1Taw. 21 - BUKO SIPUNENAN

Si David masibaraake pasisuranan masiagai iginia sipulalaggai

¹ Sanitu ioba masimateiake tai Israel, kalulut nenda na'nanangan si David bule ibaraake pasisuranan masiagai iginia sipulalaggai.

² Iageti kuanangan te si David kai Joab samba ka tai utet saladdu saladdunia, “Baraake kam pasisuranan masiagai iginia sipulalaggai ka sangaliot Israel aili ka sangamberi kudduat simareunannia, kalulut koba masiagai piga sangamberi taddet sarakyat Israel.”

³ Aleginangan si Joab, “Bule si Tuhan masituppaiake rakyat Israel aili sangotu ngaminca sibara ka taddera kineneiget nene. Tuan Rimata, ta'pei pa amakolou aipoi sia masireddet katubut Tuanku” Angoian le buita masibaraake pasisuranan masiagai iginia sipulalaggai? Lepa geti, kalulut puseleat nenda, kalepakatnia sangamberi tai Israel masibairat!”

⁴ Tapoi rimata riuriu iometnake parentania nenda, oto ei si Joab ka sangaliot Israel, aili ka sangamberi kudduat simareunannia, lepa geti toili ka Jerusalem,

⁵ samba masisegeake katubut rimata sigalaiakenen, ka pasisuranan masiagai iginia sipulalaggai nenda. Taddet taimanteu simateu alaket saladdu ai sangajuta sangotu sia ka Israel samba epatngotu pitu pulu ribu sia ka Jehuda.

⁶ Tapoi suku Lewi samba Benjamin ta atusuratake sia ka pasisuranan nenda. Si Joab ta aibaraake pasisuranan masiagai iginia sipulalaggai ka talagatda aipoi ta ioba masienungake parentat rimata nenda.

⁷ Taikamanua ta mangka baga ka pasisuranan masiagai iginia sipulalaggai nenda samba Nia masiukum tai Israel.

⁸ Lepa panindounangan te si David ka Taikamanua kuanangannia, “Oi Taikamanua, bulat amakopean joku! Appeake le aku, aipoi sigalaiakenenku nenda bulat taiagai patuat.”

⁹ Kuanangan si Tuhan kai Nabi Gad, sibailiu sipatalaga si David samba si Tuhan,

¹⁰ Konan le samba kua le kai David aipoi Aku masiake telu piliet katubunia. Apa le sipilinia kugagalaiake geti.”

¹¹ Lepa ei te si Gad kai David samba masisegeake patonekat Tuhan nenda, kuanangannia, “Kaipa Tuanku pili:

¹² Tobbou laggai nenda isaksak pugejaat baga pulalaje burunia telu ngarura, ele Tuanku mutuitui ikukru saggak telu ngalaggo burunia, ele sangaliot tobbou laggai nene telu ngagogoi burunia isaggangi si Tuhan pasamba lanjauNia kele besi simasappo, samba malaikaNia masiabbit kamateiat kaipa-kaipa. Teuake le kineneiget apa sibulat kusegeake kai Tuhan.”

¹³ Aleginangan si David, “Ena, matei aku! Tapoi tuukum sibara ka sirimanua, maeru peile aku iukum si Tuhan aipoi mabeunan pununtuat bagaNia.”

¹⁴ Iageti si Tuhan masibaraake besi simasappo ka tai Israel bailiunangan lu ribu sia ka talagatda amatei.

¹⁵ Lepa si Tuhan masikoiniake sara malaika addeat masisubuake Jerusalem. Tapoi teret malaika nenda aisege ka legret pamerakat gandum bakkat Arauna tai Jebus, si Tuhan masisaili siteuakenenNia addeat masiukum bangsa nenda. KuananganNia ka malaika nenda, “Paat! Ariake!”

¹⁶ Si David masiitco malaika nenda mumanyang ka oggak manua samba polak. Sibara lanjau ka kabei, malaika nenda matarek addeat masisubuake Jerusalem. Iageti si David samba sangamberi siuteake sarakyat, kateteret nenda aimubibilet komak goni toggaiat olei baga, murekkuk ka polak.

¹⁷ Panindounangan si David, kuanangannia, “Oi Taikamanua, aku le sigalai sele. Aku le sipasikokoiniake masibaraake pasisuranan masiagai iginia sipulalaggai nenda. Bangsa nene bulatnia ta amasigalai sele! Oi Tuhan, Taikamanuangku, aku le ukum samba sangalalepku, tapoi areuake le ngamataat pugejaat baga nene ka paamianNu.”

¹⁸ Lepa malaikat Tuhan masikoiniake si Gad masikua kai David aipoi buita tusakainia ka kudduat pamerakat gandum bakkat Arauna samba masirioake kudduat pasibuluat addeat Tuhan sedda.

¹⁹ Iageti mutuitui te si David siripot parentat Tuhan sisegeakenen katubunia sisege kai Gad.

²⁰ Ka kudduat pamerakat gandum nenda Arauna samba epat sia tatogania taimanteu sipasipepera gandum. Masiitco malaika nenda, epat sia togat Arauna nenda tuitui mulipput.

²¹ Kele aiitco si Arauna ioi Rimata David, ailiakenangan si David samba purekkuknangan ka matania.

²² Kuanangan si David katubunia, “Koba masigalai kudduat pasibuluat ka kudduat nene addeat Tuhan, bule ipuari besi simasappo nene. Kalulut nenda sakiake le polak nene katubukku. Kuangan le piga sakinia, aku masiluluinia geti.”

²³ Aleginangan si Arauna, “Ah, alaan le Tuanku,” samba galaiakean le apa addeakenen Tuanku simaeru. Koine sangamberi jaui addeat buluakenen rarangen, samba loina pasiraraknia Tuanku momoi masipakei sangamberi lappri pasiperakat nene. Kauat ala leu et gandum addeat panguruat sangamberinia nenda kuake, paat leu masiluluinia Tuanku.”

²⁴ Tapoi aleginangan rimata, “Taa! Koba kusakinia simasut siripot sakinia. Ta' koba masipanguruatake kai Tuhan apa sibabara kekeu ele apapa sinilokku sitaisasakiet.”

²⁵ Iageti si David masilului kai Arauna enemngotu bulagat mas addeat kudduat nenda.

²⁶ Lepa rioakenangan si David sara kudduat pasibuluat sedda addeat Tuhan, samba masipanguruatke buluakenen rarangen samba leu buluakenen paabanan. Lepa geti panindounangan samba si Tuhan masialegi panindogatnia nenda ka pasigogorosotake obengan sibara ka manua sipasilalabo sangamberi buluakenen ka uddut kudduat pasibuluat nenda.

²⁷ Lepa koiniakenangan malaika nenda si Tuhan masisabbukake minca lanjaunia, iageti malaika nenda masigalaiake parentat Tuhan nenda.

²⁸ Kateteret si David masiitco aipoi si Tuhan masialegi panindogatnia kalulut panguruatnia nenda, iageti panguruatakenangan minca buliakenen ka kudduat pasibuluat nenda.

²⁹ Kateteret nenda sapou Tuhan sigalai Mose ka simatangeu, samba kudduat pasibuluat addeat buluakenen rarangen aipeile ka kudduat parurukat ka Gibeon.

³⁰ Tapoi si David ta magege sedda addeat manibo pasamba Taikamanua, lulut malotonia ka lanjau malaikat Tuhan.