1Taw. 20 - BUKO SIPUNENAN

Si David masioppu Raba

¹ Rura pangureman ka sibabara, kateteret sangamberi rimata simatukklenia mei pasaggak, si Joab masikau saladdunia samba masioppu tobbou laggai Amon. Kateteret nenda Rimata David amukuddu le ka Jerusalem samba ta ameinia. Si Joab samba saladdunia masigoilik laggai Raba, lepa masisaggangi samba masipakatai laggai nenda.

² Kapplu nenda oi si David samba masiala simakope igi bibilet siraurau sibara ka laggai nenda. Ka taddet sangamberi bibilet nenda ai kirit purimataat rimata Amon. Kirit purimataat nenda sanenia iaili telu pulu epat kilogram samba ipalainge sangambua simakirisau. Alanangan si David simakirisau nenda samba pasangakenangannia ka kirit purimataatnia.

³ Lepa geti si David masipaabbini sipulalaggai ka Raba nenda samba ubbukenangan sia mugalai pasamba gagaji, papakru samba kampak. Pagalaiat nenda igalaiakenia leu et ka sangamberi laggai Amon bagei. Lepat nenda si David samba sangamberi saladdunia toili ka Jerusalem.

Pasaggangan masisaggangi sangamberi tai Filistin sabeu tubu

⁴ Piga ngagogoi pa lepat nenda bara minca pasaggangan masisaggangi tai Filistin ka Gezer. Ka bagat sara pasaggangan nenda si Sibkhai tai Husa masimateiake sara sirimanua sabeu tubu sipuoni Sipai. Iageti kala leu et tai Filistin.

⁵ Ka pasanggangan ka bagei masisaggangi tai Filistin si Elhanan togat Jair masimateiake si Lahmi sarainan Goliat tai Gat. Uman simuine bakkat Lahmi nenda kele beunan loinat pasitenun.

⁶ Ka bagat pasaggangan bagei leu et ka Gat ai sara sirimanua sabeu tubu enem singongoinia ka senen kabei samba rerenia. Ia paninikat sabeu tubu teteret siburu.

⁷ Ia masipaloloi tai Israel, samba kalulut nenda imateiakenia si Jonatan, togat Simea kebbut David.

⁸ Ka telutda simateiakenen David samba saladdunia nenda iate paninikat sirimanua sabeu tubu ka Gat.