1Taw. 22 - BUKO SIPUNENAN

¹ Iageti kuanangan si David, “Ka kudduat nene te buita tugalai Uman Tuhan, Taikamanua. Samba ka kudduat pasibuluat nene te tai Israel buita masipanguruatake buluakenen rarangenda kai Tuhan.”

Panarengan masirioake Uman Tuhan

² Koiniakenangan Rimata David masiruruake sangamberi siooiake sikuddu ka tobbou laggai Israel, lepa kaunangan sia mugalai. Sangarubeiat sibara ka sia masipae bukku addeat masigalai Uman Tuhan.

³ Addeat mamsigalai patta samba engsel sangamberi matatbaliu gugurukat Uman Tuhan nenda, ruruakenangan si David laba simakope igi. Ia leu et masiruruake kisedda igit perunggu, bailiunangan ta'an momoi tukilo.

⁴ Sibara ka tai Tirus samba Sidon ia masipesan loina pinilok Libanon simakope igi.

⁵ Si David masigalaiake sangamberinia nenda kalulut ipaatu kisene, “Buita kupatarek apa besiakenen addeat masigalai Uman Tuhan. Lulut si Salomo togaku mabau peile tubunia samba ta'pei maigi aienungi, oto Uman Tuhan galajetnia geti nenda buita simakope beu samba malainge samba simakope imaagai ka sangaliot polak.” Iageti kepei tata' si David, patareknangannia galajet uma simakope igi.

⁶ Sogainangan si David togania si Salomo, samba masiparentaakenia addeat masirioake uma addeat Tuhan Taikamanua panindogatda paamian Israel.

⁷ Kuanangan si David kai Salomo, “Togaku, maburuan akubesiake masirioake sara uma addeat masisuru Tuhan Taikamanuangku.

⁸ Tapoi si Tuhan masikua aku poi makope reirei pasaggak samba maigi sirimanua akumateiake. Kalulut nenda Nia ta aiobaake aku masirioake umaNia.

⁹ Kenanen poi kisedda, aiakean palelenganNia nene kaku: “Babara geti sara togam sipupaparenta pasamba erut puririmanua, aipoi Aku masiroropakenia geti bailiunangan ta'anai saggak sipasisasagganginia. Tuoniake geti Salomo, lulut burut ipuparenta, Aku masikau geti erut puririmanua samba lelek pulalaggai ka sangaliot Israel.

¹⁰ Togam nenda sipasiririoake uma addeatKu geti. Bailiunangannia togaKu geti samba Aku ibailiu ukkuinia. Uddenan purimataat Israel riuriu le ka sapunuteteunia geti addeat teret buruburu.”

¹¹ Lepa kuanangan minca si David, “Kineneiget togaku, ble Tuhan Taikamanuam masiropake ekeu. Samba bule ekeu mariuriu masirioake uman Tuhan kele sipalelekNia.

¹² Samba kepei Tuhan Taikamanuam masiake katubum puaagai patuat samba kolou kabaga addeat masiparenta Israel siripot ka sangamberi surukatNia.

¹³ Ke nureddet sangamberi surukat sikau Tuhan kai Mose addeat bangsa Israel, mauktuknungan geti. Buita matonem baga samba magege ekeu. Bui' maloto masiaili apapa leu et.

¹⁴ Pagalaiat Uman Tuhan nenda sibulatnia te aku besiakean addeat masiruruake telu ngaribu epatngotu ton mas samba saliu peile telu pulu epat ngaribu perak. Nenda sabagei ai perunggu samba laba ta momoi tuadde iginia. Loina samba bukku poi akupatarekngan, tapoi ekeu buita masituppainia minca.

¹⁵ Ai maigi sipugagalainu. Ai sioi mugalai ka pasipaekat bukku, ai simaagai mugalai loina, simaagai masipaddai bukku samba sipasigagaji simakope igi,

¹⁶ siagai masigalai mas, perak, perunggu samba laba. Kauan tandangan le simaola! Bule si Tuhan masirop ekeu.”

¹⁷ Lepa koiniakenangan si David sangamberi sautet Israel masiropake si Salomo.

¹⁸ Kuanangannia, “Tuhan Taikamanuam amasiropake kam, samba masiake paabanan samba leu erut puririmanua ka sangaliot tobbou laggai. Nia masiropake aku masikalaake tai bangsa siburu mukuddu ka tobbou laggai nene. Kineneiget sia masireddet katubukku samba kai Tuhan.

¹⁹ Oto, kau leu kam masipaguguletake tubu kai Tuhan Taikamanuamui ka muinet puririmanuamui. Taddangan kam sigalai uma addeat Tuhan, bule Peti Pakerekat BagaNia samba sangamberi pugalai bagei pakeiet sikokoi addeat parurukat momoi tugalakngake sedda.”