1Taw. 13 - BUKO SIPUNENAN

Peti Pakerekat Baga tuotcaake sibara ka Kiryat-Jearim

¹ Rimata David masipatiboiji pasamba sangamberi tai utet saladdunia siuteake sangamberi pusaraat sangaribu sia samba sangamberi pusaraat sangotu sia.

² Lepa kuanangannia katubut sangamberi sirimanua nenda, “Ke sangamberi sasaraina pasese kabaga, samba iobaake si Tuhan, Taikamanuanta, maeru le takoiniake punutubu ka tai imam samba tai Lewi ka sangamberi desatda, samba leu sangaliot bangsatta sabagei addeat masikoiniake sia moi paruru pasambatta sene.

³ Lepa geti ei sita masiala Peti Pakerekat Bagat Taikamanua siobaakenen taipuukuket ujut puparentaat Rimata Saul.”

⁴ Sangamberi tai Israel siparururu nenda mangka baga ka pinaatu nenda samba masiooakenia.

⁵ Iageti si David masiruruake sangamberi sarakyat Israel ka sangaliot tobbou laggai, barania pasongan Misir ka kaiaman sege ka enungan Hamat ka bare, addeat masiala Peti Pakerekat Baga nenda ka Kiryat-Jearim samba masiabbitnia ka Jerusalem.

⁶ Lepa ei si David simakere sia ka laggai Baala, iate Kiryat-Jearim, ka kupkumen laggai suku Jehuda addeat masiala Peti Pakerekat Bagat Taikamanua. Pati nenda tuoniake, “Si Tuhan Sipuririmata ka uddut Kerab”.

⁷ Segenia ka Baala, alarangan Peti Pakerekat Baga nenda ka lalep Abinadab, lepa sakaiakerangannia ka uddut sara pedati sibau. Si Uza samba si Ahyo masipaenungake pedati nenda,

⁸ oto ka sia si David samba sangamberi bangsa Israel muturu samba muurai ka sut gorat baga addeat masisuru Taikamanua sialei kecapi, rebana, simbal samba trompet.

⁹ Kele arasege ka kudduat pasingitinan gandum bakkat Kidon, sangamberi jaui sipasigigirit pedati nenda, tusoksok, iageti si Uza masitotoiake kabeinia samba masiukkaake Peti Pakerekat Baga nenda bule bui' ibele.

¹⁰ Teteret nenda leu et pugolunangan si Tuhan katubut Uza kalulut sigalainia nenda bailiu paloloijat katubut Tuhan. Lepa si Uza mateiakenanganNia sedda.

¹¹ Iageti barania nenda kudduat nenda tukua, “Peres-Uza”. Golut David kalulut si Tuhan masimateiake si Uza.

¹² Tapoi si David maloto leu et ka Taikamanua samba kuanangan, “Kineneiget kipangan le ioi kuabbit Peti Pakerekat Baga nenda?”

¹³ Lulut nenda si David ta'an amuriuriu masiabbit Peti Pakerekat Baga nenda ka Jerusalem, tapoi masikoirinia ka lalep Obed Edom, tai Gat.

¹⁴ Peti nenda kuddu sedda telu ngalaggo burunia samba si Tuhan masipanukani epput Obed-Edom samba leu sangamberi apa sibabarania.