1Taw. 23 - BUKO SIPUNENAN

¹ Kele aimakope baja' si David rioakenangan si Salomo ibailiu rimata ka Israel.

Galaiakenen sibailiu puukuketda tai Lewi

² Ruruakenangan Rimata David sangamberi siuteake Israel, tai imam samba tai Lewi,

³ lepa addenangan sangamberi sia taimanteu suku Lewi si telu pulu ngarura kapata. Sangamberitda ai telu pulu bala ngaribu sia.

⁴ Lepa Rua pulu epat ngaribu sia ka talagatda ikau galaiakenen addeat masipuuku admininstrasi samba sangamberi pakaro ka pengadilan,

⁵ samba 4.000 addeat galajet sipasijajago, samba 4.000 minca addeat masiumun si Tuhan pasamba sangamberi pugalai musik silepa tutarekngake.

⁶ Rubeinangan si David tai Lewi nenda telu mungkuat masitut muntogatda, iate muntogat Gerson, Kehat samba Merari.

⁷ Si Gerson ai togania rua taimanteu: si Ladan samba si Simei.

⁸ Togat Ladan taimanteu ai telu sia: Si Jhiel, Zetam samba si Jo'el.

⁹ Sia te utet muntogat paninikat Ladan. (Selomit, Haziel samba Haran iate tatogat Simei taimanteu).

¹⁰ Togat Simei epat taimanteu siripot patunan ruratda iate: Jahat, Ziza, Jeus samba Beria.

¹¹ Paninikat Jeus samba Beria ta maigi. Oto sia tuaddeake sara muntogat.

¹² Si Kehat ai togania epat taimanteu: Amram, Jizhar, Hebron samba Uziel.

¹³ Si Amram iate ukkui Aron samba si Mose. Si aron samba sapunuteteunia addeat teret buruburu atukokoiakean masipuuku sangamberi pugalai ka parurukat masilabo kumanyang addeat Tuhan, masipasikeli si Tuhan samba masipanukani sarakyat ka onin Tuhan.

¹⁴ Togat Mose pagugulet Taikamanua nenda tuaddeake ka suku lewi.

¹⁵ Si Mose ai togania rua taimanteu, iate si Gerson samba si Eliezer.

¹⁶ Sibailiu siuteake tatogat Gerson iate si Sebuel.

¹⁷ Si Eliezer ai sara togania simanteu, oninia Rehabya. Tapoi si Rehabya ai togania makope igi.

¹⁸ Si Jizhar, togat Kehat sikarua, ai togania simanteu sipuoni Selomit, Iate utet muntogat.

¹⁹ Si Hebron togat Kehat sikatelu, ai epat togania taimanteu: sikebbukat si Jeria, tutnia Amarya, Jehaziel samba si Jakameam.

²⁰ Si Uziel, togat Kehat sikaepat, ai rua togania taimanteu: sikebbukat si Mikha samba si Jisia.

²¹ Si Merari ai rua togania taimanteu sipuoni Mahli samba si Musi. Si Mahli ai rua togania taimanteu, iate si Eleazar samba Kish,

²² tapoi si Eleazar tata' ta anai togania simanteu, sarat tatoga sinanalep siputatalimou pasamba sasaraina saepputda, iate tatogat Kish.

²³ Si Musi togat Merari sikarua, ai telu togania simaneu: si Mahli, Eder samba si Jeremot.

²⁴ Nenda oninda sangamberi paninikat Lewi sitususurat masitut onin utet muntogat samba senen-senen taikaumania. Ruratda rua pulu ngarura kapata samba ai galajetda ka Uman Tuhan.

²⁵ Kuanangan si David, “Tuhan Taikamanuan Israel aiakean erut puririmanua ka paamianNia samba tubuNia mukuddu ka Jerusalem addeat teret buruburu.

²⁶ Kalulut nenda, sapou Tuhan samba sangamberi pugalai pakeiet addeat parurukat ta'an leu tubabairat minca sia tai Lewi.”

²⁷ Sipubobongen sangamberi parentat David sikateitei, sangamberi tai Lewi, ke amururangan ruapulu ngarura, buita tusuratake addeat mugalai.

²⁸ Buita raropake tai imam sapunuteteu Aron ka bagat masigalaiake enungan galaiakenen parurukat ka Uman Tuhan, masipasikeli sangamberi pugalai samba sangamberi bilik ka Uman Tuhan nenda, samba leu masijago bule sangamberi apa silepa tukokoiake addeat Tuhan ta malololit.

²⁹ Sia leu et mupasikelat ka sangamberi kele nene: roti sipanguruatakenen kai Tuhan, kue simanimpi sita'anai sioman, buluakenen rarangen, samba tapung sigalu pasamba tulat zaitun. Buita sia leu et masikilo samba masitekong sangamberi panguruat siabbit ka Uman Tuhan.

³⁰ Sabagei buita muurai sia addeat mamsiumun si Tuhan senen simansep samba sinoibo,

³¹ kisedda leu et senen tetere ke ai buluakenen rarangen addeat Tuhan ka ipot gogoi sabat, ka ipot punen Laggo Sibau, samba ka sangamberi punen bagei. Pagalaiat taddera tai Lewi senen mugalai, atugalaian leu peraturannia. Addeat teret buruburu tai Lewi buita masigalaiake galajet nenda.

³² Tukau leu puukuketda addeat masipasikeli Sapou Tuhan samba leu Uman Tuhan samba addeat masiropake sangamberi sasarainanda, iate tai imam sapunuteteu Aron, kabagat masigalaiake parurukat ka kudduat nenda.