1Taw. 17 - BUKO SIPUNENAN

Si Natan masisegeake patonekat Tuhan kai David

¹ Lepat aipulelek ipukuddu Rimata David ka uma purimataatnia, kasara gogoi sogainangan nabi Natan samba kuanangan, “Itco, aku nene mukuddu ka uma purimataat sigalai sibara ka loina pinilok Libanon, tapoi Peti Pakerekat Bagat Tuhan ai ka bagat sapou!”

² Aleginangan si Natan, “Galaiakean sangamberi pinatut Tuanku aipoi Taikamanua masiropake Tuanku.”

³ Tapoi ka soibo nenda kuanangan Taikamanua katubut Natan,

⁴ “Kenan le samba segeake le ka paguguletKu si David patonekatKu nene, “Ta' ekeu sipasiririoake geti uma addeatKu.

⁵ Baranangan akubelaake bangsa Israel ka Misir aili kineneiget, ta'pei amukuddu Aku ka bagat sara lalep. Sarat mueppek le Aku samba mukuddu ka sara sapou.

⁶ Burut pueppanganKu siuteake silepa piliKu, aponia paluluatnia ta raririoake sara uma sibara ka loina pinilok Libanon addeatKu.”

⁷ Lulut nenda paagai le Natan kai David, paguguletKu aipoi Aku Tuhan Sipulugege, masikua katubunia, akualaan ekeu ka galajetnu masijago biribiri ka su'su simalio, samba Kubailiuake rimata ka sangamberi paamianKu Israel.

⁸ Aku Ropakean ekeu, kaipa nuei, samba sangamberi saggaknu Akutataakean kateteret nupasaggak. Galaikungan ekeu imakope imaagai geti kele saute simakope beunan ka polak.

⁹ Addeat paamianKu Israel akupatarekngan addeat kudduat ibailiu polak katukakaratda bule ioi rapurimanua simaaman ta'an tupagegeugeu minca.

¹⁰ Baranangan araoi ka polak nene siburu, samba ta'pei anai rimatada, rasaggangi sia sangamberi sirimanua sioba pugegege. Tapoi pagalaiat nenda ta'an muaaili minca. Kugalai palelengan masikalaake geti sangamberi saggaknu, samba akekungan geti sapunuteteu katubum.

¹¹ Ka sibabara, ke iaili teteret purimanuaiatnu samba turateiake ekeu ka ratei taikebbukatnu, sara sibara ka tatogam simanteu Kurioake geti ibailiu rimata.

¹² Nia te sirioake umangKu. Purimataatnia Kuroronake geti, samba addeat teret buruburu sara sibara ka sapunuteteunia muparenta geti sibailiu rimata.

¹³ Bailiunangan Aku geti ukkuinia samba bailiunangannia geti togaKu. Riuriu le geti kugalai eru katubunia siripot ka palelenganKu. PalelenganKu katubunia geti riuriu le geti Kuukaake, ta kele sigalaiakenenKu katubut Saul silepa Kukaritake ka kudduatnia bule ioi ibailiu ekeu rimata.

¹⁴ Togam sipiliKu nenda Kubailiuake geti rimata ka sangamberi paamianKu samba purimataatKu teret buruburu, samba togat punuteteunia simatuppai muparenta geti sibailiu rimata.”

¹⁵ Paagainangan si Natan kai David sangamberi silepa itoilaake Taikamanua katubunia.

Panindogat pusurakat David

¹⁶ Lepa guru' te si David ka bagat sapou Tuhan. Pukuddunangan samba manidou, “Oi Tuhan Taikamanua, ekeu samba sangalalepku ta mateu masisilo sangamberi puerukat siorakakenenNu katubukku burunia nene.

¹⁷ Tapoi anugalai masaliu sibara ka nenda, anugalai palelengan pagalaiat sapunuteteuku addeat gogoi sibabara geti. Nugalaiake pei aku sibailiu sara siabeu,

¹⁸ Apangan minca siooi kukua katubum oi Tuhan Taikamanua? Nuagai le sangamberinia pagalaiat paguguletNu nene, tapoi ekeu masiake pubebeunan katubukku.

¹⁹ Sangamberinia teu bagam le samba addeat besiakenenku Ekeu masigalaiake sangamberi galajet sabeu nene ka simatotoila.

²⁰ Sarat Ekeu te Taikamanua, ta anai simakere pasamba ekeu. Kai masiagai pagalaiat nenda lulut alepaan tupaagaiake baranangan siburu.

²¹ Ka sangaliot polak ta'anai bangsa kele Israel. Israel sarat sarania le bangsa sibelaakenenNu sibara ka paoreiat ibailiu paamianNu addeatda masigalai onin imakope imaagai ka sangaliot polak. Nubelaake paamianNu ka Misir, samba masikaritake tai bangsa bagei kateteret paamianNu bela pasaggak.

²² Bangsa Israel anubailiuake paamianNu saram addeat teret buruburu. Samba Ekeu, oi Tuhan, ibailiu Taikamanuanda.

²³ Kineneiget, oi Tuhan Taikamanua, obaan te masironake addeat teret buruburu palelengan sitiboakenenNu pagalaiat tubukku samba sapunuteteuku. Obaan te masigalaiake apa silepa Nupalelek nenda.

²⁴ Kaipa-kaipa sirimanua sarat masiabeu geti onim samba masikua, “Tuhan Sipulugege iate Taikamanua ka sangamberi Israel.” Addeat teret buruburu sara sibara ka sapunuteteuku muparenta geti sibailiu rimata.

²⁵ Kugegeake tubukku masisegeake panindogat nene katubum, oi Taikamanua, lulut Ekeu le amasipaagaiake katubukku aipoi togat punuteteuku Nubailiuake geti rimata ka sangamberi bangsa nene.

²⁶ Ekeu, Tuhan, iate Taikamanua, samba pagalaiat simalainge nenda anupalelekngakean katubukku

²⁷ Kalulut nenda, kutiddou, obaan panukani sapunuteteuku bule teret buruburu mariuriu masiagai katet bagam. Lulut alepaan Nupanukani paamianNu, oi Tuhan, iageti sia riuriu tupanukani geti teret buruburu.”