiel togania leu et.

²² Sangamberi togat Jehiel, iate si Zetam samba si Jo'el, tukau masipasikeli sangamberi kudduat pangoirikat samba pubulaganan Uman Tuhan.

²³ Sapunuteteu Amram, Jizhar, Hebron samba Uziel leu et masisilo rubeiat galaiakenen.

²⁴ Si Sebuel sibara ka muntogat Gerson, togat Mose, iate ute masipasikeli bibilet Uman Tuhan.

²⁵ Ai tuppai pueppuatnia pasamba si Selomit sibara kai Eliezer sara inan Gersom. Tiboi tubu paninikat Eliezer sege kai Selomit.

²⁶ Si selomit samba saraina saeppunia masipasikeli sangamberi siake sipanguruatakenennia Rimata David, sia sautet uma, sautet muntigat samba sia tai utet saladdu simabuak.

²⁷ Sangamberi siake nenda iate sangarubeiat bibilet siraurau sialara ka pasaggangan samba sipanguruatakenenda addeat tupakei sarat ka bagat Uman Tuhan.

²⁸ Tete'nia, si Selomit samba sikaumania masipasikeli sangamberi apapa silepa tusegeake addeat tupakei sarat ka bagat Uman Tuhan, samba sangamberi panguruat sibara kai nabi Samuel silepa isegeake Rimata Saul, si Abner togat Ner, samba si Joab togat Zeruya.

Sangamberi galajetda tai Lewi sabagei

²⁹ Sapunuteteu Jizhar, iate si Kenanya samba leu tatogania, tukau galaiet pubukoat negara samba sangamberi galajet sipasiukum ka Israel.

³⁰ Sangamberi pasipasisikeli puaarat samba pasipasisikeli pupaparenta ka Israel rubeiat ka belekat sulu bagat oinan Jordan tusegeake kai Hasabya, samba katubut sangaribu pitungotu sia saeppu sasarainania: sangamberitda sirimanua simagege sapunuteteu Hebron.

³¹ Siuteake sapunuteteu Hebron iate si Jeria. Ka rura sikaepat pulu puparentaat Rimata David tubaraake pasilelekake pagalaiat sapunuteteu Hebron. Kabagat pasilelelekake nenda matoila ka talagatda ai sangamberi prajurit simagege sikuddu ka Jaser ka bagat kupkumen Gilead.

³² Sangamberi pasipasisikeli puaarat samba pupaparenta ka Israel ka isit kabelaiat sulu bagat oinan Jordan iate kupkumen pasikeliet suku Ruben samba sangarubeiat suku Manasye tusegeake katubut Ruangaribu pitungotu sia utet sikauman Jeria, sangamberitda sirimanua simagege sipilinia Rimata David.