1Taw. 10 - BUKO SIPUNENAN

Kamateiat Rimata Saul

¹ Tai Filistin pasaggak pasamba tai Israel ka leleu Gilboa. Maigi tai Israel simamatei sedda, samba sabagei samba leu si Saul samba tatogania tuitui sia.

² Tapoi tai Filistin masikukru sia samba mateiakerangan tatogat Saul iate si Jonatan, Abinadab samba si Malkisua.

³ Oloi lepa pasaggangan ka bebet Saul, samba nia leu et iorak siloguira tai saggak samba pumaujunangan.

⁴ Lepa kuanangan si Saul katubut silainge siabbit pamateinia, “Golok lanjaunu samba pununungan aku, bule bui' rapaguileake aku samba ramateiake aku sia sirimanua sitaiagai si Tuhan nenda.” Tapoi silainge nenda ta ioba masioppat lanjaunia kalulut makope isurunia. Lulut nenda si Saul masiala lanjaunia samba beleakenangan tubunia ka sot lanjaunia nenda.

⁵ Kele aiitco silainge nenda si Saul poi amateiat, nia leu et masibelake tubu ka sot lanjaunia, lepa matei ka bebet Saul.

⁶ Kisedda te si Saul samba telu tatogania samba sangamberi saanak buania samba leu silainge nenda matei ka sara gogoi nenda.

⁷ Kele araarep sangamberi tai Israel sikuddu ka silat su'sut Jizreel, saladdut Israel poi amutuituian sia, samba si Saul poi samba leu tatogania amateiat, tuitui sia masikaddiuake sangamberi laggaira. Lepa geti kudduijirangan tai Filistin sangamberi laggai nenda.

⁸ Mancepnia le kele araoi tai Filistin addeat masiparauraugi sangamberi tubu simamatei, seserangan si Saul samba telutda tatogania amateiat ka leleu Gilboa.

⁹ Sagrirangan lolokkat Saul samba masiala leppei pasaggaknia, lepa koiniakerangan pakoinien ka sangalio laggai Filistin masisegeake katuaggaiat sibau nene ka tai kauma samba ka taikamanuanda.

¹⁰ Lepa geti leppei pasaggaknia si Saul nenda tukoiri ka bagat uma rimata sinanalep, si Asytoret, samba tubunia tupattaake ka irip laggai Bet-Sean.

¹¹ Tapoi sipulalaggai ka Jabesh ka Gilead masiarep apa sigalaiakenenda tai Filistin katubut Saul,

¹² lepa sangamberi sirimanua simakope gege katalagatda mei masiala tubu simamatei Saul samba tatogania, lepa abbitrangannia ka Jebesh. Rateiakerangan sangamberi tolatnia ka tei sara loina sabeu, lepa geti pupuasorangan pitu ngagogoi burunia.

¹³ Kisedda te' aimatei si Saul kalulut galaitubunia sitaimaroipo ka matat Tuhan, kalulut ta'aireddet tiboiet Tuhan, samba kalulut aitiddouan enungan sibara ka ketsat,

¹⁴ samba ta'aitiddou enungan sibara kai Tuhan. Kalulut nenda mateiakenangania si Tuhan samba kauanangan galaiat puaabeu rimata nenda kai David togat Isai.