1Taw. 19 - BUKO SIPUNENAN

Si David masikalaake bangsa Amon samba Siria

¹ Piga pa tetere sibabara tata' si Nahas rimata Amon, samba si Hanun togania ibailiu rimata.

² Lepa kuanangan te rimata David, “Si Nahas iate suruakku simatopit, oto buita kisedda leu et aku katubut Hanun togania.” Kalulut nenda si David masikau punutubu ka tobbou laggai Amon addeat masipusuibinia kalulut kamateiat ukkuinia. Kele arasege ka Amon,

³ sangamberi siuteake tobbou laggai nenda masikua ka Rimata Hanun, “Bui' te Tuanku masipaatu si David masiake punutubunia nenda kalulut ioba masisuru ukkui Tuanku! Nia masiake sangamberi sirimanua nenda sene sibailiu sipasitataiko addeat masilelekake tobbou laggaita, bule moi ioppunia!”

⁴ Rimata Hanun masipalabaki sangamberi sikoiniakenen David nenda, masisapu bulut bakklatda, masitippu bibiletda teret kere koddok, samba masikoiniake sia mutuitui.

⁵ Tapoi maila sia toili, oto ei sia ka Jerikho. Kateteret pagalaiat nenda tupaagaiake katubut David, kaunangan patonekat bule sangamberi sikoiniakenen nenda mukuddu ka Jerikho teret ipututu' bulut bakklatda minca.

⁶ Lepa Rimata Hanun samba tai Amon iagai bagatda aipoi sigalaira sibaraake isaggangi sia si David. Kalulut nenda kaurangan telu pulu epat ribu kilogram perak ka kupkumen laggai Mesopotamia Atas, samba leu ka Maakha samba Zoba ka Siria addeat masisewa telu pulu rua ribu kereta pasaggak samba tai saladdu sipukukuro.

⁷ Iageti oi te saladdu rimata Maakha pasamba sangamberi kereta pasaggak sinaki nenda samba musapou legret Madeba. Tai Amon leu et oi sibara ka sangamberi laggaira addeat pasaggak.

⁸ Kateteret aiarep pagalaiat nenda si David koiniakenangan si Joab pasamba sangamberi saladdunia mei masilawan saggak.

⁹ Bela tai Amon samba masipulelek saladdudda ka ipot matatbaliu gugurukat Raba, inan laggaira, oto ka sangamberi tai rimata siooi addeat masiropake sia, masipasikeli saladdunia ka polak su'su simalio.

¹⁰ Itconangan si Joab aipoi atulabtibmannia kalulut saladdut saggak ka mata samba ka teitei. Kalulut nenda pilinangan saladdu Israel simakope eru samba masipagalak sia sipamamatai pasamba saladdu Siria.

¹¹ Pulegeijatnia sibara ka saladdu Israel tusegeake sia katubut Abisai baginia, sipasikeli saladdutda sipamamatai pasamba saladdu Amon.

¹² Kuanangan si Joab ka baginia nenda, “Ke ta'an kuom ka tai saladdu Siria, konan olaake te masiropake aku. Bailoknia, ke nuom ka tai saladdu Amon, oi aku masiropake ekeu.

¹³ Ommake te! Kauan tapasaggak ka gege addeat bangsatta samba addeat sangamberi laggai Taikamanuanta. Bule si Tuhan masigalaiake apa siteuakenenNia.”

¹⁴ Si Joab samba saladdunia bela masisaggangi, bailiunangan saladdu Siria mutuitui.

¹⁵ Kateteret tai Amon masiitco saladdu Siria masituituiake tubu, tuitui leu et sia sibara kai Abisai samba soksok ka bagat laggai. Lepat masisaggangi tai Amon, si Joab toili ka Jerusalem.

¹⁶ Aile iaagai bagatda tai Siria aipoi sia arakalaakean sia tai Israel. Iageti sogairangan saladdutda sibara ka kupkumen laggai isit kabelaiat sulu bagat oinan Efrat samba masikoiniake saladdunia pasaggak iuteake sia si Sobakh utet saladdut Hadadezer rimata Zoba.

¹⁷ Masiarep pagalaiat nenda, si David masiruruake sangamberi saladdut Israel lepa masitalipoki bagat oinan Jordan samba masipasikeli saladdunia sipamamatai pasamba tai Siria. Iageti pasaggakrangan,

¹⁸ samba kalaakerangan saladdu Siria sia tai saladdu Israel. Si David samba saladdunia masimateiake pitu ribu sia sipasiabbit kereta pasaggak samba epat pulu ribu sia tai saladdu sipueenung rere. Si Sobakh utet saladdut Siria nenda tumateiake leu et.

¹⁹ Kateteret sangamberi rimata sikupkup Hadadezer masiitco aipoi arakalaakean sia saladdu Israel, tiddourangan paaban pasamba si David, samba masireddet katubunia. Lepat nenda tai Siria ta'an raoba minca masiropake tain Amon.