1Taw. 11 - BUKO SIPUNENAN

Si David ibailiu rimata ka sangaliot Israel samba Jehuda

¹ Sangamberi siuteake bangsa Israel moi katubut David ka Hebron samba kuarangan, “Kai nene saepput Tuanku.

² Baranangan siboiki samba kateteret aipei leu si Saul masipaparenta kai, Tuanku le siuteake saladdu Israel ka senen raei pasaggak. Ai pei bagei Tuhan Taikamanua Tuanku aipalelekngan aipoi Tuanku le siuteake geti paamianNia samba ibailiu rimatatda.”

³ Iageti galainangan palelengan si David pasamba siuteake tai Israel nenda. Lepa rioakerangannia ibailliu rimata Israel kele silepa ipalelekake si Tuhan katubut Samuel.

⁴ Ka sara tetere Rimata David pasamba sangamberi tai saladdu Israel mei masisaggangi laggai Jerusalem. Kateteret nenda laggai nenda muoni Jebus, samba sipasikukudduiji tai Jebus sipasilalaggaiji siboiki laggai nenda.

⁵ Sangamberi tai Jebus arakuangan kai David, aipoi ia ta momoi le maisguruki laggaira nenda. Tapoi si David atueddet masioppu irip laggaira sipuoni Sion.

⁶ Kateteret nenda ai si David katubut saanak buania aipoi sirimanua siboiki sipasimamatei sara tai Jebus ibailiu geti utet ka pasaggangan. Iageti kalulut si Joab le bulat siboiki masisaggangi tai Jebus, turioakenia ibailiu ute ka pasaggangan. (Inan Joab sipuoni Zeruya.)

⁷ Lepat araoppu benteng Sion, pulaggainangan si David sedda. Nenda lulunia baranangan tetere nenda benteng nenda tukua “Laggai David.”

⁸ Si David masigalai minca laggai nenda barania ka kudduat sibuakakenen sitabbui polak ka saigit kabelaiat sulu tinambu, lepa geti psigagalai nenda iriuriuake si Joab pat kapplu.

⁹ Si David memei mabuburu memei maroron, kalulut si Tuhan Sipulugege masiropnia.

Sangamberi pejuang David simaagai simakope

¹⁰ Nene te sangamberi oninda tai utet saladdu David simaagai simakope sikere sangamberi rakyat Israel, sangamberitda masibesiake bule si David ibailiu rimata kele sipalelek Tuhan. Samba mariuriu sia masirop puparentaatnia.

¹¹ Utet saladdu siboiki iate Jasobam tai Hakhmoni, ia siuteake “Telu saladdu”. Ai sangaminca kabagat pasaggangan isaggangi telu ngotu sia samba masipamatei sia sangamberitda pasamba simuine bakkatnia.

¹² Sirimanua sikarua kabagat Telu Saladdua nenda iate si Eleazar togat Dodo sibara ka muntogat Ahohi.

¹³ Kabagat pasaggangan ka Pas-Damim pasaggaknia masitut si David masisaggangi tai Filistin. Kateteret tai Israel araputuitui,

¹⁴ ia samba saanak buania kuddu sia katalagat sara monen gandum samba pamateirangan masisaggangi sangamberi tai Filistin nenda. Lepa kaunangan si Tuhan kamanangan siabeu katubunia.

¹⁵ Ka sara gogoi telu sia sibara ka telu pulu utet saladdu David simatugru, mei masialiake si David ka sara kuduat sibara kekre ka sara leleu buku legret Ngaliu Adulam. Kateteret nenda tai Filistin ai sia musasapou ka su'sut Refaim,

¹⁶ samba sangabagguak saladdutda masikudduiji Betlehem.

¹⁷ Si David marepdep laggai pututukat matania nenda geti samba kuanangan. “Ah, ke aku tuake lo oinan sibara ka siugguk legret matatbaliu gugurukat ka Betlehem.”

¹⁸ Masiarep nenda telu tai utet saladdu masibelaiji pusapougatda tai Filistin lepa seilu oinan sibara ka siugguk nenda, lepa geti abbitrangannia kai David. Tapoi si David ta ioba ilonia, tapoi masipiliakenia sibailiu panguruat kai Tuhan.

¹⁹ Kuanangannia, “Ka onin Taikamanua ta momoi kuloo' oinan nene! Ke kuloo'nia kele al le aku loo' logau sangamberi sirimanua sibuluake tubutda!” Oto si David bulat ta ioba le masiloo' oinan nenda. Nenda te sangamberi sigalaira simaeru sitelu saladdu simagege nenda.

²⁰ Si telungapulu utet saladdu simaagai simakope nenda tuoniake leu et. Iuteake siasi Abisai bagit Joab. Aiat aimateiake telungoru sirimanua pasamba simuine bakkatnia,

²¹ samba kalulut nenda bailiunangannia makope imaarep. Tapoi ta'pei iaaili kopetramaarep sia telu saladdu simagege nenda.

²² Sara utet saladdu simakope imaarep sabagei iate si Benaya togat Joyada, tai Kabzeel. Bulat magegenia. Rua saladdu sabeu sibara ka Moab aimateiake. Ai ka sara gogoi simasalju junungnia kabagat sara lobok samba masimateiake sangamuneng singa sedda.

²³ Ai leu et aimateiake sara tai Misir sabeu tubunia, buaknia lima eto. Sirimanua nenda sibara pamatei simujine bakkat simakope beunan, tapoi sarat pasamba tutura le aiailiakenia si Benaya. Simuine bakkat ka kabei tai Misir nenda oppunangannia lepa pakeinangannia addeat masimateiake sirimanua nenda.

²⁴ Nenda sangamberi sigalai Benaya simaeru, sara sibara ka Telu pulu saladdu.

²⁵ Kabagat mungkuat nenda, si Benaya le sipuboboki, tapoi ta'pei iaaili kopet ramaarep sia Telu saladdu. Rioakenangannia si David ibailiu utet sipasijajago tubunia.

²⁶ Asael bagit Joab, Elhanan togat Dodo tai Betlehem,

²⁷ Samot tai Harod, Heles tai Peloni,

²⁸ Ira togat Ikes tai Tekoa, Abiezer tai Anatot,

²⁹ Sibkhai tai Huda, Ilai tai Ahohi,

³⁰ Maharai tai Netofah, Heled togat Baana tai Netofa,

³¹ Itai togat Ribai sibara ka Gibea tai Benjamin, Benaya tai Piraton,

³² Hurai sibara ka su'sut Gaas, Abiel tai Bet-Araba,

³³ Azmawet tai Bahurim, Elyahba tai Saalbon,

³⁴ Hasyem tai Gizon, Jonatan togat Sage tai Harari,

³⁵ Ahiam togat Sakhar tai Harari, Elifal togat Ur,

³⁶ Hefer tai Mekherati, Ahia tai Peloni,

³⁷ Hezro tai Karmel, Naarai togat Esbai,

³⁸ Jo'el sarainan Natan, Mibhar togat Hagri,

³⁹ Zelek tai Amon, Naharai tai Beerot, sipasiabbit pamatei Joab togat Zeruya,

⁴⁰ Ira tai Jetri, Gareb tai Jetri,

⁴¹ Uria tai Het, Zabad togat Ahlai,

⁴² Adina togat Siza tai Ruben, utera tai Ruben samba leu nia sibara telu pulu saladdu,

⁴³ Hanan togat Maakha, Josafat tai Mitni,

⁴⁴ Uzia tai Asytarot, Syama samba Jeiel, tatogat Hotam tai Aroër,

⁴⁵ Jediael togat Simri, samba Joha, sarainania tai Tizi,

⁴⁶ Eliel tai Mahawim, Jeribai samba Josawya, tatogat Elnaam, Jitma tai Moab,

⁴⁷ Eliel, Obed samba Jaasiel tai Mezobaya.