1Taw. 18 - BUKO SIPUNENAN

Kamanangan David ka bagat pasaggangan

¹ Piga pa tetere sibabara Rimata David masisaggangi samba masikalaake tai Filistin samba leu masioppu laggai Gad pasamba sangamberi desa ka bebenia.

² Kalaakenangan leu et si David tai Moab bailiunangan sia masireddet samba masilului upeti katubunia.

³ Lepa geti si David masikalaake Hadadezer, rimata ka Zoba legret kupkumen laggai Hamat ka tobbou laggai Siria. Kateteret si Hadadezer ai ka bagat penunganan addeat masikupkuake kupkumen legret tirit bagat oinan Efrat.

⁴ Si David masioppu sangaribu kereta pasaggak, samba masitangsiake pitungaribu sia saladdu sipukukuro samba leu ruapulu ngaribu sia saladdu sipueenung. Nia masigalai imasakit sangamberi kuro, ta ke' sangarubeiat, addeat sangaribu kereta pasaggak.

⁵ Tai Siria sibara ka Damsyik masikau tai saladdu addeat masiropake Rimata Hadadezer, tapoi si David masikalaake sia samba masipamatei rua pulu rua ribu sia.

⁶ Lepa geti rioakenangan sangamberi pusapougat saladdu ka bagat kupkumenda samba sia masireddet samba leu masilului upeti katubunia. Si Tuhan masikau kamanangan katubut David kaipa-kaipa poi ipasaggak.

⁷ Sangamberi korabbi mas sipakeira saladdu Hadadezer iraurau si David samba tuabbit ka Jerusalem.

⁸ Ia leu et sabagei si David leu et masiala simakope igi perunggu sibara ka Tibhat samba Kun, sangamberi laggai siburu kupkumennia si Hadadezer. Ka gogoi sibabara sangamberi perunggu nenda ipakei si Salomo addeat masigalai tappaiat samba leu sangamberi arigi samba pugalai ka parurukat ka Uman Tuhan.

⁹ Rimata Tou sibara ka Hamat masiarep aipoi si David aikalaakean sangamberi saladdu Hadadezer.

¹⁰ Iageti ia masigugluake si Joram togania addeat mamsisegeake salam katubut David samba masikua selamat ka sangamberi kamanangannia nenda, lulut si Hadadezer amareireian pasaggak pasamba si Tou. Aioi si Joram katubut David pasamba masiabbit maigi panguruat mas, perak samba perunggu.

¹¹ Rimata David masipanguruatake sangamberi panguruat nenda katubut Tuhan addeat itupakei ka bagat enungan galaiakenen parurukat. Kisedda leu et aigalaiake ka sangamberi bibilet mas samba perak sirauraunia sibara ka Hadadezer samba tai bangsa sikalaakenennia, iate bangsa Edom, Moab, Amon, Filistin samba Amalek.

¹² Si Abisai (inania sipuoni si Zeruya) masikalaake samba masipamatei pulu balu ribu sia tai Edom ka su'sut Asin

¹³ lepa rioakenangan sangamberi pusapougat saladdu ka sangaliot Edom. Iageti sangamberi tai Edom masireddet le katubut Rimata David. Si Tuhan masikau kamanangan katubut David kaipa-kaipa poi ipasaggak.

¹⁴ Kisedda te si David masiparenta sangaliot Israel samba masijago bule sarakyatnia sarat tugalaiake roipo samba eru.

¹⁵ Nene te sangamberi simabuak pupasikelanan sirioakenen David: si Joab, togat Zeruya, ibailiu utet saladdu, Josafat togat Ahilud ibailiu sipuuku pubulaganan,

¹⁶ si Zadok togat Ahitub samba si Ahimelekh togat Abyatar sibailiu imam, Sausa ibailiu panitera,

¹⁷ si Benaya togat Joyada ibailiu ute saladdu tai Kreti samba tai Pleti, samba tatogat David iate sia siboiki sipasirorop katubut rimata.