1Sam. 9 - BUKO SIPUNENAN

Si Saul paaili pasamba si Samuel

¹ Ai sara sirimanua simakayo sibara ka suku Benjamin, oninia Kish, togat Abiel, punuteteu Zeror, togat Bekhorat, togat Afiah.

² Si Kish ai rua togania simanteu oninia si Saul, sara silainge simalainge tubu. Beri sara sia ka sangaliot Israel sisaliu laingen tubunia. Tubunia mananta leu et, ke tupakire nantatda tai Israel sarat teret ta'tania.

³ Ka sara gogoi piga ngamuneng pa kalidei Kish amapepe. Lulut nenda kuanangan si Kish katubut Saul, “Abbit le sara sia pagugulet, samba gaba kam sangamberi kalidei nenda.”

⁴ Lepa si Saul samba paguguletnia masigejengi leleu Efraim samba polak Salisa, tapoi ta arasese sangamberi tarimeu nenda. Lepa geti riuriuakerangan muenung ka polak Sahalim, tapoi sangamberi kalidei nenda ta anai leu et sedda. Gabarangannia leu et ka kupkumen laggai pasikelat suku Benjamin, tapoi siboboi le.

⁵ Kele arasege ka polak Zuf, kuanangan si Saul ka paguguletnia, “Totoilingan le sita, babara makope karat bagat ukkui ipaatu sita, taat ipaatu ka kalidei nenda.”

⁶ Aleginangan pagugulet nenda, “Ngena boiki! Ka laggai nene ai sara pagugulet Taikamanua. Bulat makope rasurunia sirimanua kalulut apa sikuania sarat muaaili. Kauan taei ka tubunia, bule momoi leu ipaagainia kaipa sangamberi kalidei nenda.”

⁷ Kuanangan si Saul, “Ke mei sita masiailiakenia, aponia kaunenta geti ka tubunia? Balutta roti siabbitta asapprungan, samba ta'an anai sangamberi sibabara ka sita kaunen ka pagugulet Taikamanua nenda.”

⁸ Aleginangan pagugulet nenda, “Apasese ai peile kaku sangaba'ba bulagat perak, nenda kukakau geti ka pagugulet Taikamanua nenda, bule ioba ipaagai katubutta kaipa sangamberi kalidei nenda.”

⁹ Siburu, katalagatda tai Israel, ke mei sara sirimanua ka Taikamanua masirereake enungan galaiakenen, kuanangannia, “Sita taei ka simakerek tiboiet,” kalulut siburu nabi nene rakua le nnia kele sara simakerek tiboiet.

¹⁰ Aleginangan si Saul, “Maeruan, kauan mei sita.” Lepa ei te sia ka laggai, ka kudduat pagugulet Taikamanua nenda.

¹¹ Kateteret aisia mananatra ka leleu siailiake ka laggai nenda, ailirangan piga pa taiokko sipasiseseilu oinan ka uggungan. Lepa parererangan katubutda taiokko nenda, “Ai leu simakerek tiboiet ka laggai nene?”

¹² Alegirangannia taiokko nenda, “Oo, ainia, simaruei le aituitui, aipuboiki kakam. Ke maola nupuenung kam, ele nuaaili peile kam nia. Simaruei le aioi ka laggai, kalulut gogoi nene ipangunguruatnake buluakenen addeat siberikabaga ka leleu ka kudduat pasibuluat.

¹³ Sangamberi sinogai ta mukokom ke ta'pei moinia, kalulut nia buita' boiki masipanukani buluakenen nenda. Ke mei kam kineneiget, ailimuiannia geti kepei tusakainia ka tinambu mukom.”

¹⁴ Oto si Saul samba paguguletnia muenung ka laggai, samba kateteret raguruki matatbaliu gugurukat, paailirangan pasamba si Samuel sipuenung masiailiake kudduat parurukat ka tinambu.

¹⁵ Tapoi aipatoilaan tubunia si Tuhan katubut Samuel, sangagogoi kepei ioi si Saul kisene,

¹⁶ “Mansep simanseman makakere kele tetere nene, Kukokoiniake te geti sara sirimanua sibara ka suku Benjamin masiailiake ekeu. Uddetnakenia ibailiunia rimata ka paamianKu Israel samba nia te masibebelaake pamianKu ka kabeira tai Filistin. Kalulut akuitcoan pangoringanda sapaaminKu nenda, rapusoga ratiddou paroman.”

¹⁷ Kele aipaitco si Samuel aiitco si Saul, kuanangan si Tuhan katubunia, “Nene te sirimanua sikuakKu ka tubum nenda. Nia te geti masipaparenta paamianKu.”

¹⁸ Kateteret nenda si Saul masilelegreake tubunia kai Samuel ka legret matatbaliu gugurukat, samba parerenangan, “Bojoi ukkui, kaipa lalepnia simatawa nenda?”

¹⁹ Aleginangan si Samuel, “Aku te simakerek tiboiet nenda. Kenannan nupuboiki kaku ka leleu kudduat pasibuluaat, kalulut gogoi nene mukokom sita sambatta. Mansep geti simanseman alegikungan sangamberi parerekatnu, kapplu nenda momoian nutoili kam.

²⁰ Pagalaiat sangamberi kalideimui simapepepe telu ngagogoi situsasabau nenda, bui' makarat bagam, kalulut atusesengan. Aipei bagei, simakope kepput saki ka sangaliot Israel tuake le geti ka tubum samba ka muntogatnu.”

²¹ Aleginangan si Saul, “Aku nene sibara ka suku Benjamin, suku simakope goiso ka Israel, sambat bagei sikaumangku simakope ta anai katukolobat ka bagat suku nenda. Oto angoian le nukua kisedda katubukku?”

²² Lepa geti si Samuel masina'na si Saul samba paguguletnia tuguru' ka bagat kudduat simalio, lepa kaunangan sia ka kudduat ka mata ka matatda sia sinogai, igitda ai telu pulu sia.

²³ Riuriuakenangania si Samuel masikua ka sipaneneu, “Patarek akkula siakeku simaruei ka tubum nenda.”

²⁴ Lepa geti sipaneneu nenda masiala rubeiat sipili sibara ka akkula bakkapat, lepa tattanakenangannia ka matat Saul. Kuanangan si Samuel, “Nene te rubeiat silegeiakenenku addeatnu bule ioi nupukom simakere pasamba tairauma sabagei.” Lepa pukomnangan si Saul. Oto ka gogoi nenda si Saul mukom simakere pasamba si Samuel.

²⁵ Lepa nenda gorosot sia baratda ka leleu raei ka laggai. Iageti kaunangan pereman Saul ka uddut lalep ka simagaktuk.

²⁶ Lepa perepnia. Ka teteret ibela sulu, si Samuel masisogai si Saul sikuddu ka teitei lalep nenda, kuanangannia, “Surungan, aile kutaroake ekeu.” Suru si Saul, lepa tuitui sia simakere si Samuel.

Si Samuel masiuddetnake si Saul ibailiu rimata

²⁷ Kele arasege ka bebet laggai kuanangan te si Samuel katubut Saul, “Gugluakean le paguguletnu nenda ipuboiki ka sita.” Lepa ei pagugulet nenda, samba kuanangan minca si Samuel, “Puaringan le sene boiki, aile kupoiliat patonekat Taikamanua katubum.”